សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ បានណែនាំដល់ មេបញ្ជាការ មេបញ្ជាការរង និងនាយ ពលទាហាន ក្នុងកងពលតូចលេខ៧០ ក៏ដូចជាកងទ័ពទាំងអស់ នៃកងយោធពលខេមរភូមិន្ទ ត្រូវសហការជាមួយ ក្រសួង ស្ថាប័នមានសមត្ថកិច្ច និងអាជ្ញាធរដែនដីគ្រប់លំដាប់ថ្នាក់ ក្នុងការចាត់វិធានការចំពោះគ្រប់សកម្មភាព របស់ទណ្ឌិត សម រង្ស៉ី និងបក្ខពួក ដែលប៉ុនប៉ងធ្វើរដ្ឋប្រហារ ផ្តួលរំលំរាជរដ្ឋាភិបាលកម្ពុជាស្របច្បាប់ ដែលប្រសូត្រចេញពីការបោះឆ្នោតដោយឆន្ទះរាស្ត្រ។ ការប្រកាស បែបនេះ របស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាតំណាងដ៏ខ្ពង់ខ្ពស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើឡើងក្នុងឱកាសដែលសម្តេច អញ្ជើញជាអធិបតី ក្នុងពិធីប្រារព្ធខួបអនុស្សាវរីយ៍លើកទី២៥ នៃថ្ងៃបង្កើតកងពលតូចលេខ ៧០ ដែលមានប្រភពផ្ដើមចេញពីវរសេនាតូចលេខ៧១ នៅព្រឹកថ្ងៃទី១៤ ខែតុលា ឆ្នាំ២០១៩។
សម្ដេចពិជ័យសេនា ទៀ បាញ់ បានបញ្ជាក់យ៉ាងដូច្នេះថា៖ បើទោះបីយើង មានមោទកភាពចំពោះស្នាដៃ និងសមិទ្ធផលដែលសម្រេចបានមកហើយក៏ដោយ ប៉ុន្តែចលនាឧទ្ទាមរបស់ពួកក្បត់ជាតិ ដឹកនាំដោយទណ្ឌិត សម រង្ស៉ី និងបក្ខពួកដែលមានបរទេសនៅពីក្រោយខ្នង នៅតែមិនបោះបង់នូវមហិច្ចតាប៉ុនប៉ងបង្កអស្ថិរភាពដល់ប្រទេសជាតិ ដូចនេះ នាយទាហាន នាយទាហានរង និងពលទាហានទាំងអស់ ក្នុងកងពលតូចលេខ៧០ នៃកងយោធពលខេមរភូមិន្ទ នៅមានភារកិច្ចជាច្រើនទៀត ដែលត្រូវបំពេញ ដើម្បីធានាភាពសុខសាន្តជូនប្រជាពលរដ្ឋ និងធានាឲ្យបាននូវបរិយាកាសសន្តិសុខល្អប្រសើរ។ សម្ដេច បញ្ជាក់ទៀតថា៖ ដូចដែលយើង ទាំងអស់គ្នា បានដឹងពត៌មាន តាមរយៈបណ្ដាញសង្គម ឬតាមវេបសាយហើយថា ទណ្ឌិត សម រង្ស៉ី បានប្រកាសវិលចូលប្រទេសកម្ពុជា នៅថ្ងៃទី០៩ ខែវិច្ឆិកា ឆ្នាំ២០១៩ ក្នុងគោលបំណងកៀរគរកម្លាំងធ្វើរដ្ឋប្រហារខុសច្បាប់ ផ្តួលរំលំរាជរដ្ឋាភិបាលកម្ពុជាស្របច្បាប់ ដែលកើតចេញពីការបោះឆ្នោត។ ក្រោយប្រកាសវិលចូលប្រទេស ជនក្បត់ជាតិ និងបក្សពួករូបនេះ បានអំពាវនាវឱ្យកងទ័ពផ្តាច់ខ្លួនពីរាជរដ្ឋាភិបាល ទៅចុះចូលជាមួយខ្លួនដោយប្រកាសថានឹងផ្តល់ថវិកាលើកទឹកចិត្តដល់ពួកគេ មិនតែប៉ុណ្ណោះ មេដឹកនាំក្រុមឧទ្ទាមរូបនេះ ថែមទាំងអំពាវនាវប្រឆាំងរដ្ឋធម្មនុញ្ញដោយ បង្គាប់ឱ្យព្រះមហាក្សត្រ ដាក់រាជ្យ ដើម្បីរំលាយរបបរាជានិយមថែមទៀតផង។ សម្តេចពិជ័យសេនា ទៀ បាញ់ បានក្រើនរំលឹកថា៖ ដើម្បីសម្រេចបាននូវទស្សនទានចក្ខុវិស័យ និងទប់ស្កាត់បញ្ហាប្រឈមនានាខាងលើនេះ មេបញ្ជាការ មេបញ្ជាការរង និងនាយ ពលទាហាន កងពលតូចលេខ៧០ ត្រូវបន្តបេសកកម្មរបស់ខ្លួនតាមយុទ្ធសាស្រ្តសំខាន់ៗ ដូចខាងក្រោម៖ ត្រូវស្មោះត្រង់ដាច់ខាតចំពោះជាតិ សាសនា ព្រះមហាក្សត្រ និងការពាររដ្ឋធម្មនុញ្ញ ការពារព្រះមហាក្សត្រ ការពាររាជរដ្ឋាភិបាលស្របច្បាប់ ការពារសុខសន្តិភាព អធិបតេយ្យភាព បូរណភាពទឹកដីឲ្យបានស្ថិតស្ថេរ រឹងមាំជាអមតៈ។ ត្រូវអនុវត្តភារកិច្ចឲ្យសម្រេចជោគជ័យ តាមផែនការកំណែទម្រង់កងយោធពលខេមរភូមិន្ទ កម្មវិធីនយោបាយ យុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល និងផែនការយុទ្ធសាស្ត្រជាតិ ពិសេសបាវចនា២ អភិក្រមទាំង៩ និងអនុសាសន៍ទាំង១០ចំណុច របស់សម្តេចតេជោនាយករដ្ឋមន្ត្រី និងគោរពឲ្យបានម៉ឺងម៉ាត់ចំពោះច្បាប់ និងបទបញ្ជាទូទៅរបស់កងយោធពលខេមរភូមិន្ទ។ ជាមួយនេះដែរ ក៍ត្រូវយកចិត្តទុកដាក់អភិវឌ្ឍន៍ធនធានមនុស្ស ពង្រឹងសមត្ថភាព លើកកម្ពស់គុណភាពការងារ បណ្តុះបណ្តាលយោធិនបន្តវេន ការធ្វើទំនើបកម្ម ឧបករណ៍ សម្ភារៈ មធ្យោបាយ ដើម្បីត្រៀមខ្លួនអនុវត្តរាល់បទបញ្ជារបស់រាជរដ្ឋាភិបាល ក្រសួងការពារជាតិ អគ្គបញ្ជាការ កងទ័ពជើងគោក ឲ្យមានប្រសិទ្ធភាពខ្ពស់។ ត្រូវជំរុញការកសាងហេដ្ឋារចនាសម្ព័ន្ធ ការបង្កបង្កើនផល លើកកម្ពស់កំរិតជីវភាពរស់នៅរបស់កងទ័ព ចូលរួមសកម្មភាពមនុស្សធម៌ កិច្ចការសង្គម និងសង្គ្រោះគ្រោះមហន្តរាយ ឲ្យកាន់តែប្រសើរឡើងថែមទៀត ។ ទន្ទឹមនឹងនេះអស់លោកក៍ត្រូវធ្វើការផ្សព្វផ្សាយសភាពការណ៍ថ្មីៗ អប់រំនយោបាយសតិអារម្មណ៍ ដល់នាយទាហាន នាយទាហានរង និងពលទាហាន ឲ្យជាប់ជាប្រចាំ និងធ្វើការហ្វឹកហ្វឺន រំលឹកមេរៀន បណ្តុះបណ្តាលជំនាញ ទាំងនៅក្នុង និងក្រៅប្រទេស សំដៅពង្រឹងសមត្ថភាព សម្រាប់ចូលរួមបំពេញការងារជាមួយក្រសួង ស្ថាប័នពាក់ព័ន្ធ និងបំពេញបេសកកម្មជាលក្ខណៈអន្តរជាតិប្រកបដោយវិជ្ជាជីវៈ ។ សម្ដេចពិជ័យសេនា ទៀ បាញ់ ក៍បានរំលឹកដល់ថ្នាក់ដឹកនាំជា មេបញ្ជាការ មេបញ្ជាការរង និងនាយ ពលទាហាន ទាំងអស់ក្នុងកងពលតូចលេខ ៧០ ត្រូវយកចិត្តទុកដាក់គ្រប់គ្រង ប្រើប្រាស់ ថែរក្សា ជួសជុលសម្ភារៈយោធា ប្រកបដោយស្មារតីទទួលខុសត្រូវខ្ពស់ តាមលក្ខណៈបច្ចេកទេសបានកំណត់ និងត្រូវចាត់តាំងប្រើប្រាស់សម្ភារៈ ដែលទទួលបានពីរាជរដ្ឋាភិបាល ក្រសួងការពារជាតិ និងបណ្តាប្រទេសជាមិត្ត ឲ្យចំគោលដៅ មានតម្លាភាព ឆ្លើយតបទៅនឹងភារកិច្ចការពារជាតិ ការពារសន្តិសុខ និងសណ្តាប់ធ្នាប់ជូនប្រជាជន ។
សូមបញ្ជាក់ថា៖ នៅក្នុងពិធីរំលឹកខួបអនុស្សាវរីយ៍គំរប់ ២៥ ឆ្នាំ នៃថ្ងៃបង្កើតកងពលតូចលេខ ៧០ នេះដែរ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ រួមនិងឥស្សរជនជាន់ខ្ពស់ជាតិ អន្តរជាតិ ក៏បានទស្សនាពិធីក្បួនធ្វើព្យុះហយាត្រា ដែលបានបង្ហាញពីសកម្មភាពយ៉ាងស្វាហាប់អង់អាចក្លាហានរបស់ នាយទាហាន នាយទាហានរង និង ពលទហាន កងពលតូចលេខ ៧០ តាមផែនជំនាញនៃកងឯកភាព នីមួយៗផងដែល ។ តាមរយៈនៃក្បួនព្យុះហយាត្រា ដែលបង្ហាញដោយ នាយ ពលទាហានគ្រប់ជំនាញ របស់កងពលតូចលេខ ៧០ ក្នុងខួបគម្រប់ ២៥ ឆ្នាំនាឆ្នាំនេះ ត្រូវបានទទួលការលើកសរសើរថា កងយោធពលខេមរភូមិន្ទ ពីមួយថ្ងៃទៅមួយថ្ងៃ មានការវិវត្តក្នុងការកែទម្រង់កងកម្លាំង និងអង្គភាព ឲ្យក្លាយជាកងឯកភាពមានវិន័យ សីលធម៌ សណ្ដាប់ធ្នាប់ម៉ឺងម៉ាត់ ប្រកាន់ខ្ជាប់នូវសីលធម៌ គុណធម៌ សមត្ថភាពស្ទាត់ជំនាញ មានទឹកចិត្តស្មោះត្រង់ ដោយហ៊ានធ្វើពលីកម្មគ្រប់បែបយ៉ាងដើម្បីការពារបូរណភាពទឹកដី អធិបតេយ្យមាតុភូមិ ដោយឥតរាថយ ប្រកបដោយប្រសិទ្ធភាពនិងជោគជ័យជានិច្ច គ្រប់កាល:ទេស: ៕
