កងកម្លាំងមួកខៀវកម្ពុជា ត្រូវមានវិជ្ជាជីវជំនាញខ្ពស់ មានវិន័យម៉ឹងម៉ាត និងមានទំនាក់ទំនងល្អ រក្សាការពារសាមគ្គីភាពផ្ទៃក្នុងកងទ័ព និងបង្កើតស្មារតីសាមគ្គីភាពជិតស្និត ជាមួយកងកម្លាំងដែលមកពីប្រទេស ផ្សេងៗ ព្រមទាំងប្រជាពលរដ្ឋនៅមូលដ្ឋាន ។ នេះជាប្រសាសន៍ផ្តាំផ្ញើររបស់ឯកឧត្តម ប្រាក់ សុខុន រដ្ឋមន្រ្តីក្រសួង ប្រៃណីយ៍ និងទូរគមនាគមន៍ និងជាប្រធានគណៈកម្មាធិការជាតិសម្របសម្រួលកិច្ចការបញ្ជូនកងកម្លាំងចេញ បំពេញបេសកកម្មរក្សាសន្តិភាពរបង់អង្គការសហប្រជាជាតិ ក្នុងពិធីជូនដំណើរកងកម្លំាងរក្សាសន្តិភាពទៅចូលរួម ធ្វើលំហាត់ហ្វឹកហ្វឺន KERIS AMAN15 នៅសាធារណរដ្ឋម៉ាឡេស៊ី ចំនួន ៤១ នាក់ ក្នុងនោះមាននារីចំនួន ៤ នាក់ កាលពីថ្ងៃទី ៩ ខែ សីហា ឆ្នាំ២០១៥ ។
អញ្ជើញចូលរួមជូនដំណើរនោះក៏មានវត្តមាន ឯកឧត្តម នាយឧត្តមសេនីយ៍ សែម សុវណ្ណនី អគ្គនាយក មជ្ឈមណ្ឌលជាតិ គ្រប់គ្រងកងកម្លាំងរក្សាសន្តិភាព បោសសំអាតមីន និងកាកសំណល់សង្រ្គាម ព្រមទាំងឯកឧត្តម ឧត្តមសេនីយ៍ អគ្គនាយករង នាយក នាយករង ចំណុះមជ្ឈមណ្ឌលជាតិ និងភ្ញៀវជាតិជាច្រើនបានចូលរួម ។
ថ្លែងក្នុងពិធីនោះ ឯកឧត្តម ប្រាក់ សុខុន បានផ្តាំផ្ញើរដល់កងកម្លាំងទាំងអស់ ដែលចូលរួមធ្វើលំហាត់ ហ្វឹកហ្វឺន ត្រូវយកចិត្តទុកដាក់ក្រេបជញ្ជក់រៀនសូត្រ ដកពិសោធន៍គ្រប់មុខជំនាញបច្ចេកទេស ពីកងកម្លាំងបណ្តា ប្រទេសដែលចូលរួមធ្វើលំហាត់ ។ ការរៀនសូត្រនេះ គឺមានផលប្រយោជន៍ជាច្រើនសម្រាប់កងកម្លាំងទាំងអស់ នៅពេលចេញបំពេញបេសកកម្មរក្សាសន្តិភាពរបស់អង្គការសហប្រជាជាតិ នៅបណ្តាប្រទេសលើសកលលោក ទៅដល់ប្រទេសណាក៏យើងមានជំនាញច្បាស់លាស់ ដើម្បីអនុវត្តន៍ដោយទទួលបានជោគជ័យ ។ កន្លងមក កងកម្លំាងយើងក៏ធ្លាប់បានចេញទៅចូលរួមធ្វើលំហាត់នៅបណ្តាប្រទេសដូចជា នៅប្រទេសអូស្រ្តាលី ប្រទេស បង់ក្លាដេស ឥណ្ឌូនេស៊ី ម៉ាឡេស៊ី ម៉ុងហ្គោលី ព្រះរាជាណាចក្រថៃ សហរដ្ឋអាមេរិក និងនេប៉ាល់ ។ ឯកឧត្តម បានបន្តថា កងកម្លាំងរក្សាសន្តិភាពយើងបានចូលរួមក្នុងបេសកកម្មរក្សាសន្តិភាព អ.ស.ប នៅបណ្តាប្រទេស ហើយក៏ទទួលបានចំណាត់ថ្នាក់លេខ ៣៦ លើ ១២២ ប្រទេស បច្ចុប្បន្នមានប្រទេសខ្លះដេលជារៀមច្បង របស់យើងមករៀនសូត្រ ដកបទពិសោធន៏ពីកម្ពុជាទៅវិញ ។
ឯកឧត្តមក៏បានរំលឹកដល់កងកម្លាំងទាំងអស់ត្រូវពង្រឹង នូវវិជ្ជាជីវអោយបានច្បាស់លាស់ពិតប្រាកដ ពិសេសជំនាញដោះមីន គឺសំខាន់ណាស់បើគ្មានជំនាញច្បាស់លាស់នឹងទទួលគ្រោះថ្នាក់ ។ កន្លងមកលើសកល លោក គេបានលើកសរសើដល់កងកម្លាំងកម្ពុជាលើវិស័យបោសសំអាតមីននេះ ។ ចំពោះវិន័យត្រូវរក្សាអោយបាន ម៉ឹងម៉ាត កងកម្លាំងយើងទៅចូលរួមធ្វើលំហាត់ ហេតុនេះកុំដើរហើរសេរី សេពគ្រឿងស្រវឹង ដែលអាចធ្វើអោយខូច កេរ្តិ៍ឈ្មោះរបស់ខ.ភ.ម ហើយកុំទទួលរាល់បញ្ញើររបស់អ្នកដទៃ ព្រោះការពារបញ្ញើរនោះគេបង្កប់នូវគ្រឿងញៀន ដែលអាចនាំដល់គ្រោះថ្នាក់ ព្រោះនៅប្រទេសម៉ាឡេស៊ី ឥណ្ឌូនេស៊ី អនុវត្តន៍ច្បាប់ប្រឆំាងនឹងគ្រឿងញៀននេះតឹង តែងណាស់ បើចាប់បានគឺព្យួករហើយ ។ ហេតុនេះស្នើដល់កងកម្លំាងទាំងអស់ត្រូវរក្សាកិត្តិយសថ្លៃថ្នូរ កសាងកេរ្តិ៍ ឈ្មោះជូនជាតិមាតុភូមិ ។ កងកម្លាំងមួកខៀវត្រូវមានទំនាក់ទំនងល្អ រក្សាការសាមគ្គីភាពផ្ទៃក្នុងកងទ័ព និងបង្កើត ស្មារតីសាមគ្គីភាពជិតស្និតជាមួយកងកម្លាំងដែលមកពីប្រទេសផ្សេងៗ ព្រមទាំងប្រជាពលរដ្ឋនៅមូលដ្ឋាន៕
