ក្នុងជំនួបសន្ទនារវាងឯកឧត្តម ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការជាតិ ជាមួយប្រតិភូកងទ័ពជើងគោកម៉ាឡេស៊ី ដឹកនាំដោយ ឯកឧត្តម នាយឧត្តមសេនីយ៍ តាន់ស្រ៊ីរ៉ាចាម៉ូហាម៉េតអាហ្វាឌីប៊ីនរ៉ាចាម៉ូហាម៉េត ន័រ មេបញ្ជាការកងទ័ពជើងគោកម៉ាឡេស៊ី នៅថ្ងៃទី 11 ខែ សីហា ឆ្នាំ 2015 ឯកឧត្តម មេបញ្ជាការកងទ័ពជើងគោកម៉ាឡេស៊ី បានជំរាបជូន ឯកឧត្តម ទៀ បាញ់ អំពីការរីកចំរើនខាងផ្នែកឧស្សាហកម្មយោធាម៉ាឡេស៊ី ដើម្បីរិះរកវិធីសហការគ្នាអោយបានល្អជាមួយកម្ពុជា ។ ទាក់ទងទៅនឹងការលើកឡើងរបស់ប្រិភូកងទ័ពជើងគោកម៉ាឡេស៊ីនេះ ឯកឧត្តម ទៀ បាញ់ បានបញ្ជាក់ថាៈ វិស័យឧស្សាហកម្មយោធានេះ កន្លងមកធ្លាប់បានពិភាក្សាគ្នាច្រើនដងហើយ នៅក្នុងកិច្ចប្រជុំរដ្ឋមន្រ្តីការពារជាតិអាស៊ាន ADMM ហើយក្រសួងការពារជាតិកម្ពុជាក៏ធ្លាប់ បានចាត់បញ្ជូននាយទាហាន ក្នុងអគ្គនាយកដ្ឋានសំភារៈបច្ចេកទេស ជួបពិភាក្សាគ្នា ជាមួយម៉ាឡេស៊ី ដើម្បីពិភាក្សារកលទ្ធភាពអភិវឌ្ឍន៍រួមគ្នាដែរ ។
ឯកឧត្តម ទៀ បាញ់ បានជំរាបជូនប្រតិភូថា កម្ពុជាមានលទ្ធភាពតិចតួចលើវិស័យនេះ តែក៏មិនបោះបង់ចោលនូវដំណើរ ការនេះដែរ ។ ឯកឧត្តមបានបន្តថា កម្ពុជាចង់ឲ្យមានរោងជាងជួសជុលសំភារៈសឹកនៅកម្ពុជា ដើម្បីថែទាំនូវសំភារៈផ្សេងៗដែល មានស្រាប់ សំរាប់បំរើឲ្យវិស័យការពារជាតិកម្ពុជា ។
ឯកឧត្តម ទៀ បាញ់ បានសង្កត់ធ្ងន់ថាៈ កម្ពុជា និងម៉ាឡេស៊ីត្រូវពិភាក្សាគ្នារិះរក នូវអ្វីដែលលេចធ្លោសំរាប់ទំនាក់ទំនង កិច្ចសហប្រតិបត្តិការ រវាងកងទ័ពទាំងពីរ ។ តាមរយៈគណៈប្រតិភូ ឯកឧត្តម ទៀ បាញ់ បានបញ្ជាក់ថា៖ ឯកឧត្តមនឹងដឹកនាំគណៈ ប្រតិភូក្រសួងការពារជាតិកម្ពុជា ទៅចូលរួមកិច្ចប្រជុំរដ្ឋមន្រ្តីការពារជាតិអាស៊ានក្រៅផ្លូវការ និងកិច្ចប្រជុំរដ្ឋមន្រ្តីការពារជាតិអាស៊ាន បូក នៅប្រទេសម៉ាឡេស៊ីនាដើម ខែវិច្ឆិកា ឆ្នាំ 2015 ខាងមុខនេះ ។ ជាចុងក្រោយ ឯកឧត្តម មេបញ្ជាការកងទ័ពជើងគោកម៉ាឡេស៊ីបានបញ្ជាក់ថា៖តាមរយៈការបណ្តុះបណ្តាលសិក្ខាកាម ការផ្លាស់ប្តូរទស្សនៈ កិច្ចគ្នាទៅវិញទៅមក និងការទំនាក់ទំនងគ្នា ជាប់ជាប្រចាំនោះ បានធ្វើអោយប្រទេស ទាំងពីរធ្វើដំណើររួមគ្នា ប្រកបដោយផ្លែផ្កាទៅថ្ងៃអនាគត ។
