ព័ត៌មាន

សម្តេច​ពិជ័យ​សេនា​ ទៀ បាញ់ ​ជួប​​ឯកឧត្ត​ម​ John​ Sa​n​de​rson​ អតីត​មេ​ប​ញ្ជា​ការ ​UNTAC​
នាយកដ្ឋានព័ត៌មាន(៣)
67
2836 សម្តេច​ពិជ័យ​សេនា​ ទៀ បាញ់ ​ជួប​​ឯកឧត្ត​ម​ John​ Sa​n​de​rson​ អតីត​មេ​ប​ញ្ជា​ការ ​UNTAC​

       នា​រសៀល​ថ្ងៃ​ទី​២៨ ​​ខែ​មេសា ​ឆ្នាំ​២០២២ ​នៅ​ទីស្តីការ​ក្រសួង​ការ​ពារ​ជាតិ​ សម្តេច​ពិជ័យ​សេនា​ ទៀ បាញ់ ​ឧបនាយក​រដ្ឋមន្ត្រី ​រដ្ឋមន្ត្រី​ក្រសួង​ការ​ពារ​ជាតិ​ បាន​ទទួល​ជួប​សំណេះ​សំណាល​ជា​មួយ ​ឧត្តម​សេនីយ៍​ឯក​ ចន​ សាន់​ឌឺ​សុន​ (John Sanderson) អតីត​មេ​បញ្ជាការ​កង​កម្លាំង​ នៃ​អាជ្ញាធរ​បណ្តោះ​អាសន្ន​ អង្គការ​សហ​ប្រជា​ជាតិ​ប្រចាំ​នៅ​កម្ពុជា ​ហៅ​កាត់​​ថា ​អ៊ុន​តាក់​(​UNTAC) ដែល​កំពុង​បំពេញ​ទស្សនកិច្ច​ នៅ​កម្ពុជា​។

​ សម្តេច​ពិជ័យ​សេនា​ ទៀ បាញ់ ​ឧបនាយក​រដ្ឋមន្ត្រី ​រដ្ឋមន្ត្រី​ក្រសួង​ការ​ពារ​ជាតិ​  និង​ឧត្តម​សេនីយ៍​ឯក​ ចន​ សាន់​ឌឺ​សុន​ (John Sanderson) អតីត​មេ​បញ្ជាការ​កង​កម្លាំង​ នៃ​អាជ្ញាធរ​បណ្តោះ​អាសន្ន​ អង្គការ​សហ​ប្រជា​ជាតិ​ប្រចាំ​នៅ​កម្ពុជា ​ហៅ​កាត់​​ថា ​អ៊ុន​តាក់​(​UNTAC) 


        ក្នុង​ជំនួប​នេះ​ ឯកឧត្តម John Sanderson បា​ន​ថ្លែង​អំណរគុណ​ដល់​ សម្តេច​ពិជ័យ ដែល​​បាន​អនុញ្ញាត្តឲ្យ​ឯកឧត្តម​ ចូល​ជួប​សំណេះ​សំណាល​នា​ពេល​នេះ​។ ​ឯ.ឧ​ ក៏​បាន​សម្តែង​នូវ​ក្តី​រីក​រាយ​ ដែល​មាន​ឱកាស ​មក​ បំពេញ​ទស្សន​កិច្ច​នៅ​កម្ពុជា​ក្នុង​ពេល​នេះ ​ហើយ​ដោយ​ធ្លាប់​បាន​រ​ស់​នៅ ​និង​បំពេញ​ការងារ​នៅ​កម្ពុជា​ ក្នុង​សម័យ​កាល​អ៊ុន​តាក់​។ ឯកឧត្តម​ បាន​កត់​សម្គាល់​ឃើញ​ថា៖​ បន្ទាប់​ពី​រយៈ​ពេល ​៣០​ឆ្នាំ​កន្លង​​ដែល ​ឯ.ឧ​បាន​មក​បំពេញ​បេសក​កម្ម​ ជា​អាជ្ញាធរ​បណ្តោះ​អាសន្ន​ នៃ​អង្គការ​សហប្រជាជា​តិ​ប្រចាំ​នៅ​កម្ពុជា​ គឺ​កម្ពុជា​បច្ចុប្បន្ន​មាន​ការ​អភិវឌ្ឍន៏​រីក​ចំរើន​លើ​គ្រប់​វិស័យ​ ពិសេស​ការ​កសាង​ហេដ្ឋារ​ចនា​​សម្ព័ន្ធ​នានា​។ ឯ.ឧ ​បាន​បញ្ជាក់​ថា៖ ​នេះ​គឺ​ដោយ​សារ​កត្តា​សំខាន់​នៃ​សន្តិភាព ​និង​ស្ថិរភាព ​ដែល​ជា​កត្តា​នាំ​ឱ្យ​មាន​ ការ​អភិវឌ្ឍ​រីក​ចម្រើន​ដ៏​ឆាប់​រហ័ស​របស់​ប្រទេស​កម្ពុជា ​ដូច​សព្វ​ថ្ងៃ​នេះ​។ ឯ.ឧ ​John Sanderson ក៏​បាន​បញ្ជាក់​ផង​ដែរ​ថា៖ ​ការ​ដែល ​ឯ.ឧ ​មក​បំពេញ​ទស្សន​កិច្ច​នា​ពេល​នេះ​ គឺ ​ដើម្បី​អបអរ​ខួបទី​ ៣០​ឆ្នាំ ​នៃ​អ៊ុន​តាក់​ និង​ជា​ផ្នែក​មួយ​នៃ​ការ​អបអរ​សាទរ​ខួប​ទី ​៧០​ឆ្នាំ​ នៃ​ទំនាក់​ទំនង​ការ​ទូត​រវាង​កម្ពុជា ​និង​អូស្ត្រាលី​ផង​ដែរ​។

       មា​ន​ប្រសាសន៏​ក្នុង​ឱកា​ស​នោះ ​សម្តេច​ពិជ័យ​សេនា​ ទៀ បាញ់​ ក៏​បាន​សម្តែង​ការ​អរគុណ​ ចំពោះ​រាជ​រដ្ឋា​ភិបាល​ ប្រជា​ជ​ន និង​កង​ទ័ព​អូស្ត្រាលី ​ដែល​តែង​បា​នជួយ​ឧបត្ថម្ភ​គាំទ្រ​កម្ពុ​ជា​រហូត​មក​ និង​បាន​ខិ​ត​ខំ​ពង្រឹង​ និង​ពង្រីក​កិច្ច​សហប្រតិបត្តិការ​ល្អ​លើ​គ្រប់​វិស័យ ​រួម​ទាំង​វិស័យ​ការ​ពារ​ជាតិ​ផង​ដែរ​។ ក្នុ​ងនោះ​ចំពោះ ​ខ.ភ.ម កង​ទ័ព​អូស្ត្រា​លី​បាន​ជួយ​កសាង​សៀវ​ភៅស​ ការ​ពារ​ជាតិ​​, ជួយ​បណ្តុះ​បណ្តាល​នាយ​ទាហាន​សិក្សា​ភាសា​អង់​គ្លេស​, ​ជួយ​កសាង​មជ្ឍមណ្ឌល​ហ្វឹក​ហ្វឺន​កង​ទ័ព​ជើង​គោក​, ជួយ​កសាង​រោង​ជាង​ជួស​ជុល​កង​ទ័ព​ជើង​ទឹក​ជា​ដើម​។ សម្តេច​ពិជ័យ​សេនា​ និង​បាន​សម្តែង​អំណរ​គុណ​ដល់​កង​កំលាំង ​UNTAC ដែល​បាន​ស្វែង​រក​សន្តិភាព​ និង​ការ​បង្រួប​បង្រួម​នៅ​កម្ពុជា​ ហើយ​ក៏​បាន​រៀប​ចំ​ឲ្យ​មាន​ ការ​បោះ​ឆ្នោត​ បង្កើត​បាន​ជា​រដ្ឋ​ធម្មនុញ្ញ​ និ​ង​រាជ​រដ្ឋាភិបាល​មួយ​ដ៏​ស្រប​ច្បាប់​ទៀត​ផង​។ សម្តេច​ពិជ័យ​សេនា ​បាន​បន្តថា​៖ ​ដោយ​មើល​ឃើញ​គំរូ​របស់​កំលាំង ​UNTAC ​ទើប​បច្ចុប្បន្ន​ ខ.ភ.ម​ ក៏​បាន​ក្លាយ​ខ្លួន​ទៅ​ជា​កង​កំលាំង​រក្សា​សន្តិភាព​របស់​អង្គការសហ​ប្រ​ជា​ជាតិ​ នៅ​តាម​បណ្តា​ប្រទេស​នានា ​ដែល​កំពុង​មាន​ជម្លោះ​ផង​ដែរ​។ សម្តេច​ពិជ័យ​សេនា ​ទៀ បា​ញ់ ​ក៏បា​ន​សម្តែង​ការ​គាំទ្រ​ចំពោះ​ទស្សនៈ​របស់​ ឯកឧត្តម John Sanderson អំពី​សារៈ​សំខាន់​ នៃ​សុខ​សន្តិភាព​ និង​ស្ថិរភាព​ ដែ​ល​ជា​កត្តា​មិ​នអាច​ខ្វះ​បាន​សម្រាប់​ វឌ្ឍនភាព​កាន់​តែ​រុង​រឿង​របស់​កម្ពុ​ជាបន្ត​ទៅ​មុខ​ទៀត​។ ​សម្តេច​សង្ឃឹម​ថា៖ ​កិច្ច​សហប្រតិបត្តិការ​ រវាង​រាជ​រដ្ឋាភិបាល​ និង​កង​ទ័ព​អូស្រ្តាលី​ និង​កម្ពុជា ​នូវ​តែ​ប​ន្ត​ពង្រីក ពង្រឹង​ជា​រៀង​រហូត ​៕


អត្ថបទថ្មីៗ

សេចក្តីប្រកាស

សារជូនពរ

វីដេអូ