គ្រូពេទ្យកងទ័ពមិត្តភាពកម្ពុជា-វៀតណាម ព្យាបាលជំងឺ ដោយឥតគិតថ្លៃ ជូនដល់ប្រជាពលរដ្ឋរស់នៅតាមព្រំដែនកម្ពុជា-វៀតណាម ក្នុងខេត្តត្បូងឃ្មុំ និងប៊ិញភឿ
ក្រុមគ្រូពេទ្យ កងទ័ពមិត្តភាពកម្ពុជា-វៀតណាម នៅថ្ងៃទី០៩ ខែឧសភា ឆ្នាំ២០២២ បានដំណើរការពិនិត្យ និងព្យាបាលជំងឺជូនដល់ប្រជាពលរដ្ឋនៅតាមតំបន់ព្រំដែន កម្ពុជា-វៀតណាម ក្នុងខេត្តត្បូងឃ្មុំ ដោយឥតគិតថ្លៃ ដើម្បីអបអរសារទរពិធីជំនួបប្រាស្រ័យមិត្តភាពការពារជាតិ ព្រំដែនគោក កម្ពុជា-វៀតណាម ថ្នាក់រដ្ឋមន្ត្រីការពារជាតិលើកទី១ និងកិច្ចសន្ទនាគោលនយោបាយការពារជាតិ កម្ពុជា-វៀតណាម ថ្នាក់អនុរដ្ឋមន្រ្តីការពារជាតិលើកទី ៥។ ក្នុងដំណើរការពិនិត្យ និងព្យាបាលជំងឺជូនដល់ប្រជាពលរដ្ឋ តាមតំបន់ព្រំដែន កម្ពុជា-វៀតណាម នាពេលនោះ បានប្រព្រឹត្តទៅនៅក្នុងសាលាបឋមសិក្សា ប៊ុនរ៉ានី ហ៊ុន សែន កោះថ្ម ក្នុងឃុំទន្លូង ស្រុកមេមុត ខេត្តត្បូងឃ្មុំ។ ក្រុមគ្រូពេទ្យ ខភម បានដឹកនាំដោយ លោកឧត្តមសេនីយ៍ត្រី សេង ឈុន នាយករង មន្ទីរពេទ្យព្រះកេតុមាលា ដោយមានការចូលរួមពី លោកគ្រូពេទ្យ អ្នកគ្រូពេទ្យ វេជ្ជបណ្ឌិត ចំនួន ៨០នាក់ និងគ្រូពេទ្យកងទ័ពប្រជាជនវៀតណាម ចំនួន ៨០នាក់ ដឹកនាំដោយ វរសេនីយ៍ឯក ង្វៀន វិនយ៉ាង នាយករង នាយកដ្ឋានសុខាភិបាល និងអគ្គភស្តុភារ ហិរញ្ញវត្ថុ និងលោកវរសេនីយ៍ឯក ប៊ូយ ថាញ់ហាយ នាយរងការិយាល័យ សេនាធិការផែនការ។
សូមបញ្ជាក់ថា៖ ក្រុមគ្រូពេទ្យ កងទ័ពមិត្តភាពកម្ពុជា វៀតណាម នឹងពិនិត្យព្យាបាលជំងឺជូនដល់ប្រជាពលរដ្ឋកម្ពុជា នៅតាមតំបន់ព្រំដែន កម្ពុជា-វៀតណាម ក្នុងខេត្តត្បូងឃ្មុំចាប់ពីថ្ងៃទី០៩ ដល់ថ្ងៃទី១០ ខែឧសភា ឆ្នាំ២០២២ ហើយនៅថ្ងៃទី១១-១២ ខែឧសភា លោកគ្រូពេទ្យ អ្នកគ្រូពេទ្យ មន្ទីរពេទ្យ ព្រះកេតុមាលា ទាំង ៨០ នាក់ រួមជាគ្រូពេទ្យកងទ័ពប្រជាជនវៀតណាមចំនួន ៨០ នាក់ នឹងចូលទៅពិនិត្យព្យាបាលជំងឺដល់ប្រជាពលរដ្ឋវៀតណាមរស់នៅ តាមបណ្តោយព្រំដែន វៀតណាម កម្ពុជា ក្នុងស្រុក ឡុកនិញ ខេត្តប៊ិញភឿក វិញ។
លោកឧត្តមសេនីយ៍ត្រី សេង ឈុន នាយករង មន្ទីរពេទ្យ ព្រះកេតុមាលា បានអោយដឹងថា៖ នៅក្នុងថ្ងៃព្យាបាលដំបូងក្រុមពេទ្យកងទ័ពមិត្តភាពកម្ពុជា វៀតណាម បានយកសំណាក ធ្វើតេសរហ័ស រកជំងឺកូវីដ-១៩ បានចំនួន ៤៧៩នាក់ លទ្ធផល អវិជ្ជមាន ទាំងអស់ ហើយក្នុងថ្ងៃទី០៩ ឧសភា បានពិនិត្យព្យាបាលជូនប្រជាពលរដ្ឋ បានចំនួន ៦៧៨ នាក់ ៕
