ព័ត៌មាន

រដ្ឋ​មន្ត្រី​ក្រសួង​ការ​ពារ​ប្រទេស​វៀតណា​ម ​សួរ​សុខ​ទុក្ខ​ និង​ចែកអំណោយ​ដល់​សិស្សានុ​សិស្ស ​នៅសាលា​បឋម​សិក្សា ​ហ៊ុន ​សែន​ ២​​ធ្នូ ឃុំ​២​ធ្នូ ស្រុក​ស្នួល​ ខេត្ត​ក្រចេះ​
នាយកដ្ឋានព័ត៌មាន(៣)
31
2860 រដ្ឋ​មន្ត្រី​ក្រសួង​ការ​ពារ​ប្រទេស​វៀតណា​ម ​សួរ​សុខ​ទុក្ខ​ និង​ចែកអំណោយ​ដល់​សិស្សានុ​សិស្ស ​នៅសាលា​បឋម​សិក្សា ​ហ៊ុន ​សែន​ ២​​ធ្នូ ឃុំ​២​ធ្នូ ស្រុក​ស្នួល​ ខេត្ត​ក្រចេះ​

       កាល​ពីថ្ងៃ​ ទី​១៥​ ខែ​ឧសភា ​ឆ្នាំ​២០២២ ​កន្លង​ទៅ​នេះ មុននឹង​ប្រារព្ធពិ​ធីជួប​ប្រាស្រ័យ​មិត្តភាព​ការ​ពារ​ជាតិព្រំដែន​គោក​ ​កម្ពុជា វៀតណាម ថ្នាក់​រដ្ឋមន្ត្រីការពារ​ជាតិ​ លើក​ទី​១ ​រវាង​ សម្ដេចពិជ័យសេនា ទៀ បាញ់ ឧបនាយក​រដ្ឋមន្ត្រី រដ្ឋមន្ត្រី​ក្រសួង​ការពា​រជា​តិ និង នាយឧត្តមសេនីយ៍ ហ្វាន វ៉ាន់ហ្សាង រដ្ឋមន្ត្រី​ក្រសួង​ការពារប្រទេសវៀត​ណាម​ ប្រតិភូ​ក្រសួង​ការ​ពារ​ប្រទេស​វៀត​ណាម​ ដឹក​នាំ​ដោយ ​នាយ​ឧត្តមសេនីយ៍ ​ហ្វាន វ៉ាន់ហ្សាង បាន​អញ្ជើញ​ទៅ​សួរ​សុខទុក្ខ និងចែក​អំណោយដល់ សិស្សានុសិស្ស ​នៅសាលា​បឋម​សិក្សា ហ៊ុន សែន ២ ធ្នូ ស្ថិតនៅ ឃុំ ២ ធ្នូ ស្រុកស្នួល ខេត្តក្រចេះ។

         ក្នុងឱកាស​នោះ ​លោក ហ៊ ហុងហាវ នាយក​សាលាបឋម​សិក្សា ហ៊ុន សែន ២ធ្នូ បានជំរា​បជូនអំពីប្រវត្តិសង្ខេប​សាលា​បឋមសិក្សា ហ៊ុន សែន ២ធ្នូ ដោយបាន​បញ្ជាក់ថា៖ សាលាបឋម​សិក្សា ហ៊ុន សែន ២ធ្នូ ស្ថិតនៅ ក្នុងភូមិ​ជើង​​ឃ្លូ ឃុំ២ធ្នូ ស្រុកស្នួល ខេត្តក្រចេះ។ សាលា​បឋមសិក្សានេះសាង​សង់ឡើងនៅ​ឆ្នាំ​១៩៨០ ដល់ឆ្នាំ១៩៨៩​ ដែល​មានអគារសិក្សា​ចំនួន​០២​ ខ្នងស្មើ​នឹង​០៤ បន្ទប់ សង់អំពីឈើ​ប្រក់​ស្លឹកទ្រាំង ជញ្ជាំងបន្ទាំ​ឫស្សី កសាង ដោយ​គណៈកម្មាធិការ​ប្រជាជន​បដិវត្តន៍ឃុំ២ធ្នូ ដែលមានទីតាំង​​ស្ថិតក្នុងបរិវេណ វត្ត ២ធ្នូ គ្រប់​គ្រង ដោយលោក ហែ​ម ឈីន។ នៅឆ្នាំ១៩៨៩ ដល់ ឆ្នាំ១៩៩៥ អគារសិក្សា​ចំនួន ០២ខ្នង ស្មើ ០៤បន្ទប់នេះ មានសភាព​ចាស់​ ទ្រុឌទ្រោ​មខ្លាំង ​ទើបគណៈកម្មាធិការ​ប្រជាជន​បដិវត្តន៍ ឃុំ២ធ្នូ ឯកភាព​ធ្វើការរុះរើ​អគារ​ និងបាន​សាង​សង់​អគារ​សិក្សាថ្មីជំនួសវិញ ០១​ខ្នង​ ស្មើនឹង​ ០៣​បន្ទប់សង់អំពី​ឈើ​ប្រក់ក្បឿង ជញ្ជាំងក្តារ កសាង ដោយគណៈកម្មាធិការ​ប្រជាជន​បដិវត្តន៍​ឃុំ២ធ្នូ ​ស្រុកស្នួល ខេត្តក្រចេះ​។ ជាភ័ព្វសំណាង​នៅក្នុងឆ្នាំ១៩៩៨- សាលា​បឋម​សិក្សា២ធ្នូបាន​សាង​សង់​អគារសិក្សា​ថ្មី ចំនួន០១ខ្នង​ស្មើ០៥​បន្ទប​ ធ្វើអំពីថ្ម ប្រក់ក្បឿង ដែលមានទំហំ ​បណ្ដោយ​៤០ ​ម៉ែត្រ និងទទឹង ៨ម៉ែត្រ ជាអំណោយ​ដ៏​ថ្លៃថ្លារប​ស់​ សម្តេច​តេជោ ហ៊ុន សែន នាយក​រដ្ឋ​មន្ត្រីនៃ​ព្រះ​រាជាណាចក្រ​កម្ពុជា​។ សាលា​នេះបានប្តូរ​ទីតាំង​ថ្មីសង់លើទំហំ​ដី​ប្រមាណ ៣ ហិចតា ជាដី បម្រុង ឃុំ២ធ្នូ ហើយសាលា​បឋមសិក្សា០២ធ្នូ បានប្តូរឈ្មោះមក ជាសាលាបឋម​សិក្សាហ៊ុន សែន ២ធ្នូ វិញ។ បច្ចុប្បន្ន សាលា​បឋម​សិក្សានេះ មានសិស្ស​កំពុង​សិក្សា​សរុបចំនួន ៣៧៤នាក់ ស្រី១៨០ នាក់ ស្មើនឹង ១១ បន្ទប់។ ជា​​លទ្ធផលសិក្សា ឆ្នាំ​២០២០-២០២១ ចំនួន​សិស្សជាប់​មធ្យមភាគ ៧០% ធ្លាក់ ៣០% បោះបង់ ០%។ ក្នុងនាមលោក​គ្រូ អ្នកគ្រូ សិស្សានុសិស្ស នៃសាលាបឋមសិក្សា ហ៊ុន សែន ២ធ្នូ បងប្អូនប្រជាពលរដ្ឋ​រស់នៅក្នុងភូមិ​ជើង​ ឃុំ ២ធ្នូ ស្រុកស្នួល ខេត្តក្រចេះ លោក ហ៊ ហុងហាវ នាយកសាលា​បឋមសិក្សា ហ៊ុន សែន ២ធ្នូ បានគោរពថ្លែ​ង​អំណរគុណ​យ៉ាងជ្រាលជ្រៅ​​ចំពោះ សម្តេចពិជ័យសេនា ទៀ បាញ់ ឧបនាយករដ្ឋ​មន្ត្រី រដ្ឋមន្រ្តី​ក្រសួង​ការពារ​ជាតិ ​ដែលបានផ្តល់អគារ​សិក្សាថ្មីចំនួន​ ០១ខ្នង ស្មើនឹង ០៦បន្ទប់ ដល់សាលា បឋមសិក្សា ហ៊ុន សែន ២ធ្នូ និង នាយ​ឧត្តម​​សេនីយ៍ ហ្វាន ​វ៉ាន់ហ្ស៊ាង រដ្ឋមន្ត្រីក្រសួង​ការពារប្រទេស​វៀត​ណាម​ ដែល​បាន​ផ្ត​ល់ថវិកា​ សម្ភារៈសិក្សា ថែបប្លែប និងការឧបត្ថម្ភ​ដល់​សិស្សានុ​សិស្ស ក្រីក្រសម្រាប់​ការ​បន្ត​ការ​សិក្សា​ជូន​ដល់​សាលា​បឋម​សិក្សាហ៊ុន​សែន​ ២ធ្នូ និង បានថ្លែង​អំណរគុណ​ដល់​ក្រុម​ហ៊ុន​ទូរស័ព្ទ​មិត្ត​ហ្វូន​ ដែល​បានផ្ដល់ស៊ីម​កាត​ចំនួន​ ២០០ បន្ទះដ​ល់​សាលា​បឋម​សិក្សា ហ៊ុន សែន ២ធ្នូ ថែមទៀត​។ លោកនាយក​សាលាបា​ន​ចាត់​ទុក​អំណោយ​នេះ​ ជាសមិទ្ធផល ដ៏ថ្លៃថ្លានិង មានតម្លៃបំផុត សម្រាប់ រួមចំណែក​យ៉ាង​សំខាន់​ ក្នុងការអភិវឌ្ឍធន​ធាន​មនុស្ស​ក្នុង​សហគមន៍ កាន់តែមាន​សមត្ថភាព និងរីក​ចម្រើន​ថែម​ទៀត​។

        ថ្លែងទៅកាន់ សិស្សានុសិស្ស នៅសាលា​បឋមសិក្សា ហ៊ុន សែន ២ ធ្នូ នាយឧត្តមសេនីយ៍ ហ្វាន វ៉ាន់ហ្សាង រដ្ឋមន្ត្រី​ក្រសួង​ការពា​រ​ប្រទេស​វៀត​ណាម​ បាន​សំ​ដែងនូវក្ដីសោមនស្សរី​​ករាយ​ចំពោះ​ល​ទ្ធផល ដែលថ្នាក់ដឹក​នាំសាលាទទួលបា​ន​ក្នុ​ងកិច្ចការបង្ហាត់​បង្រៀន​សិស្សានុសិស្ស​ឱ្យ​ទទួល​បា​ននិទ្ទេស​ល្​អ។ ឯកឧត្តម បាន​សំដែងនូវ​ក្តី​សប្បាយរីក​រាយ ដោយបាន​ដឹងថា ក្នុងស្ថានភាព​ជំងឺ​រាតត្បាត​កូវីដ-១៩ដ៏​ស្មុគ​ស្មាញ​កន្លង​ម​ក លោកគ្រូ អ្នកគ្រូបាន ពុះពារជម្នះ​ឧបសគ្គ ក្នុងការ​បង្ហាត់​បង្រៀន និងដឹកនាំ​សិស្សានុសិស្ស​ឱ្យបន្តខិត​ខំ​រៀន​សូត្រ​។ ឯកឧត្តម រដ្ឋមន្ត្រីក្រសួង​ការពារ​ប្រទេស​វៀតណាម បានសង្កត់​ធ្ងន់ថា៖ វៀតណាម និងកម្ពុជាជា​ប្រទេសជិតខាង​គ្នា ភ្នំជាប់ភ្នំ ទន្លេជាប់ទន្លេ ពិសា​ទឹកទន្លេ​មេគង្គរួ​ម​គ្នា​។ ប្រជាជាតិទាំង​ពីរមា​នទំនាក់​ទំនង​នឹងគ្នាយ៉ាងជិតស្និទ្ធ សាមគ្គី​ជា​ប្រពៃណីជាយូរ​លង់​ណាស់​មក​ហើ​យ។ ក្នុងដំណាក់​កាល​ប្រយុទ្ធ​តស៊ូ ដើម្បីដណ្ដើម​យក​ឯករាជ្យ ពីអតីតកាល​ ក៏​ដូចជាក្នុ​ងដំណាក់​កាល​កសាង​ជាតិ​នា​ពេល​បច្ចុប្បន្ន ប្រទេសយើង​ទាំង​ពីរ​តែង​តែ​ប្រកៀកស្មារគ្នា រួមសុខរួមទុក្ខ​ជាមួយ​គ្នា ជួយទំនុកបម្រុង​គ្នាទៅ​វិញ​ទៅ​មក​។ ទំនាក់ទំនងដ៏​ប្រពៃ​នេះ ​ត្រូវបា​នលោក​ប្រធាន​រដ្ឋ ហូ ជីមិញ និង​ព្រះមហាវីរក្សត្រ នរោត្តម សីហនុ ចាក់គ្រឹះយ៉ាង​រឹងមាំ ហើយថ្នាក់នាំជំនាន់​ក្រោយៗ​ខិតខំថែរក្សា។ ប្រវត្តិសាស្ត្រ គឺជា សក្ខីភាព​បញ្ជាក់ពី​ទំនាក់​ទំនង​ រវាងប្រទេស​ទាំង​ពីរ បានក្លាយជាធាតុដ៏​សំខាន់ ​សម្រាប់​កំណត់​វាសនា អនាគត​របស់​ប្រទេសយើ​ងទាំង​ពីរ​។ ឯកឧត្តម បានបញ្ជាក់​បន្ថែ​មថា៖ ខេត្តក្រចេះ និងខេត្តប៊ិញ​ហ្វឿក គឺជាតំបន់ប្រវត្តិសាស្ត្រ តភ្ជាប់​បណ្ដាបង្គោលព្រំ​ដែនដ៏​សំខាន់ ក្នុងទំនាក់​ទំនង​ រវាង​ប្រទេសទាំងពីរ​។ ពេលបច្ចុប្បន្ន យុវជ​ន​នៃប្រទេស​ទាំងពីរ​មាន​សំណាង​ល្អ ដែលបាន​កើត​មក និងធំឡើងក្នុង​ពេលប្រទេសជាតិ​បាន​រំដោះ​ទាំង​ស្រុង បានរស់​រាន​ក្នុង​សន្តិភាព និងឯករាជ្យភាព មានឱកាសរៀនសូត្រ​ លត់ដំ ពលី និងធំដឹងក្ដី​។ ក្មួយៗសិស្សានុសិស្ស គឺជាអនាគត នៃប្រទេសជាតិ។ ឯកឧត្តម រដ្ឋមន្ត្រីក្រសួង​ការពារប្រទេស​វៀត​ណាម​ បានសំដែងនូវក្តី​សង្ឍឹមថា​៖ ក្មួយៗសិស្សានុសិស្ស​ នឹងខិតខំរៀន​សូត្រ ហាត់ពត់ លត់ដំ ដើម្បីទទួល​បានលទ្ធផលល្អ តស៊ូដើម្បីវាសនា​អនាគត​ទឹកដីប្រាង្គប្រាសាទ​ដ៏ស្រ​ស់ស្អាត​នេះ និងរួមដៃគ្នាជាមួយ​យុវជន​វៀតណាម​ ថែរក្សាការពា​រ​សាមគ្គីភាព​ជា​ប្រពៃណី​ រវាង​ប្រទេស​ទាំង​ពីរ​ វៀតណាម-កម្ពុជា ឱ្យកាន់​តែ​រឹងមាំ​ឡើង ៕


អត្ថបទថ្មីៗ

សេចក្តីប្រកាស

សារជូនពរ

វីដេអូ