នាវាកងទ័ពជើងទឹកឥណ្ឌានិងចូលចតនៅកំពុងផែក្រុងព្រះសីហនុនាខែវិច្ឆិកា ឆ្នាំ ២០១៥ - ព័ត៌មានក្នងស្រុក

ព័ត៌មាន

នាវាកងទ័ពជើងទឹកឥណ្ឌានិងចូលចតនៅកំពុងផែក្រុងព្រះសីហនុនាខែវិច្ឆិកា ឆ្នាំ ២០១៥

ឯកឧត្តម Naveen Srivastava ឯកអគ្គរដ្ឋទូតតែងតាំងថ្មី នៃសាធារណរដ្ឋឥណ្ឌា ប្រចាំនៅកម្ពុជា ក្នុងឪកាសចូលជួបសំដែងការគួរសមជាមួយ ឯ. នាយឧត្តមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការជាតិ នាថ្ងៃទី ២២ខែ កញ្ញា ឆ្នាំ ២០១៥ បានជំរាបជូន ឯកឧត្តម ទៀ បាញ់ថា ៖ នាវាកងទ័ពជើងទឹកឥណ្ឌា នឹងមកចូលចតនៅកំពុងផែក្រុងព្រះសីហនុ នាខែ វិច្ឆិកា ឆ្នាំ ២០១៥ ខាងមុខនេះ ។ ឯកអគ្គរដ្ឋទូតឥណ្ឌា បានអោយដឹងទៀតថា ៖ ក្រុមគ្រូយោធាចារ្យកងទ័ពឥណ្ឌា ទើបតែបានមកដល់កម្ពុជាក្នុងពេលថ្មីៗនេះ ដើម្បីជួយបណ្តុះបណ្តាលជំនាញរក្សាសន្តិភាព និង ជំនាញដោះបំផ្លាញគ្រាប់មីន រយៈពេលពីរសប្តាហ៍ដល់កំលាំងមួកខៀវកម្ពុជា ។ នៅក្នុងជំនួបនោះ ឯកឧត្តម Naveen Srivastava បានបញ្ចាក់ថា៖ ឥណ្ឌានឹងបន្តនូវអ្វីដែលបានសហការជាមួយកម្ពុជាកន្លងមក ដូចជាការបណ្តុះបណ្តាលធនធានមនុស្សដល់ ខភម ការផ្លាស់ប្តូរទស្សនៈកិច្ច និងការបញ្ជូនសិក្ខាកាម
កម្ពុជាទៅរៀននៅឥណ្ឌា។ ឯកឧត្តមបានសង្កត់ធ្ងន់ថា ៖ ក្នុងបេសកកម្មការទូតនៅកម្ពុជាឯកឧត្តមនឹងខិតខំពង្រឹង មិនត្រឹមតែចំណងមិត្តភាពដែលមានកន្លងមកនោះទេ ក្នុងនោះបញ្ហាសន្តិសុខក៍ជាបញ្ហាសំខាន់ផងដែល ដែលបណ្តាលប្រទេសនានាកំពុងតែប្រឈម ទាំងសន្តិសុខប្រពៃណី និង សន្តិសុខមិនប្រពៃណី ដែលទាមទាអោយមានកិច្ចសហប្រតិបត្តិការជាមួយគ្នាអោយបានជិតស្និត។ ឆ្លៀតក្នុងឪកាសនោះ ឯកឧត្តម Naveen Srivastava ក៏បានអញ្ជើញ ឯ. ទៀ បាញ់ទៅទស្សនៈកិច្ចជាផ្លូវការនៅសាធារណរដ្ឋឥណ្ឌាផងដែល។ មានមតិឆ្លើយតបវិញ ឯ. ទៀ បាញ់ បានសំដែងការស្វាគមន៍ចំពោះ ឯកឧត្តម Naveen Srivastava ដែលបានមកបំពេញបេសកកម្មការទូតនៅកម្ពុជា ។ ឯកឧត្តម ទៀ បាញ់ បានចាត់ទុកតំណើរទស្សនៈកិច្ច របស់ អនុប្រធានាធិបតីឥណ្ឌានៅកម្ពុជានាពេលថ្មីៗកន្លងទៅនេះ បានបញ្ជាក់កាន់តែច្បាស់ថែមទៀតពីចំណងមិត្តភាពនិង កិច្ចសហប្រតិបត្តិការរវាងប្រទេសទាំងពីកាន់តែជិតស្និទ្ធ ។ឯកឧត្តម បានបញ្ជាក់បន្ថែមថា៖ កងកំលាំងមួកខៀវកម្ពុជា ដែលបានចេញទៅបំពេញបេសកកម្មលើកតំបូងនៅប្រទេសស៊ូដង់គឺបានទទួលការសហការល្អពីកងទ័ពឥណ្ឌាដែលបំពេញភារកិច្ចនៅទីនោះ ។ ឯកឧត្តម ទៀ បាញ់ បានឯកភាពតាមការអញើ្ជញរបស់ឯកឧត្តម ឯកអគ្គរដ្ឋទូតឥណ្ឌាប្រចាំកម្ពុជាដែលបានអញ្ជើញឯកឧត្តមអោយទៅធ្វើទស្សនៈកិច្ចជាផ្លូវការនៅប្រទេស ឥណ្ឌា ដោយឯកឧត្តម ឧបនាយករដ្ឋមន្ត្រី បានសន្យាថា និងរកពេលសមស្របណាមួយសំរាប់ចេញទៅបំពេញទស្សនៈកិច្ចនៅប្រទេសឥណ្ឌានេះ ។