ពិធីបិទវគ្គហ្វឹកហ្វឺនកម្លាំងឆ្លើយតប ឧប្បត្តិហេតុបឋម ដែលបង្កឡើងដោយ សារធាតុគីមី អាវុធគីមី អាវុធនុយក្លេអ៊ែរ អាវុធជីវសាស្ត្រ និងអាវុធវិទ្យុសកម្ម
អគ្គលេខាធិការដ្ឋាន អាជ្ញាធរជាតិអាវុធគីមី បានរៀបចំ ពិធីបិទវគ្គហ្វឹកហ្វឺនកម្លាំងឆ្លើយតប ឧប្បត្តិហេតុបឋម ដែលបង្កឡើងដោយ សារធាតុគីមី អាវុធគីមី អាវុធនុយក្លេអ៊ែរ អាវុធជីវសាស្ត្រ និងអាវុធវិទ្យុសកម្ម ដោយមានការសហការជាមួយមជ្ឈមណ្ឌល ឧត្តមភាព ផ្នែកគីមីសាស្ត្រ ជីវសាស្ត្រ វិទ្យុសកម្ម និងនុយក្លេអ៊ែរ របស់សហភាពអឺរ៉ុប (EU) CBRN_CoE) និងវិទ្យាស្ថានសន្តិសុខអន្តរជាតិ និងការគ្រប់គ្រងគ្រោះអាសន្ន (ISEMI) សម្រាប់ការការពារសន្តិសុខសុវត្ថិភាព នៃការប្រកួតកីឡាស៊ីហ្គេម លើកទី ៣២ និងកីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ ក្រោមអធិបតីភាព នាយឧត្តមសេនីយ៍ បណ្ឌិត ផន ណារ៉ា អគ្គលេខាធិការ អគ្គលេខាធិការដ្ឋាន អាជ្ញាធរជាតិអាវុធគីមី ដែលប្រព្រឹត្តទៅនៅថ្ងៃទី២៧ ខែមករា ឆ្នាំ២០២៣ វេលាម៉ោង១៣ៈ៣០នាទីរសៀល នៅបន្ទប់បាយ័ន្ធ អគារA(ខាងកើត) ជាន់ទី២ ទីស្ដីការក្រសួងការពារជាតិ។
ឧត្តមសេនីយ៍ទោ វ៉ាន សម្រេច នាយករង នាយកដ្ឋានហ្វឹកហ្វឺន អគ្គអគ្គលេខាធិការដ្ឋាន អាជ្ញាធរជាតិអាវុធគីមី បានឲ្យដឹងថា៖ គោលបំណងហ្វឹកហ្វឺន ដើម្បីកសាងនូវធនធានមនុស្សចូលរួមការពារសុវត្ថិភាពសន្តិសុខ គីមីសាស្ត្រ ជីវសាស្ត្រ វិទ្យុសកម្ម និងនុយក្លេអ៊ែរ ក្នុងការប្រកួតកីឡាអាស៊ីអាគ្នេយ៍លើក ទី៣២ និងកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ និងរាល់ឧប្បតិហេតុផ្សេងៗដែលបង្កឡើងដោយគីមីសាស្ត្រជីវសាស្ត្រ វិទ្យុសកម្ម និងនុយក្លេអ៊ែរ ក្នុងព្រះរាជាណាចក្រកម្ពុជា។
ក្នុងរបាយការណ៍បញ្ចប់វគ្គ បានបញ្ជាក់អោយដឹងថា៖ វគ្គហ្វឹកហ្វឺន ត្រូវបានបែងចែកជាពីរ និងមានរយៈពេលហ្វឹកហាត់ ១០ថ្ងៃ ក្នុងនោះ ទី១ សិក្ខាសាលាការពង្រឹងកិច្ចសហប្រតិបត្តិការអន្តរស្ថាប័ន ស្ដីពីការយល់ដឹង ការឆ្លើយតបឧប្បត្តិហេតុ ផ្នែកគីមីសាស្ត្រ ជីវសាស្ត្រ វិទ្យុសកម្ម និងនុយក្លេអ៊ែរ សម្រាប់ការការពារសន្តិសុខ សុវត្ថិភាព ក្នុងព្រឹត្តិការណ៍ប្រកួតកីឡាអាស៊ី អាគ្នេយ៍ លើកទី៣២ និងកីឡាប៉ារ៉ាហ្គេមលើកទី១២ ឆ្នាំ២០២៣ ដែលមានសមាសភាពសរុបរួម ចំនួន ២៥នាក់ គ្រូ ចំនួន ០៥នាក់ និងសិក្ខាកាមអន្តរស្ថាប័ន ចំនួន ២០នាក់ មកពី បញ្ជាការដ្ឋានអង្គរក្ស, នាយកដ្ឋានកណ្តាលសន្តិសុខ អគ្គស្នងការដ្ឋាននគរបាលជាតិ, នាយកដ្ឋានគ្រប់គ្រងសន្តិសុខឯកជន អគ្គស្នងការដ្ឋាននគរបាលជាតិ, ស្នងការដ្ឋាននគរបាលរាជធានីភ្នំពេញ, នាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ, នាយកដ្ឋានគ្រប់គ្រងអាវុធជាតិផ្ទុះ, នាយកដ្ឋានមន្ទីរពេទ្យ ក្រសួងសុខាភិបាល, នាយកដ្ឋានប្រយុទ្ធ នឹងជម្ងឺឆ្លង ក្រសួងសុខាភិបាល, បញ្ជាការដ្ឋានកងរាជអាវុធហត្ថ, អគ្គលេខាធិការដ្ឋាន អាជ្ញាធរជាតិអាវុធគីមី។ វគ្គនេះបានផ្តោតលើខ្លឹមសារមេរៀនការធ្វើបទបង្ហាញណែនាំ ដោយ វិទ្យាស្ថានការពារសន្តិសុខអន្តរជាតិ និងការសង្គ្រោះបន្ទាន់ (ISEMI)។ កិច្ចពិភាក្សាអនុវត្តកិច្ចការចាំបាច់សម្រាប់ការពារសន្តិសុខ សុវត្ថិភាពការការពារផ្នែកគីមីសាស្ត្រ ជីវសាស្ត្រ វិទ្យុសកម្ម។ ពិភាក្សាផែនការប្រតិបត្តិការក្រុមកម្លាំងការពារសន្តិសុខសុវត្ថិភាព ផ្នែកគីមីសាស្ត្រ ជីវសាស្ត្រ វិទ្យុសកម្ម និងនុយក្លេអ៊ែរ និងពិនិត្យមើលទីតាំងជាក់ស្តែងសម្រាប់ប្រតិបត្តិការកម្លាំងការពារ។ ទី២ វគ្គបំប៉នកម្រិតខ្ពស់ និងឯកទេសសម្រាប់ក្រុមកម្លាំងឆ្លើយតប គីមីសាស្ត្រ ជីវសាស្ត្រ វទ្យុសកម្ម និងនុយក្លេអ៊ែរ របស់អគ្គលេខាធិការដា្ឋន អាជ្ញាធរជាតិអាវុធគីមី ដែលមានសមាសភាពសរុបរួម ចំនួន ៦៥នាក់ ក្នុងនោះគ្រូចំនួន ០៥នាក់ -សិក្ខាកាម ចំនួន ៦០នាក់ដោយផ្តោតលើខ្លឹមសារមេរៀនការអនុវត្តមេរៀនមូលដ្ឋានកម្លាំងឆ្លើយតប -ការលាងសម្អត CBRN, ការឆ្លើយតបទៅនឹងឧប្បត្តិហេតុវិទ្យុសកម្ម និងវិធីសាស្ត្រ ការបង្កើត សេណារីយ៉ូ និងការអនុវត្ដន៍។ ការឆ្លើយតបរួមទៅនឹងឧប្បត្តិហេតុគីមី ការបង្កើតសេណារីយ៉ូ (នៅទីវាល) និងការធ្វើលំហាត់សាកល្បង។ លទ្ធផលសិក្ខាកាមក្រោយពេលហ្វឹកហ្វឺន និទ្ទេសល្អ= ៥៣នាក់ ស្មើ៨៨%, សំណូមពរ = ០៧នាក់ ស្មើ១២%, ចំណុចខ្លាំង សិក្ខាកាមទាំងអស់យកចិត្តទុកដាក់លើការរៀនសូត្រ និងការអនុវត្តការធ្វើសេនាណារីយ៉ូ និងការអនុវត្តរួមគ្នា ការឆ្លើយតបទៅនឹងឧប្បត្តិហេតុគីមីសាស្ត្រ ជីវសាស្ត្រ វិទ្យុសកម្ម និងនុយក្លេអ៊ែរ នៅក្នុងបន្ទប់ VIP របស់ថ្នាក់ ដឹកនាំនៅទីលានបានល្អប្រសើរ។
ក្នុងនាមសម្តេចពិជ័យសេនា ទៀ បាញ់ ប្រធានអាជ្ញាធរជាតិ អាវុធគីមី, ឯកឧត្តម ផន ណារ៉ា បានថ្លែងនូវការ កោតសរសើរវាយតម្លៃខ្ពស់ចំពោះលទ្ធផល នៃវគ្គបំប៉ន និងបានថ្លែងអំណរគុណផងដែរ ចំពោះមជ្ឈមណ្ឌលឧត្តមភាព ផ្នែកគីមីសាស្ត្រ ជីវសាស្ត្រ វិទ្យុសកម្ម និងនុយក្លេអ៊ែរ របស់សហភាពអឺរ៉ុប (EU CBRN CoE) និងវិទ្យាស្ថានសន្តិសុខ អន្តរជាតិ និងការគ្រប់គ្រងគ្រោះអាសន្ន (ISEMI) នៃសាធារណរដ្ឋស្លូវ៉ាគី ដែលបាន ចូលរួមសហការជាមួយ អគ្គលេខាធិការដ្ឋាន អាជ្ញាធរជាតិអាវុធគីមី ក្នុងការរៀបចំវគ្គ ហ្វឹកហ្វឺនខាងលើ និងបានបញ្ជូនគ្រូអ្នកជំនាញផ្នែកសន្តិសុខសុវត្ថិភាពគីមីសាស្ត ជីវសាស្ត្រ វិទ្យុសកម្ម និងនុយក្លេអ៊ែរ មកបណ្តុះបណ្តាលកម្លាំងឆ្លើយតបរបស់អគ្គលេខាធិការដ្ឋាន អាជ្ញាធរជាតិអាវុធគីមី និងអន្តរស្ថាប័នដែលពាក់ព័ន្ធ នៃព្រះរាជាណាចក្រកម្ពុជា នាពេលនេះ ដើម្បីតៀមបំពេញភារកិច្ចដ៏ឧត្តុង្គឧត្តម របស់អាជ្ញាធរជាតិអាវុធគីមី នៅក្នុងការប្រកួតកីឡាស៊ីហ្គេម ដែលជាការរួមចំណែកមួយ ក្នុងសន្តិសុខទាំងមូល។
នាយឧត្តមសេនីយ៍ បានមានប្រសាសន៍ថា នៅចំពោះមុខ យើងត្រូវបន្តពុះពារតទៅទៀត ក្នុងនោះបញ្ហាសម្ភារៈនៅខ្វះខាត ដែលតម្រូវឱ្យយើងស្វែងរកបំពេញបន្ថែមតាមគ្រប់រូបភាព ដែលអាចធ្វើទៅបាន។ បញ្ហាស្មារតី ឆន្ទ:ទទួលខុសត្រូវ របស់មន្ត្រីគ្រប់លំដាប់ថ្នាក់ ពិសេសកងកម្លាំងឆ្លើយតប ដែលយើងទាំងអស់គ្នា បន្តពង្រឹងលើកកម្ពស់ភាពទទួលខុសត្រូវ។ នាយឧត្តមសេនីយ៍ បណ្ឌិត ផន ណារ៉ា បានបញ្ជាក់ថា អគ្គលេខាធិការដ្ឋាន អាជ្ញាធរជាតិអាវុធគីមី នឹងបន្តសហការជាមួយ មជ្ឈមណ្ឌល ឧត្តមភាព ផ្នែកគីមីសាស្ត្រ ជីវសាស្ត្រ វិទ្យុសកម្ម និងនុយក្លេអ៊ែរ របស់សហភាពអឺរ៉ុប (EU CBRN CoE) និងវិទ្យាស្ថានសន្តិសុខអន្តរជាតិ និងការគ្រប់គ្រងគ្រោះអាសន្ន (ISEMi) នៃសាធារណរដ្ឋស្លូវាគី រៀបចំវគ្គពិសេស ក្នុងការឆ្លើយតបឧប្បត្តិហេតុដែលបង្កឡើង ដោយគីមីសាស្ត្រ ជីវសាស្ត្រ វិទ្យុសកម្ម និងនុយក្លេអ៊ែរ ក្នុងព្រឹត្តិការប្រកួតកីឡាអាស៊ី អាគ្នេយ៍លើកទី៣២ និងកីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ ដោយមានការធ្វើលំហាត់លើតុខ្សាច់ និងអនុវត្តជាក់ស្ដែង ដោយមានការចូលរួមដោយអន្តរស្ថានប័ន នៅពហុកីឡដ្ឋានជាតិមរតកតេជោ នៅខែមីនា ឆ្នាំ២០២៣ ខាងមុខនេះ ៕
