សម្ដេចពិជ័យសេនា ទៀ បាញ់ ជួបឯកអគ្គរាជទូតថៃតែងតាំងថ្មី ប្រចាំកម្ពុជា
នារសៀលថ្ងៃទី២៧ ខែមករា ឆ្នាំ២០២៣ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី ក្រសួងការពារជាតិ បានអនុញ្ញាត្តឲ្យ ឯកឧត្តម ជេតគៀត អាថាគ័រ ឯកអគ្គរាជទូតថៃ ប្រចាំកម្ពុជា ចូលជួបសម្តែងការគួរសម នៅទីស្តីការក្រសួងការពារជាតិ។
ជំនួបក្នុងឱកាសនោះ សម្ដេចពិជ័យេសេនា ទៀ បាញ់ បានសម្តែងការស្វាគមន៍ ចំពោះឯកឧត្តម ឯកឧត្តម ជេតគៀត អាថាគ័រ ឯកអគ្គរាជទូតថៃ ប្រចាំកម្ពុជា ដែលបានចូលជួបសំដែងការគួរសម នៅពេលដែល ឯកឧត្តម ត្រូវបានទទួលការតែងតាំងជាឯកអគ្គរាជទូតថៃថ្មី។ សម្ដេចពិជ័យេសេនាក៏បានលើក អំពីកិច្ចទំនាក់ទំនង, ការពង្រឹង និងពង្រីក ចំណងមិត្តភាព និងកិច្ចសហប្រតិបត្តិការ ទ្វេភាគី កម្ពុជា-ថៃ កន្លងមក ក្នុងក្របខណ្ឌការពារជាតិ គឺកាន់តែប្រសើរ ឡើងជាលំដាប់។ ពិសេសពង្រឹងកិច្ច សហប្រតិបត្តិការ ទំនាក់ទំនងនៅតាមបណ្តោយព្រំដែននៃប្រទេសទាំង២ ទាំងព្រំដែនគោក និងព្រំដែនទឹក បានល្អ នាពេលកន្លងមក។ ជាក់ស្តែង នៅក្នុងឆ្នាំ២០២១កន្លងមក ទោះបីមានការរីករាលដាលជំងឺកូវីដ-១៩ ជាសកលយ៉ាងណាក្ដី ប៉ុន្តែរដ្ឋាភិបាល ក្រសួងការពារប្រទេសយើងទាំង២ នៅតែពង្រឹងកិច្ចសហប្រតិបត្តិការជាមួយគ្នាតាមរយៈ ការផ្ដល់សម្ភារៈ និងបរិក្ខារពេទ្យ គាំទ្រយុទ្ធនាការជំងឺកូដ-១៩ ដល់កងយោធពលខេមរភូមិន្ទ, និងមានការផ្លាស់ប្តូរដំណើរទស្សនកិច្ចរវាងយោធាទាំង២។ សម្ដេចពិជ័យសេនា ទៀ បាញ់ ក៏បានថ្លែងអំណរគុណដល់រាជរដ្ឋាភិបាល និងកងទ័ពភូមិន្ទថៃ ដែលកន្លងមកបាន ជួយបណ្តុះបណ្តាលធនធានមនុស្សក្នុងជួរ ខ.ភ.ម លើវិស័យបច្ចេកទេសនានា ក៏ដូចជាវិស័យអភិវឌ្ឍកសិកម្មផងដែរ។
ជាកិច្ចឆ្លើយតបឯកឧត្តម ជេតគៀត អាថាគ័រ ឯកអគ្គរាជទូតថៃ ប្រចាំកម្ពុជា បានលើកឡើងនូវកិច្ចសហប្រតិបត្តិការ រវាងកងទ័ពកម្ពុជានិងថៃ នៅតែបន្តពង្រឹងនិងពង្រីកឲ្យបាន គឺកាន់ប្រសើរឡើងថែមទៀត ។ ឯ.ឧ បានបន្តថា៖ ការមកទទួលភារកិច្ចការទូតថ្មីនៅកម្ពុជា ឯ.ឧ និងខិតខំអនុវត្ត បន្តឲ្យកាន់តែប្រសើរឡើងនូវទំនាក់ទំនងកិច្ចសហប្រតិបត្តិការ រវាងប្រទេសយើងទាំង២កងទ័ពទាំង ២កាន់តែ រឹងមាំថែមទៀត។ ឯកឧត្តម ក៏បានសំដែងនូវអំណរសាទរ ចំពោះលទ្ធលជោគជ័យដ៏ត្រចះត្រចង់ នៃកិច្ចប្រជុំកំពូលអាស៊ានដែលឆ្នាំនេះកម្ពុជាទទួលធ្វើជាម្ចាស់ផ្ទះ ដោយឡែកកិច្ចប្រជុំចង្អៀតរដ្ឋមន្ត្រីការពារជាតិ អាស៊ាន (ADMM Retreat) និងកិច្ចប្រជុំរដ្ឋមន្ត្រីការពារ ជាតិអាស៊ាន-បូក លើកទី ៩ (9 ADMM-Plus) ដែលសម្តេចពិជ័យ បានធ្វើជាប្រធាននៃកិច្ចប្រជុំកន្លងមក។ ឯ.ឧ ឯកអគ្គរាជ ទូតថៃ ក៏បានថ្លែងអំណរគុណ ដល់សម្តេចពិជ័យ ដែលសម្តេចតែងតែមានវត្តមានជាប្រចាំក្នុងកិច្ចប្រជុំនានា ទាក់ទងទៅនឹងកិច្ចសហប្រតិបត្តិការ នៃប្រទេសទាំង ២ ៕
