ប្រជុំឆ្លងសេចក្តីព្រៀងរបាយការណ៍បូកសរុបលទ្ធផលការងារខែមករា និងទិសដៅអនុវត្តការងារបន្តខែកុម្ភៈ ឆ្នាំ២០២៣
នៅថ្ងៃទី៣១ ខែមករា ឆ្នាំ២០២៣ នៅទីស្តីការក្រសួងការពារជាតិ មានបើកកិច្ចប្រជុំឆ្លងសេចក្តីព្រៀងរបាយការណ៍បូកសរុបលទ្ធផលការងារខែមករា និងទិសដៅអនុវត្តការងារបន្តខែកុម្ភៈ ឆ្នាំ២០២៣ ក្រោមអធិបតីភាព នាយឧត្តមសេនីយ៍ នាង ផាត រដ្ឋលេខាធិការប្រចាំការ ក្រសួងការពារជាតិ។
ក្នុងសេចក្តីព្រៀងរបាយការណ៍បូកសរុបលទ្ធផលការងារ ខែមករា ឆ្នាំ២០២៣ ដែលអានដោយ ឧត្ដមសេនីយ៍ឯក ចាន់ សារ៉ាង អគ្គលេខាធិការរង និងជានាយក នាយកដ្ឋានសរុប អគ្គលេខាធិការដ្ឋាន ក្រសួងការពារជាតិ បានបញ្ជាក់ថា៖ ក្នុងខែមករា ឆ្នាំ២០២៣នេះ កងយោធពលខេមរភូមិន្ទ បានយកចិត្តទុកដាក់ពុះពារ អនុវត្តតួនាតីភារកិច្ចរបស់ខ្លួន តាមកម្មវិធីនយោបាយយុទ្ធសាស្ត្រចតុកោណរបស់រាជរដ្ឋាភិបាល និងភារកិច្ចចំពោះមុខដោយសម្រេចបាននូវសមិទ្ធផលការងារធំៗជាច្រើនគួរជាទីមោទនៈ។ ក្នុងនោះសភាពការណ៍នៅតាមតំបន់ព្រំដែនស្ងប់ស្ងាត់ពុំមានអ្វីគួរឲ្យកត់សម្គាល់, កងយោធពលខេមរភូមិន្ទ បានបន្តពង្រឹងកិច្ចការពារជាតិ លើគ្រប់វិស័យនៅតាមតំបន់ព្រំដែនគោក ដែនសមុទ្រ ធ្វើសកម្មភាពល្បាតជាប្រចាំក្នុងភូមិសាស្ត្រទទួលខុសត្រូវរៀងៗខ្លួន។ ដោយឡែក សភាពការណ៍សន្តិសុខ សណ្តាប់ធ្នាប់សាធារណៈក្នុងប្រទេសមានភាពល្អប្រសើរ, កងយោធពលខេមរភូមិន្ទ បានម្ចាស់ការ និងសហការជាមួយអាជ្ញាធរមានសមត្ថកិច្ចគ្រប់ជាន់ថ្នាក់ធ្វើការបង្ការ ទប់ស្កាត់ និងបង្ក្រាបសកម្មភាពបទល្មើសគ្រប់ប្រភេទ។ ក្រៅពីនេះ ក៏បានចូលរួមជួយសង្គ្រោះគ្រោះមហន្តរាយផ្សេងៗ ដូចជាគ្រោះជំនន់ទឹកភ្លៀង, លិចរលំបាក់ផ្ទះប្រជាពលរដ្ឋ, គ្រោះអគ្គីភ័យ, នៅតាមបណ្តាខេត្តមួយចំនួនផងដែរ។ កិច្ចប្រជុំក៏បានធ្វើការពិភាក្សា លើរបាយការណ៍បូកសរុបលទ្ធផលការងារខែមករា ផងដែរ។
មានមតិបូកសរុបកិច្ចប្រជុំ ឯកឧត្តម នាង ផាត បានមានប្រសាសន៍ថា៖ ខែមករា ឆ្នាំ២០២៣ កងយោធពលខេមរភូមិន្ទ និងក្រសួងការពារជាតិ បានដើរតួនាទីយ៉ាងសំខាន់ក្នុងការរួមចំណែកជួយដល់រាជរដ្ឋាភិបាល ដើម្បីអភិវឌ្ឈន៍ប្រទេសជាតិ ឲ្យកាន់តែរីកចម្រើន បន្ទាប់ពីមានការអាក់ខានអស់រយៈពេលជាង ២ឆ្នាំកន្លងមក ដោយសាររោគរាតត្បាតជាសកលនៃជំងឺឆ្លងកូវីដ-១៩។ ឯកឧត្តម បានគូសបញ្ជាក់ថា ទន្ទឹមនឹងស្នាដៃសម្រេចបានទាំងនេះ កងយោធពលខេមរភូមិន្ទ បានយកចិត្តទុកដាក់ខ្ពស់លើការងារកសាងប្រវត្តិសាស្ត្រយោធា និងការបំពេញបេសកកម្មរក្សាសន្តិភាពក្រោមឆត្រអង្គការសហប្រជាជាតិ។ ជាមួយគ្នានេះដែរ ឯកឧត្តម នាង ផាត បានបញ្ជាក់បន្ថែមថា សម្រាប់ខែកុម្ភៈ ឆ្នាំ២០២៣ ខាងមុខនេះ អនុវត្តតាមកម្មវិធីនយោបាយរបស់រាជរដ្ឋាភិបាល និងភារកិច្ចជាក់ស្ដែងចំពោះមុខ ហើយក៏ជាពេលវេលាដែលព្រះរាជាណាចក្រកម្ពុជាយើងត្រូវធ្វើការបោះឆ្នោតជ្រើសតាំងតំណាងរាស្ត្រនីតិកាលទី ៧ ព្រមទាំងធ្វើជាម្ចាស់ផ្ទះព្រឹត្តិការណ៍ស៊ីហ្គេមលើកទី ៣២ និងអាស៊ានប៉ារ៉ាហ្គេមលើកទី ១២ ឆ្នាំ២០២៣ និងមានពិធីបុណ្យជាតិធំៗ និងកម្មវិធីរបស់កងទ័ព ជាបន្តបន្ទាប់ ក្នុងនោះ ឯកឧត្តម បានដាក់ចេញនៅទិសដៅ ឲ្យដល់គ្រប់អង្គភាពកងយោធពលខេមរភូមិន្ទ ត្រូវបន្តកសាងពង្រឹងកិច្ចការពារជាតិ គ្រប់វិស័យតាមតំបន់ព្រំដែន និងចូលរួមទប់ស្កាត់បង្ការបង្ក្រាបសកម្មភាពបទល្មើសគ្រប់ប្រភេទ នៅតាមតំបន់ព្រំដែនគោក ដែនសមុទ្រ និងសកម្មភាពឆ្លងដែនខុសច្បាប់ ឲ្យមានប្រសិទ្ធភាព ៕
