សម្តេចពិជ័យសេនា ទៀ បាញ់ ដឹកនាំប្រតិភូអន្តរក្រសួងចុះពិនិត្យលទ្ធផលការងារសាងសង់មជ្ឈមណ្ឌលទំនើបកម្មមូលដ្ឋានសមុទ្ររាម
បន្ទាប់ពីបានបើកការដ្ឋាន សាងសង់ មជ្ឈមណ្ឌលទំនើបកម្មមូលដ្ឋានសមុទ្ររាម អស់រយៈពេល ៨ខែកន្លងមក នៅព្រឹកថ្ងៃទី០១ ខែកុម្ភៈ ឆ្នាំ២០២៣ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ដឹកនាំប្រតិភូអន្តរក្រសួងចុះពិនិត្យលទ្ធផលការងារសាងសង់មជ្ឈមណ្ឌលទំនើបកម្មមូលដ្ឋានសមុទ្ររាម នៅខេត្តព្រះសីហនុ។
អញ្ជើញអមដំណើរសម្តេចពិជ័យសេនា ទៀ បាញ់ នាឱកាសនោះដែលមាន នាយឧត្តមសេនីយ៍ នាង ផាត រដ្ឋលេខាធិការប្រចាំការ ក្រសួងការពារជាតិ, នាយឧត្តមសេនីយ៍ វង្ស ពិសេន អគ្គមេបញ្ជាការ នៃខភម, នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ, ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង ខភម និងជាមេបញ្ជាការកងទ័ពជើងគោក ព្រមទាំងមេបញ្ជាការកងទ័ពជើងទឹក ជើងអាកាស កងរាជអាវុធហត្ថ អគ្គនាយក អគ្គនាយករង ព្រមទាំងឯកឧត្តម អស់លោកជារដ្ឋលេខាធិការ អនុរដ្ឋលេខាធិការមកពីក្រសួង ស្ថាប័ន មានការពាក់ព័ន្ធជាច្រើរូបទៀត។ សូមបញ្ជាក់ថា៖ នេះជាដំណើរចុះពិនិត្យការងារ លើកទី៥ នៅមូលដ្ឋានសមុទ្ររាម កងទ័ពជើងទឹក បន្ទាប់ពីចាប់ផ្តើមអនុវត្តផែនការសាងសង់មជ្ឈមណ្ឌលទំនើបកម្មមូលដ្ឋានសមុទ្ររាមមកនោះ។ រហូតមកដល់ពេលនេះ លទ្ធផល នៃការងារសាងសង់មជ្ឈមណ្ឌលទំនើបកម្មមូលដ្ឋានសមុទ្ររាមសម្រេចបាន ៤០% នៃគម្រោងរួម ។
ក្នុងរបាយការណ៍របស់មូលដ្ឋានសមុទ្ររាម បានបញ្ជាក់អោយដឹងថា៖ ក្នុងដំណើរការសាងសង់មជ្ឈមណ្ឌលទំនើបកម្មមូលដ្ឋានសមុទ្ររាមនេះ រដ្ឋបាលខេត្តព្រះសីហនុ តែងតែយកចិត្តទុកដាក់ និងគាំទ្រដល់ការអភិវឌ្ឍន៍របស់កងទ័ពជើងទឹកមូលដ្ឋានសមុទ្ររាម ចាប់តាំងពីពេលមុន រហូតដល់បច្ចុប្បន្ន ហើយកន្លងទៅថ្មីៗនេះ រដ្ឋបាលខេត្តព្រះសីហនុបានគាំទ្រជួយតភ្ជាប់ប្រព័ន្ធទឹកស្អាត និងកំពុងសម្របសម្រួលការតភ្ជាប់ប្រព័ន្ធអគ្គីសនីតង់ស្យុងខ្ពស់នាពេលខាងមុខ សម្រាប់បម្រើឲ្យការងារសាងសង់ អភិវឌ្ឍទំនើបកម្មមូលដ្ឋានសមុទ្ររាម ទៅតាមតម្រូវការប្រើប្រាស់ចាំបាច់នាពេលបច្ចុប្បន្ន។ បច្ចុប្បន្ននេះ ក្រុមការងារសាងសង់ បានកំពុងពន្លឿនការងារ សាងសង់របងព័ទ្ធជុំវិញមជ្ឈមណ្ឌល សាងសង់កំពង់ផែ សាងសង់អគារស្នាក់នៅ អគារការិយាល័យ កន្លែងចតរថយន្ត និងការងារបូមខ្សាច់ ស្តាឃ្លង ក្នុងសមុទ្រ។ ទទឹមនឹងការងារសាងសង់មជ្ឈមណ្ឌលទំនើបកម្មមូលដ្ឋានសមុទ្ររាមនេះ នៅតាមបណ្ដោយឆ្នេរមាត់សមុទ្ររាម ក៏មានគម្រោងការអភិវឌ្ឍន៍តំបន់ឆ្នេរប្រមាណជាង ៤០០ម៉ែត្រ ផងដែរ។ គម្រោងអភិវឌ្ឍ តំបន់ឆ្នេរសមុទ្ររាមនេះ ជាគំនិតផ្តួចផ្ដើមឡើងរបស់ក្រសួងបរិស្ថាន ដើម្បីកែលម្អ សោភ័ណ្ឌភាពឆ្នេរ ឲ្យប្រែក្លាយជាតំបន់ឆ្នេរទេសចរណ៍ និងមានសក្តានុពលសម្រាប់ទាក់ទាញភ្ញៀវជាតិ និងអន្តរជាតិ មកទស្សនាកំសាន្ត ដែលជាកត្តាដ៏សំខាន់ក្នុងការលើកកម្ពស់កម្រិតជីវភាពរស់នៅរបស់ប្រជាពលរដ្ឋក្នុងតំបន់នេះ។ ការសាងសង់មជ្ឈមណ្ឌលទំនើបកម្មមូលដ្ឋានសមុទ្ររាម ដែលលេចចេញជារូបរាងនាពេលនេះ គឺជាព្រឹត្តិការណ៍ដ៏មានសារៈសំខាន់ និងជាប្រវត្តិសាស្ត្រនេះ ដែលបានកកើតឡើងក្រោមកិច្ចសហប្រតិបត្តិការ រវាងរដ្ឋាភិបាល នៃប្រទេសទាំងពីរ(កម្ពុជា-ចិន) ក្នុងគោលដៅជួយស្តារ និងកសាងលទ្ធភាពផ្ដល់គ្រឿងបំពាក់ សម្ភារៈ និងគ្រឿងបច្ចេកទេស ដើម្បីលើកកម្ពស់សមត្ថភាព នាយនាវី នាយនាវីរង ពលនាវឹក និងអ្នកជំនាញបច្ចេកទេសគ្រប់ប្រភេទ របស់កងទ័ពជើងទឹកកម្ពុជា ឱ្យមានជំរុំ បន្ទាយ ទីបញ្ហាការ កន្លែងធ្វើការ កន្លែងស្នាក់នៅសមរម្យ និងមានសមត្ថភាពក្នុងការបំពេញភារកិច្ចការពារបូរណភាពទឹកដី ដែនទឹក ដែនកោះ ឆ្នេរ នៃព្រះរាជាណាចក្រកម្ពុជា អោយបានគង់វង្ស ស្របទៅតាមបទបញ្ជា ដែលក្រសួងការពារជាតិ និងរាជរដ្ឋាភិបាលកម្ពុជាប្រគល់ជូន។ សមិទ្ធផល នៅមជ្ឈមណ្ឌលទំនើបកម្មមូលដ្ឋានសមុទ្ររាម ដែលកំពុងដំណើរការសាងសង់នេះ គឺជាសមិទ្ធផលថ្មីមួយទៀត ក្នុងចំណោមសមិទ្ធផល ជាច្រើន ដែលកងយោធពលខេមរភូមិន្ទសម្រេចបាន ក្រោមកិច្ចសហប្រតិបត្តិការទ្វេភាគីកម្ពុជា-ចិន សំដៅពង្រឹង និងពង្រីកសមត្ថភាពលើគ្រប់ផ្នែក គ្រប់វិស័យ ស្របតាមផែនការកែទម្រង់កងយោធពលខេមរភូមិន្ទ ។
តាមរយៈការចុះពិនិត្យលទ្ធផលការងារសាងសង់មជ្ឈមណ្ឌលទំនើបកម្មមូលដ្ឋានសមុទ្ររាម នាពេលនោះ សម្តេចពិជ័យសនា ទៀ បាញ់ បានធ្វើការវាយតំលៃខ្ពស់ ចំពោះការខិតខំប្រឹងប្រែង របស់គណៈកម្មការសាងសង់ ដែលបានដឹកនាំការងារ សហការ ធ្វើអោយការងារសាងសង់ ដំណើរការទៅមុខដោយរលូន តាមផែនការដែលបានគ្រោងទុករហូតមកដល់ពេលនេះ ៕
