សម្តេចពិជ័យសេនា ទៀ បាញ់ ប្រជុំបូកសរុប និងវាយតម្លៃលទ្ធផល នៃកិច្ចរដ្ឋមន្ត្រីការពារជាតិ អាស៊ាន ឆ្នាំ២០២២
នៅទីស្តីការក្រសួងការពារជាតិ បានបើកកិច្ចប្រជុំបូកសរុប និងវាយតម្លៃលទ្ធផល នៃកិច្ចប្រជុំរដ្ឋមន្ត្រីការពារជាតិ អាស៊ាន (ADMM) លើកទី១៦ កិច្ចប្រជុំចង្អៀតរដ្ឋមន្ត្រីការពារជាតិអាស៊ាន (ADMM Retreat) និងកិច្ចប្រជុំរដ្ឋមន្ត្រីការពារជាតិអាស៊ាន-បូក (ADMM-Plus) ឆ្នាំ២០២២ នាព្រឹកថ្ងៃទី០៩ ខែកុម្ភៈ នេះ ស្ថិតក្រោមអធិបតីភាព សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ។
មានប្រសាសន៍បើកកិច្ចប្រជុំនោះ សម្តេចពិជ័យសេនា ទៀ បាញ់ បានថ្លែងនូវការអបអរសាទរ និងវាយតម្លៃខ្ពស់ចំពោះលទ្ធផល ដែលប្រជាជាតិកម្ពុជា ក្រសួងកាពារជាតិ និងខ.ភ.ម ទទួលបានជោគជ័យគួរជាទីមោទនៈ ក្នុងការរៀបចំកិច្ចប្រជុំរដ្ឋមន្ត្រីការពារជាតិអាស៊ាន លើកទី១៦ កិច្ចប្រជុំចង្អៀតរដ្ឋមន្ត្រីការពារជាតិអាស៊ាន(ADMM Retreat) និងកិច្ចប្រជុំរដ្ឋមន្ត្រីការពារជាតិអាស៊ាន-បូក(ADMM-Plus) ឆ្នាំ២០២២ បានដោយផ្ទាល់ពិតជាអស្ចារ្យខ្លាំងក្លាណាស់ ដែលកន្លងមកនេះនៅបណ្តាប្រទេសនានា បានរៀបចំកិច្ចប្រជុំធ្វើឡើងត្រឹមតែតាមប្រព័ន្ធវីដេអូអនឡាញប៉ុណ្ណោះ ក្រោយពីមានការថមថយនូវបញ្ហាការរាតត្បាតជម្ងឺកូវីដ-១៩។ សម្តេចពិជ័យសេនា បានបន្តថា នេះគឺជាប្រវត្តិសាស្ត្រថ្មីមួយទៀតរបស់ប្រជាជាតិកម្ពុជា និង ខ.ភ.ម ហើយខាងមុខនេះយើងនៅមានកិច្ចការជាច្រើនទៀត ដែលយើងត្រូវបន្តធ្វើ ក្នុងនោះ ការចូលរួមនូវកិច្ចប្រជុំរដ្ឋមន្ត្រីការពារជាតិអាស៊ាន ឆ្នាំ២០២៣ នៅប្រទេសឥណ្ឌូនេស៊ី។ ជាមួយគ្នានេះ សម្តេចពិជ័យសេនា ទៀ បាញ់ ក៏បានសម្តែងនូវការកោតសរសើរ និងអំណរអរគុណចំពោះអនុគណៈកម្មការ ក្រុមការងារ និងស្ថាប័នជំនាញពាក់ព័ន្ធ ពិសេសនាយកដ្ឋានអាស៊ាន ដែលបានខិតខំពុះពារក្នុងការរៀបចំកិច្ចប្រជុំរដ្ឋមន្ត្រីការពារជាតិអាស៊ាន(ADMM) លើកទី១៦ កិច្ចប្រជុំចង្អៀតរដ្ឋមន្ត្រីការពារជាតិអាស៊ាន(ADMM Retreat) និងកិច្ចប្រជុំរដ្ឋមន្ត្រីការពារជាតិអាស៊ាន-បូក(ADMM-Plus) ឆ្នាំ២០២២ ទទួលបានដោយជោគជ័យ តាមរបៀបវីរៈដែលបានគ្រោងទុក។
នៅក្នុងឱកាសនោះ អង្គប្រជុំបានតាមដានស្តាប់នូវរបាយការណ៍បូកសរុបលទ្ធផលរបស់ នាយឧត្តមសេនីយ៍ ណឹម សុវត្ថិ អគ្គនាយក អគ្គនាយកដ្ឋាននយោបាយ កិច្ចការបរទេស និងជាប្រធាន អនុគណៈកម្មាការរៀបចំខ្លឹមសារ ឯកសារ និងការងាររដ្ឋបាល - របាយការណ៍បូកសរុបលទ្ធផលរបស់ នាយឧត្តមសេនីយ៍ សំ វណ្ណថន ឧត្តមក្រុមប្រឹក្សាការពារជាតិ អគ្គលេខាធិការ ក្រសួងការពារជាតិ និងជាប្រធានអនុគណៈកម្មាការពិធីការ និងបដិសណ្ឋាកិច្ច - របាយការណ៍បូកសរុបលទ្ធផលរបស់ ឧត្តមសេនីយ៍ឯក លី កុសល ប្រធានអនុគណៈកម្មការធានា និងរបាយការណ៍បូកសរុបលទ្ធផលរបស់ នាយឧត្តមសេនីយ៍ សៅ សុខា អគ្គមេបញ្ជាការរង នៃខ.ភ.ម មេបញ្ជាការកងរាជអាវុធហត្ថលើផ្ទៃប្រទេស និងជាប្រធានអនុគណៈកម្មការសន្តិសុខ និងសុខាភិបាល នៃកិច្ចប្រជុំរដ្ឋមន្ត្រីការពារជាតិអាស៊ានឆ្នាំ២០២២។
យោងតាមរបាយការណ៍របស់ក្រុមការងារខ្លឹមសារ និងឯកសារ បានឲ្យដឹងថា កិច្ចប្រជុំរដ្ឋមន្ត្រីការពារជាតិអាស៊ាន លើកទី១៦ និងកិច្ចប្រជុំពាក់ព័ន្ធ ឆ្នាំ២០២២ ដែលក្រសួងការពារជាតិ រៀបចំធ្វើជាម្ចាស់ផ្ទះ ក្នុងឆ្នាំ២០២២ មានបញ្ហាប្រឈមធំៗចំនួន បី ក្នុងនោះ ផលប៉ះពាក់នៃការរាតត្បាតជម្ងឺកូវីដ-១៩ សភាពការណ៍នយោបាយផ្លាស់ប្តូរយ៉ាងគំហុក ដែលជះឥទ្ធិពលដល់ការប្រុងប្រៀបរៀបចំកិច្ចប្រជុំ (គឺវិបត្តិនៅមីយ៉ាន់ម៉ា ការប្រកួតប្រជែងរបស់មហាអំណាចចិន-សហរដ្ឋអាមេរិក និងបញ្ហាសង្គា្រមរុស្ស៊ី-អ៊ុយក្រែន) និងនិន្នាការប្រកាន់ជំហរមិនរួបរួមគ្នា។ ជាមួយគ្នានេះ ក្រោមការដឹកនាំដ៏ឈ្លាស់វៃរបស់សម្តេចពិជ័យសេនា ក្រសួងការពារជាតិ សម្រេចបានសមិទ្ធផលសំខាន់ៗ ដែលជាស្នាដៃរបស់កម្ពុជា គឺឯកសារទស្សនទានចំនួន ៣ ឯកសារពិភាក្សាចំនួន ២ ចក្ខុវិស័យភ្នំពេញ និងសេចក្តីថ្លែងការណ៍រួម នៃកិច្ចប្រជុំរដ្ឋមន្ត្រីការពារជាតិអាស៊ា និងកិច្ចប្រជុំរដ្ឋមន្ត្រីការពារជាតិអាស៊ាន-បូក ឆ្នាំ២០២២។ កម្ពុជាបានរៀបចំឲ្យមាននូវកិច្ចប្រជុំរដ្ឋមន្ត្រីការពារជាតិអាស៊ាន និងកិច្ចប្រជុំរដ្ឋមន្ត្រីការពារជាតិអាស៊ាន-បូក ជារូបវន្ត ទោះបីនៅមានភាពប្រឈមខ្លះពីជម្ងឺកូវីដ-១៩ក៏ដោយ។ ជាឱកាស វិសេសវិសាលរបស់កម្ពុជា ដែលផ្តល់ទីតាំងនៅខេត្តសៀមរាប ជាទឹកដីអច្ឆរិយៈជូនដល់រដ្ឋមន្ត្រីការពារជាតិសហអាមេរិក-ចិន បានជួបពិភាក្សាគ្នាលើបញ្ហាសន្តិសុខតំបន់។ និងបានផ្តល់ឱកាសជូនដល់រដ្ឋមន្ត្រីការពារជាតិ អូស្ត្រាលី សហរដ្ឋអាមេរិក សាធារណរដ្ឋកូរ៉េ ជួបប្រជុំទ្វេភាគីផ្លូវការជាមួយសម្តេចពិជ័យសេនា ដើម្បីផ្លាស់ប្តូរទស្សនៈ និងកិច្ចសហប្រតិបត្តិការ រវាងក្រសួងការពារជាតិទាំងពីរ ហើយក៏បានឈានដល់ចុះអនុសារណៈយោគយល់ផងដែរ។
ក្នុងកិច្ចប្រជុំនេះ សម្តេចពិជ័យសេនា ទៀ បាញ់ ក៏បានឯកភាពឲ្យមានការចងក្រងឯកសារធ្វើជាម្ចាស់ផ្ទះនៃកិច្ចប្រជុំរដ្ឋមន្ត្រីការពារជាតិអាស៊ាន និងកិច្ចប្រជុំពាក់ព័ន្ធ ឆ្នាំ២០២២នេះ ទុកសម្រាប់ការសិក្សារៀនសូត្ររបស់នាយទាហាននៃ ខ.ភ.ម សម្រាប់ការរៀបចំធ្វើជាម្ចាស់ផ្ទះ នៃកិច្ចប្រជុំនៅលើកក្រោយៗទៀត ៕
