នាយឧត្តមសេនីយ៏ មាស សាវ៉ន អប់រំចិត្តសាស្ត្រ ផ្សព្វផ្សាយសភាពការណ៍ថ្មីៗនៅទីបញ្ជាការយោធភូមិភាគទី៤
ដើម្បីកំណត់នូវទស្សនៈសតិអារម្មណ៏របស់ខ.ភ.ម ឲ្យស្របតាមរដ្ឋធម្មនុញ្ញ ក៏ដូចជាគោល នយោបាយ របស់ រាជរដ្ឋាភិបាល និងគោរពឲ្យបាននូវ ច្បាប់ បទវិន័យ និងបទបញ្ជារបស់កងទ័ពឲ្យបាន ល្អប្រសើរ។ នៅទីបញ្ជាការ យោធភូមិភាគទី៤ នាថ្ងៃទី១៣ ខែកុម្ភៈ ឆ្នាំ២០២៣ នាយឧត្តមសេនីយ៏ មាស សាវ៉ន អគ្គនាយក អគ្គនាយកដ្ឋានយោធសេវា ក្រសួងការពារជាតិ បានអញ្ជើញធ្វើការផ្សព្វផ្សាយការងារអប់រំចិត្តសាស្ត្រ និងសភាពការណ៍ថ្មីៗជូនដល់ នាយទាហាន នាយទាហានរង និងពលទាហាន ដែលចំណុះឲ្យទីបញ្ជាការយោធភូមិភាគទី៤ ប្រមាណជាង ១៧០នាក់។
មានប្រសាសន៏ទៅកាន់នាយទាហាន នាយទាហានរង និងពលទាហាន ក្នុងឱកាសនោះ នាយឧត្តមសេនីយ៏ មាស សាវ៉ន បានតាងនាមរាជរដ្ឋាភិបាល និងថ្នាក់ដឹកនាំក្រសួងការពារជាតិ, អគ្គមេបញ្ជាការនៃខ.ភ.ម បានធ្វើការកោតសរសើរ និងវាយតំលៃខ្ពស់ចំពោះការខិតខំប្រឹងប្រែង បំពេញការងារជាប្រវត្តិសាស្រ្ត ក្នុងភារកិច្ច បំរើជាតិ, កសាង អង្គភាព, ហ្វឹកហ្វឺនកំលាំងព្រមទាំង បានចូលរួមជាមួយរាជរដ្ឋាភិបាលក្នុងការកសាង និងអភិវឌ្ឍ ប្រទេសឱ្យមាន ការរីកចំរើនរបស់នាយទាហាន នាយទាហានរង និងពលទាហាន យើងនៅទីនេះកន្លងមក។ ក្នុងឱកាសនោះ ផងដែរ ឯកឧត្តម ក៏បានបញ្ជាក់ជូនឲ្យ បានជ្រាបផងដែរអំពីសភាពការណ៍ទូទៅ នៅកម្ពុជាដែលកំពុងមានការវិវត្តន៏រីកចំរើនជាបន្តបន្ទាប់ និងសភាពការណ៏ប្រែប្រួលថ្មីមួយចំនួនទាំងក្នុងប្រទេស ក្នុងតំបន់ និងសាកលលោក ជាពិសេសសភាពការណ៏ ជាតិដែលបានកើតឡើងកន្លងមកថ្មីៗនេះ។ ឆ្នាំ២០២២ ដែលទើបតែកន្លងទៅថ្មីនេះ ទោះបីប្រទេសកម្ពុជាយើង ត្រូវប្រឈម នឹងការរាតត្បាត នូវជំងឺកូវីដ-១៩ គ្រោះធម្មជាតិ សង្គ្រាមពាណិជ្ជកម្ម ភាពបត់បែន និងការប្រែប្រួលយ៉ាងស្មុគស្មាញ បំផុត នៃសភាពការណ៍អន្តរជាតិយ៉ាងណាក្តី ក៏រាជរដ្ឋាភិបាលក្រោមការដឹកនាំ ប្រកបដោយគតិបណ្ឌិត របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានពុះពារគ្រប់ឧបសគ្គ ធ្វើដំណើរទៅមុខជានិច្ចនៅលើមាគ៌ា ដ៏ត្រឹមត្រូវ សម្រេចបានជោគជ័យយ៉ាងធំធេង បង្កើតបានសមិទ្ធផលធំៗជាប្រវត្តិសាស្ត្រជូនជាតិមាតុភូមិ។ ជាក់ស្តែង ក្នុងរយៈពេលប៉ុន្មានឆ្នាំចុងក្រោយនេះ សភាពការណ៍អន្តរជាតិនៅតែបន្តវិវត្ត យ៉ាងស្មុគស្មាញ ទាំងក្នុងក្របខណ្ឌ តំបន់ និងពិភពលោក ដូចជាបញ្ហាសង្គ្រាមនៅអ៊ុយក្រែន, នៅឧបទ្វីបកូរ៉េ, កោះតៃវ៉ាន់ ដែលជាបច្ច័យនៃការប្រកួតប្រជែង ដ៏ស្រួចស្រាល តានតឹងនិងគ្រោះថ្នាក់បំផុតរបស់ មហាអំណាច ធ្វើឱ្យធ្លាក់ចុះនូវកំណើនសេដ្ឋកិច្ច ជម្រុញឱ្យមានអតិផរណា ការរាំងស្ទះខ្សែចង្វាក់ផ្គត់ផ្គង់ បញ្ហាអសន្តិសុខស្បៀង និងថាមពល។ល។ បញ្ហាទាំងអស់នេះ បានជះឥទ្ធិពល អវិជ្ជមាន ទៅលើប្រទេស ទាំងឡាយក្នុងពិភពលោក រាប់ទាំងប្រទេសកម្ពុជាយើងផង ប៉ុន្តែរាជរដ្ឋាភិបាល បានដាក់ចេញ នូវគោលនយោបាយ និងបណ្តាវិធានការជាច្រើនប្រកបដោយប្រសិទ្ធភាព ធ្វើឱ្យធានាបាននូវស្ថិរភាព ជីវភាព សេដ្ឋកិច្ច សង្គម ហើយយើងនៅតែការពារបានយ៉ាងរឹងមាំសុខសន្តិភាព ស្ថិរភាព និងសណ្តាប់ធ្នាប់ សាធារណៈ និងការធ្វើឱ្យលេចត្រដែត ឡើងនូវកិត្យានុភាពជាតិនៅលើឆាកអន្តរជាតិ។ រាជរដ្ឋាភិបាល ដែលមាន ខ ភ ម ជាស្នូល បានការពាររឹងមាំឯករាជ្យ អធិបតេយ្យ និងបូរណភាពទឹកដី ប្រឆាំងការជ្រៀត ជ្រែក របស់បរទេសចូលកិច្ចការផ្ទៃក្នុងកម្ពុជា ថែរក្សាសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់ និងសុខសុវត្ថិភាព សង្គមបានល្អ ធ្វើឱ្យបរាជ័យឧបាយកល ទុច្ចរិតរបស់ពួក ប្រឆាំងជ្រុលនិយម និងមជ្ឈដ្ឋានអគតិនានា ដែលបានប្រើប្រាស់ ចលនាបដិវត្តន៍ពណ៌ ប៉ុនប៉ងផ្តួលរំលំ រាជរដ្ឋាភិបាលស្របច្បាប់ ការពារសង្គមជាតិមិនឱ្យធ្លាក់ក្នុងអស្ថិរភាព អសន្តិសុខ ការបែកបាក់ជាតិ និង សង្គ្រាមសារជាថ្មីទៀត ធ្វើឱ្យសង្គមជាតិបន្តដំណើរទៅមុខឥតឈប់លើមាគ៌ា សន្តិភាព ប្រជាធិបតេយ្យ នីតិរដ្ឋ និងការអភិវឌ្ឍន៍។
ឯកឧត្តម អគ្គនាយក អគ្គនាយកដ្ឋានយោធសេវា បានបញ្ជាក់ថា៖ ខ.ភ.ម គឺជាកម្លាំងស្នូល និងជាឆ្អឹងខ្នងដែល មិនអាចខ្វះបានក្នុងការចូលរួមចំណែក ការពារជាតិ កសាង និងអភិវឌ្ឍន៍ប្រទេសជាតិ។ ខ.ភ.ម គឺមានភារកិច្ច ការពារជាតិ, សាសនា, ព្រះមហាក្សត្រ និងការពារបូរណភាពទឹកដី, សហការជាមួយស្ថាប័ន នានា ដើម្បីចូលរួមអភិវឌ្ឍន៏ប្រទេស, បង្កើនកិច្ចសហប្រតិបត្តិការ អន្តរជាតិ។ ខ.ភម ត្រូវចាំបាច់មាន ការហ្វឹកហ្វឺន បណ្ដុះបណ្តាល ធនធានមនុស្សជាប្រចាំ ដើម្បីពង្រឹង សមត្ថភាពការពារ ព្រំដែន, ទប់ស្កាត់ និងបង្ក្រាប ឧក្រឹដ្ឋឆ្លងដែន និងប្រឆាំងអំពើភេរវកម្មនានា។ ជាចុងក្រោយឯកឧត្តមបានជំរុញ និងលើកទឹកចិត្តដល់នាយទាហាន នាយទាហានរង និងពលទាហាន ទាំងអស់ ឲ្យបន្តចូលរួមថែរក្សា ពង្រឹងសន្តិសុខ សុវត្ថិភាពរបៀបរៀបរយសណ្តាប់ធ្នាប់ សាធារណៈ រួមចំណែកកសាង ភូមិ-ឃុំមានសុវត្ថិភាព ៕
