មេបញ្ជាការកងកម្លាំងស្វ័យការពារជើងគោកជប៉ុន ចូលជួបសំដែងការគួរសមនាយឧត្តមសេនីយ៍ នាង ផាត
នាយឧត្តមសេនីយ៍ នាង ផាត រដ្ឋលេខាធិការ ប្រចាំការក្រសួងការពារជាតិ បានអនុញ្ញាតិឱ្យ នាយឧត្តមសេនីយ៍ យូស៊ីដា យ៉ូស៊ីហ៊ីដេ (YOSHIDA Yoshihide) មេបញ្ជាការកងកម្លាំងស្វ័យការពារជើងគោកជប៉ុន ចូលជួបសំដែងការគួរសម និងពិភាក្សាការងារ នៅទីស្ដីការក្រសួងការពារជាតិ នៅសៀលថ្ងៃទី១៥ ខែកុម្ភៈ ឆ្នាំ២០២៣ ក្នុងឱកាសដែល ឯកឧត្តម អញ្ជើញមកបំពេញដំណើរទស្សនកិច្ចផ្លូវការ និងមិត្តភាពនៅ ព្រះរាជាណាចក្រកម្ពុជា តបតាមការអញ្ជើញរបស់មេបញ្ជាការកងទ័ពជើងគោក នៃកងយោធពលខេរភូមិន្ទ។ ក្នុងជំនួប នាឱកាសនោះ ជំនួសមុខឱ្យសម្ដេចពិជ័យសេនា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ឯកឧត្តម នាង ផាត បានស្វាគមន៍ចំពោះដំណើរទស្សនកិច្ច របស់មេបញ្ជាការកងកម្លាំងស្វ័យការពារជើងគោកជប៉ុន មកកាន់កម្ពុជា ដែលនេះគឺជាជំហ៊ានថ្មីមួយទៀត ក្នុងការជំរុញកិច្ចទំនាក់ទំនងលើវិស័យយោធា និងយោធា រវាងប្រទេសកម្ពុជា និងប្រទេសជប៉ុន ជាពិសេសការពង្រឹងពង្រីកកិច្ចសហប្រតិបត្តិការ រវាងកងទ័ពជើងគោក នៃប្រទេសទាំងពីរ ឲ្យកាន់តែមានភាពជិតស្និទ្ធ។ ឯកឧត្តម បានថ្លែងអំណរគុណដល់កងកម្លាំងស្វ័យការពារជើងគោកជប៉ុន ដែលជានិច្ចជាកាលតែងបានគាំទ្រលើវិស័យហ្វឹកហ្វឺន បណ្ដុះបណ្ដាលធនធានមនុស្ស ក្នុងជួរកងយោធពលខេមរភូមិន្ទ ទាំងការបណ្ដុះបណ្ដាលរយៈពេលវែង និងជំនាញផ្សេងៗ ក្នុងនោះ ក៏មានជំនាញវិស្វកម្ម ដែលជាផ្នែកមួយនៃការពង្រឹងសមត្ថភាពកងទ័ពកម្ពុជា នៅក្នុងការចូលរួមបេសកកម្មមនុស្សធម៌ ថែរក្សាសន្តិភាព ក្នុងក្របខណ្ឌអង្គការសហប្រជាជាតិ។
ជាការឆ្លើយតប នាយឧត្តមសេនីយ៍ យូស៊ីដា យូស៊ីហ៊ីដេ (YOSHIDA Yoshihide) បានសម្ដែងនៅភាពសប្បាយរីករាយចំពោះដំណើរទស្សនកិច្ចជាផ្លូវការ និងមិត្តភាពលើកទីមួយនេះ នៅកម្ពុជា ព្រមទាំងបានបង្ហាញនូវការកត់សម្គាល់ចំពោះវឌ្ឍនភាព នៃការអភិវឌ្ឍរីកចម្រើនយ៉ាងខ្លាំងក្នុងប្រទេសកម្ពុជា និងបានកោតសរសើរចំពោះភាពជាដៃគូរ និងទំនាក់ទំនងកិច្ចសហប្រតិបត្តិការដ៏ល្អរវាងកម្ពុជា-ជប៉ុន ក្នុងរយៈកាលកន្លងមកនេះ ជាពិសេសផ្ដើមចេញពីចំណងមិត្តភាពផ្ទាល់ រវាងប្រមុខរាជរដ្ឋាភិបាល នៃប្រទេសទាំងពីរដែលធ្វើឲ្យទំនាក់ទំនងនេះកាន់តែមានភាពជិតស្និទ្ធ។ ក្នុងនោះ នាយឧត្តមសេនីយ៍ យូស៊ីដា យូស៊ីហ៊ីដេ ក៏បានគូសបញ្ជាក់អំពីការបន្តជួយដល់កងទ័ពកម្ពុជាលើការកសាងពង្រឹងសមត្ថភាពតាមរយៈការហ្វឹកហ្វឺនលើជំនាញសំខាន់ៗ ដើម្បីឆ្លើយតប នឹងស្ថានការណ៍សន្តិសុខ មិនមែនប្រពៃណី ដូចជាការវាយប្រហារដោយប្រើប្រាស់ប្រព័ន្ធអ៊ីនធើណេត និងបច្ចេកវិទ្យាទំនើប បញ្ហាគ្រោះមហន្តរាយ និងជំងឺរាតត្បាតនានា ព្រមទាំងការគាំទ្រឱ្យមានការរៀបចំលំហាត់រួមក្នុងកម្រិតណាមួយនៅពេលអនាគត។ ឆ្លៀតក្នុងឱកាសនោះ ដែរនាយឧត្តមសេនីយ៍ យូស៊ីដា យូស៊ីហ៊ូដេ ក៏បានថ្លែងអំណរគុណផងដែរ ចំពោះកម្ពុជាក្នុងនាមជាប្រទេសទី១ នៅអាស៊ីអាគ្នេយ៍ ដែលបានគាំទ្រគំនិតផ្តួចផ្តើម “យុទ្ធសាស្ត្រតំបន់ឥណ្ឌូ-ប៉ាស៊ីហ្វិកសេរី និងបើកចំហរ (FOIP)” របស់ជប៉ុន ដើម្បីសន្តិភាព ស្ថិរភាព ការអភិវឌ្ឍ និងវិបុលភាពរួមនៅក្នុងតំបន់ និងលើសកលលោក។ នាយឧត្តមសេនីយ៍ យូស៊ីដា យូស៊ីហ៊ីដេ បានបញ្ជាក់ថា កងស្វ័យការពារជើងគោកជប៉ុន និងបន្តខិតខំប្រឹងប្រែងធ្វើឲ្យទំនាក់ទំនងកងទ័ពប្រទេសទាំងពីរ ពិសេសកងទ័ពជើងគោក នៃប្រទេសទាំងពីរ ឲ្យកាន់តែល្អប្រសើរតាមរយៈនៃការបង្កើនកិច្ចសហប្រតិបត្តិការនានា ឱ្យកាន់តែច្រើនឡើងថែមទៀត ៕
