ពិធីសម្ពោធដាក់ឱ្យប្រើប្រាស់ជាផ្លូវការអគាររដ្ឋបាល សាលប្រជុំ និងគម្រោង វារីវប្បកម្មអាងបង្កាត់ពូជ និងភ្ញាស់ត្រី
សម្តេចពិជ័យសេនា ទៀ បាញ់ ឧបនាយករដ្ឋមន្តី រដ្ឋមន្ត្រីក្រសួងការពារជាតិ បានអញ្ជើញជាអធិបតីភាពក្នុងពិធីសម្ពោធដាក់ឱ្យប្រើប្រាស់ជាផ្លូវការអគាររដ្ឋបាល សាលប្រជុំ និងគម្រោង វារីវប្បកម្មអាងបង្កាត់ពូជ និងភ្ញាស់ត្រី ក្រោមមូលនិធិសម្ដេចពិជ័យសេនា នាព្រឹកថ្ងៃទី១៦ ខែកុម្ភៈ ឆ្នាំ២០២៣។
អគាររដ្ឋបាលថ្មីនេះ ស្ថិតនៅខណ្ឌកំបូល រាជធានីភ្នំពេញ បានសាងសង់លើដីទំហំ ១ម៉ឺន២ពាន់ម៉ែត្រក្រឡា មានកម្ពស់៤ជាន់ ដែលមានបណ្តោយប្រវែង៣០,៥០ម៉ែត្រ និងទទឹងប្រវែង១១,៥០ម៉ែត្រ ដោយមានសាលប្រជុំ០២បន្ទប់, បន្ទប់ទទួលភ្ញៀវ០២, បន្ទប់ថ្នាក់ដឹកនាំ០៦, បន្ទប់នាយទាហានបំពេញការងារតាមការិយាល័យជំនាញ១២បន្ទប់, បំពាក់ជណ្តើរយន្ត តុ ទូ កៅអី កុំព្យូទ័រ និងសម្ភារៈ ការិយាល័យ រូមជាមួយហេដ្ឋារចនាសម្ព័ន្ធរណប ដូចជាអគារផ្ទះបាយ០១ខ្នង រោងដាក់រថយន្ត រោងដាក់ម៉ូតូ រោងវារីវប្បកម្មបង្កាត់ពូជភ្ញាស់កូនត្រី រោងម៉ាស៊ីនភ្លើង និងសួនច្បារ។
ក្នុងសុន្ទរកថា និងរបាយការណ៍ស្វាគមន៍ ឧត្តមសេនីយ៍ឯក អ៊ុក កោសា នាយក នាយកដ្ឋានអភិវឌ្ឍន៍ ក្រសួងការពារជាតិ បានឲ្យដឹងថា៖ អគាររដ្ឋបាល នាយកដ្ឋានអភិវឌ្ឍន៍ គឺជាសមិទ្ធផល ដែលបានកើតឡើងតាមរយៈពិធីសារ រវាងក្រសួងការពារជាតិកម្ពុជា និងក្រសួងការពារប្រទេសវៀតណាម នៅឆ្នាំ២០១៦ និងការចូលរួមពីសំណាក់អង្គភាព និងក្រុមហ៊ុននានា នៃកងទ័ពប្រជាជនវៀតណាម ជូននាយកដា្ឋនអភិវឌ្ឍន៍ ក្រសួងការពារជាតិ។ ជាមួយគ្នានេះនាយទាហាន ក្នុងនាយកដ្ឋានអភិវឌ្ឍន៍ ក៏បានខិតខំកៀងគរស្វែងរកការជួយគាំទ្រគ្រឿងបំពាក់បន្តបន្ទាប់ ដូចជា តុ ទូ កុំព្យូទ័រ គឿងសង្ហារឹមជាច្រើនផងដែរ។ នាយកដ្ឋាន មានកសិដ្ឋានមួយកន្លែង ស្ថិតនៅក្នុងស្រុកភ្នំក្រវ៉ាញ ខេត្តពោធិ៍សាត់ ដែលកំពុង និងធ្វើការអភិវឌ្ឍន៍ជាបណ្ដើរៗលើផ្ទៃដីទំហំ ៤០០ហិចតា។ ដោយឡែកការបង្កើតគម្រោងវារីវប្បកម្មអាងបង្កាត់ពូជ និងភ្ញាស់ត្រី ក្រោមមូលនិធិ សម្ដេចពិជ័យសេនា គឺជាគម្រោងបានបង្កើតឡើង ក្នុងគោលបំណងបង្កាត់ពូជ និងភ្ញាស់កូនត្រីទឹកសាប ដែលមានទីតាំងស្ថិតក្នុងបរិវេណនាយកដ្ឋានអភិវឌ្ឍន៍ និងបានចំណាយថវិកា សាងសង់ បំពាក់ឧបករណ៍ សម្ភារៈ ហេដ្ឋារចនាសម្ព័ន្ធធានាបម្រើឲ្យស្ថានីយ៍នេះ អស់ប្រមាណជិត១០ម៉ឺនដុល្លារអាមេរិក។
នៅក្នុងពិធីសម្ពោធនោះ ក៏បានប្រកាសព្រះរាជក្រឹត្យ និងអនុក្រឹត្យតែងតាំងផ្លាស់ប្តូរមុខងារ ឧត្តមសេនីយ៍ឯក អ៊ុក កោសា នាយក នាយកដ្ឋានអភិវឌ្ឍន៍ ក្រសួងការពារជាតិ បច្ចុប្បន្នជាអនុរដ្ឋលេខាធិការ ក្រសួងការពារជាតិ ហើយឧត្តមសេនីយ៍ត្រី អ៊ុក ហឿនពិសី នាយករង នាយកដ្ឋានអភិវឌ្ឍន៍ ក្រសួងការពារជាតិ បច្ចុប្បន្នមានឋានន្តរសក្តិថ្នាក់ ឧត្តមសេនីយ៍ទោ និងមានមុខងារ ជានាយក នាយកដ្ឋានអភិវឌ្ឍន៍ ក្រសួងការពារជាតិ។
សម្តេចពិជ័យសេនា ទៀ បាញ់ បានថ្លែងក្នុងឱកាសនោះថា អគាររដ្ឋបាល និងសាលប្រជុំ នាយកដ្ឋានអភិវឌ្ឍន៍ ក្រសួងការពារជាតិ ដែលបានដាក់សម្ពោធនាពេលនេះ គឺជាសមិទ្ធផលថ្មីមួយ ក្នុងចំណោមសមិទ្ធផលជាច្រើនទៀត ដែលជាជំនួយឧបត្ថម្ភពីក្រសួងការពារប្រទេសវៀតណាម ជូនក្រសួងការពារជាតិកម្ពុជា។ សម្តេចបានសម្តែងនូវការអបអរសាទរចំពោះស្នាដៃ និងសមិទ្ធផលរបស់នាយកដ្ឋានអភិវឌ្ឍន៍ខិតខំសម្រេចបានជាបន្តបន្ទាប់នាពេលកន្លងមក និងបានកោតសរសើរ និងវាយតម្លៃខ្ពស់ចំពោះនាយទាហាន ពលទាហាន នាយកដ្ឋានអភិវឌ្ឍន៍ ដែលបានពុះពារអនុវត្តតួនាទីភារកិច្ច ស្របតាមផែនការកែទម្រង់របស់ ខ.ភ.ម។ សម្តេចពិជ័យសេនា បានលើកទឹកចិត្តដល់នាយទាហាន និងពលទាហានទាំងអស់ បន្តជម្រុញ និងអនុវត្តជំនាញអភិវឌ្ឍន៍នេះទៅតាមកងឯកភាពក្នុង ខ.ភ.ម ឲ្យកាន់តែប្រសើរឡើងថែមទៀត តាមតួនាទី និងភារកិច្ចដែលក្រសួងការពារជាតិបានប្រគល់ជូន។ សម្តេចពិជ័យសេនា ទៀ បាញ់ មានជំនឿជឿជាក់ថា បន្ទាប់ពីសម្ពោធអគាររដ្ឋបាលនេះ នាយកដ្ឋានអភិវឌ្ឍន៍នឹងមានសមត្ថភាពគ្រប់គ្រាន់ ក្នុងការបំពេញភារកិច្ចប្រចាំថ្ងៃ និងបន្តសហការជាមួយជំនាញអភិវឌ្ឍគ្រប់កងឯកភាពក្នុងខ.ភ.ម បំពេញតាមតួនាទីភារកិច្ចបានកាន់តែល្អប្រសើរឡើងថែមទៀត សំដៅបង្កើតសមិទ្ធផលស្នាដៃថ្មីៗ រួមចំណែកអភិវឌ្ឍសេដ្ឋកិច្ចសង្គម។
សម្តេចពិជ័យសេនា ទៀ បាញ់ បានបញ្ជាក់ថា៖ ក្នុងរយៈពេលប៉ុន្មានឆ្នាំចុងក្រោយនេះ ទោះបីប្រឈមនឹងការរាតត្បាតនៃជម្ងឺកូវីដ១៩ គ្រោះធម្មជាតិ សង្គ្រាមពាណិជ្ជកម្ម ភាពបត់ប៉ែន និងការប្រែប្រួលយ៉ាងស្មុគស្មាញបំផុតនៃសភាពការណ៍ជាតិ និងអន្តរជាតិយ៉ាងណាក្តី ប៉ុន្តែរាជរដ្ឋាភិបាល ក្រោមការដឹកនាំប្រកបដោយកិត្តិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី បានពុះពារគ្រប់ឧបសគ្គ ធ្វើដំណើរទៅមុខជានិច្ចនៅលើមាគ៌ាដ៏ត្រឹមត្រូវ ភាពអង់អាច និងបត់ប៉ែនតាមការវិវត្តន៍សភាពការណ៍ជាតិ-អន្តរជាតិ សម្រេចបានជោគជ័យយ៉ាងធំធេង បង្កើតបានសមិទ្ធផលធំៗជាប្រវត្តិសាស្ត្រជូនជាតិមាតុភូមិ។ ហើយ ខ.ភ.ម នៅតែជាកម្លាំងស្នូល ដើម្បីធានាការពារសន្តិភាព ឯករាជ្យ អធិបតេយ្យ បូរណភាពទឹកដីបានយ៉ាងគង់វង្ស ស្ថិតស្ថេរគ្រប់កាលៈទេសៈ ធ្វើឲ្យប្រជាជនបានរស់នៅសុខដុមរម្យនាលើទឹកដីរបស់ខ្លួន និងមានឱកាសពេញលេញសម្រាប់ការអភិវឌ្ឍន៍សេដ្ឋកិច្ចសង្គម ៕
