ឯកឧត្តម ជៀង អំ ផ្សព្វផ្សាយការងារអប់រំចិត្តសាស្ត្រឆ្នាំ២០២៣ នៅទីបញ្ជាការដ្ឋានយោធភូមិភាគ ទី១
កងយោធពលខេមរភូមិន្ទ ចាំបាច់ត្រូវធ្វើការ កែទម្រង់ឱ្យទៅជាកម្លាំងការពារជាតិដ៏រឹងមាំមានវិន័យ ម៉ឺងម៉ាត់ និងមានសមត្ថភាព គ្រប់គ្រាន់ ដើម្បីឆ្លើយតបប្រកបដោយប្រសិទ្ធភាព និងមានភាពបត់បែន ព្រមទាំង រួមចំណែកក្នុងការអភិវឌ្ឍន៍ និងលើកតម្កើងកិត្យានុភាព របស់ប្រទេសជាតិ នៅលើឆាកអន្តរជាតិ។ នេះជាប្រសាសន៏របស់ នាយឧត្តមសេនីយ៏ ជៀង អំ រដ្ឋលេខាធិការ ក្រសួងការពារជាតិ ដែលបានលើកឡើងក្នុងពិធីផ្សព្វផ្សាយ ស្តីពីចាត់តាំងអនុវត្តការងារ អប់រំចិត្តសាស្ត្រ និងសភាពការណ៏ថ្មីៗ ឆ្នាំ២០២៣ នៅទីបញ្ជាការដ្ឋាន យោធភូមិភាគទី១ នាព្រឹកថ្ងៃទី២១ ខែកុម្ភៈ ឆ្នាំ២០២៣។
ឯកឧត្តម បានបន្តទៀតថា៖ ទោះស្ថិតក្នុងកាលៈទេសៈណាក៏ដោយ ការកសាងកងទ័ព អំពីសតិអារម្មណ៍ នយោបាយ ចិត្តសាស្ត្រ គឺជាគន្លឹះក្នុងការកសាងពង្រឹងកងកម្លាំងប្រដាប់អាវុធ ឱ្យបានរឹងមាំតាមរយៈការបណ្ដុះបណ្ដាល អប់រំរៀនសូត្រ លើកកម្ពស់ មនសិកាស្នេហាជាតិ ស្មោះត្រង់ គោរពវិន័យ បទបញ្ជា របស់កងទ័ព អត្តចរិក សីលធម៌ ថ្លៃថ្នូរស្អាតស្អំ ប្រយុទ្ធប្តូរផ្តាច់ និងហ៊ានពលិកម្ម ដើម្បីបុព្វហេតុជាតិមាតុភូមិ។ ចំពោះសភាពការណ៏អន្តរជាតិ ឯ.ឧ ជៀង អំ បានលើកឡើងថា៖ ពិភពលោកក្នុងរយៈពេលប៉ុន្មានឆ្នាំចុងក្រោយនេះ មានការផ្ទុះឡើងនូវជំងឺ កូវីដ-១៩ បញ្ហាវិបត្តិរដ្ឋប្រហារយោធានៅភូមា ការផ្ទុះសង្គ្រាម រវាងរុស្ស៊ី និងអ៊ុយក្រែន។ ចំពោះសភាពការណ៏ជាតិ ឯ.ឧ រដ្ឋលេខាបានលើកឡើងថា៖ ក្រោមការដឹកនាំរបស់ សម្តេចតេជោ ជាប្រមុខ ខភម បានបំពេញ តួនាទីជាស្នូលក្នុងការការពារ សន្តិភាព ការពារបូរណភាពទឹកដី អធិបតេយ្យភាពជាតិរឹងមាំ ជាពិសេស នៅក្នុងសភាពការណ៍ នៃការឆ្លងរាលដាល ជំងឺកូវីដ-១៩។ ខភម គឺជាកម្លាំងឈានមុខ ប្រយុទ្ធប្រឆាំងនឹងការឆ្លងរាតត្បាតជំងឺកូវីដ-១៩ ក្នុងការបំពេញភារកិច្ច អនុវត្ត ម៉ឺងម៉ាត់ ប្រកបដោយប្រសិទ្ធភាព និងស័ក្ដិសិទ្ធភាពតាមវិធានការ របស់រាជរដ្ឋាភិបាល ដែលបានដាក់ចេញ។ សរុបសេចក្ដីមកកងទ័ពរបស់យើង បន្ទាប់ពីសង្គ្រាម យើងបានចូលរួមយ៉ាងសកម្ម នៅក្នុងយុទ្ធនាការទាំងឡាយ ដែលពាក់ព័ន្ធជាមួយនឹងការកើតឡើងនូវគ្រោះមហន្តរាយ យើងដូចជាទឹកជំនន់ ខ្យល់ព្យុះ គ្រោះរាំងស្ងួត។ សក្ខីភាពទាំងនេះ បានបង្ហាញច្បាស់ថាកងទ័ពរបស់យើង ក្នុងរយៈពេលកន្លងទៅនេះ បានធ្វើកិច្ចការជាច្រើន ស្របជាមួយនឹងគោលនយោបាយខឿនការពារជាតិរបស់ប្រជាជន ពោលគឺនៅពេលដែលមានតម្រូវការ ប្រជាជនបានចូលរួម ប៉ុន្តែនៅពេលដែលប្រជាជនជួបទុក្ខលំបាក យើងក៏បានចូលរួមជួយទៅដល់ប្រជាជនវិញ យ៉ាងឆាប់រហ័ស។
ឯកឧត្តម ជៀង អំ បានបន្តទៀតថា៖ ក្នុងឆ្នាំ២០២៣ និងនៅបណ្តាឆ្នាំខាងមុខ តាមផែនការរបស់រាជ រដ្ឋាភិបាល នឹងត្រូវជំរុញខ្លាំងនូវការកែទម្រង់ស៊ីជម្រៅ និងមុតស្រួច ដើម្បីធានាសុខសន្តិភាព ស្ថិរភាព និងចីរភាព កំណើនសេដ្ឋកិច្ច សំដៅលើកកម្ពស់ភាពសុខដុមរមនា ជូនប្រជាពលរដ្ឋលើមាគ៌ាឆ្ពោះទៅសម្រេចចក្ខុវិស័យកម្ពុជា ជាប្រទេសមានចំណូលមធ្យម កម្រិតខ្ពស់នៅឆ្នាំ២០៣០ និងឈានទៅសម្រេច ចក្ខុវិស័យកម្ពុជា ជាប្រទេសមានចំណូលខ្ពស់នៅឆ្នាំ២០៥០។ ចំពោះមុខការអប់រំសតិអារម្មណ៍ នយោបាយចិត្តសាស្ត្រ និងការងារមហាជន ក៏ដូចជាការអនុវត្ត គោលនយោបាយចាត់តាំងកងទ័ព ឯ.ឧ ជៀង អំ បានបញ្ជាក់ថា៖ យើងត្រូវតែបន្តពង្រឹងការអនុវត្តន៍ តាមកម្មវិធីនយោបាយ យុទ្ធសាស្ត្រ ចតុកោណដំណាក់កាលទី៤ របស់រាជរដ្ឋាភិបាលនីតិកាលទី៦ នៃរដ្ឋសភា។ បន្តផ្សព្វផ្សាយ និងអប់រំអំពីច្បាប់របស់រដ្ឋបទវិន័យទូទៅចំពោះយោធិន។ ត្រូវយកចិត្តទុកដាក់ចំពោះយោធិនទាំងមុន ពេលចូលនិវត្តន៍ និងក្រោយចូលនិវត្តន៍ ទន្ទឹមនឹងនោះ ក៏ត្រូវយកចិត្តទុកដាក់ចំពោះការងារអតីតយុទ្ធជន។ បន្តអប់រំអំពីសភាពការណ៍ និងភារកិច្ចខ.ភ.ម ជាពិសេស ការងារហ្វឹកហ្វឺនជំនាញ អាជីព និងបច្ចេកទេសកងទ័ព ក៏ដូចជាការងារអប់រំចិត្តសាស្ត្រ ទូទាំងខ.ភ.ម ដើម្បីជំរុញ និងលើកកម្ពស់ ដល់ការងារ កែទម្រង់ ក្នុងខ.ភ.ម និងអនុវត្ត ជាប្រចាំតាម អភិក្រម៥ "ឆ្លុះកញ្ចក់ ងូតទឹក ដុះក្អែល ព្យាលបាល និងវះកាត់” និង បាវចនា២ "កែទម្រង់ខាងក្នុង បង្កើនមិត្តខាងក្រៅ ក្នុងស្មារតីឯករាជ្យ” ៕
