សម្ដេចពិជ័យសេនា ទៀ បាញ់ ជូនដំណើរកងកំទេចគ្រឿងផ្ទុះលេខ៩៨ ចេញបំពេញបេសកកម្មរក្សាសន្តិភាព
នៅទីស្តីការក្រសួងការពារជាតិ នាព្រឹកថ្ងៃទី២១ ខែកុម្ភៈ ឆ្នាំ២០២៣ បានរៀបចំពិធីជូនដំណើរកងកំទេចគ្រឿងផ្ទុះលេខ៩៨ ចេញបំពេញបេសកកម្មរក្សាសន្តិភាព អង្គការសហប្រជាជាតិនៅសាធារណរដ្ឋអាហ្វ្រិកកណ្តាល ស្ថិតក្រោមអធិបតីភាព សម្ដេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ និងឯកឧត្តម ចូសិហ្វ ស៊ូអើ (Joseph Scheuer) អ្នកសម្របសម្រួលអង្គការសហប្រជាជាតិ ប្រចាំកម្ពុជា។
នៅក្នុងរបាយការណ៍ស្វាគមន៍ នាយឧត្តមសេនីយ៍ សែម សុវណ្ណនី អគ្គនាយក មជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បានឲ្យដឹងថា រយៈពេល១៧ឆ្នាំមកនេះ កម្ពុជាបានទទួលស្នាដៃយ៉ាងធំធេងគួរជាទីមោទនៈ ក្នុងការចាត់បញ្ជូនកម្លាំងចូលរួមបំពេញបេសកកម្មរក្សាសន្តិភាព របស់អង្គការសហប្រជាជាតិ។ គិតចាប់ពីឆ្នាំ២០០៦ រហូតមកដល់បច្ចុប្បន្ន កម្លាំងកម្ពុជាសរុបចំនួន ៨,៨៥៩នាក់ ក្នុងនោះ ចំនួន ៦៨១នាក់ បានបំពេញបេសកកម្មចំនួន ១១ ក្នុងប្រទេសចំនួន៩ មានជាអាទិ៍៖ នៅសាធារណរដ្ឋស៊ូដង់ ស៊ូដង់ខាងត្បូង ឆាដ អាហ្វ្រិកកណ្ដាល លីបង់ ម៉ាលី ស៊ីរី សាយប្រឺស និងយេមែន លើជំនាញបោសសំអាតមីន វិស្វកម្មសំណង់ផ្តេក-បញ្ឈរ អាវុធហត្ថ មន្ទីរពេទ្យកម្រិត២ វិស្វកម្មព្រលានយន្តហោះ កំទេចគ្រាប់មិនទាន់ផ្ទុះ នាយទាហានសេនាធិការ និងសង្កេតការណ៍យោធា។ បច្ចុប្បន្ន កម្លាំងកម្ពុជាចំនួន ៧៨៨នាក់ ក្នុងនោះនារីចំនួន ១៣០នាក់ កំពុងបំពេញបេសកកម្មនៅប្រទេសចំនួន៤ រួមមាន សាធារណរដ្ឋស៊ូដង់ខាងត្បូង លីបង់ អាហ្វ្រិកកណ្ដាល និងម៉ាលី។
កម្លាំងដែលនឹងចេញដំណើរនាពេលនេះ មានចំនួនសរុប ៩៨នាក់ ក្នុងនោះមាននារី ១០នាក់ មកពីបណ្តាកងឯកភាព នៃកងយោធពលខេមរភូមិន្ទ ដោយទទួលបានការហ្វឹកហ្វឺនមុនចល័ត និងលើជំនាញវិជ្ជាជីវៈ ប្រកបដោយគុណភាព ពីគ្រូបង្គោលកម្ពុជា សាធារណៈរដ្ឋបារាំង ប្រទេសអូស្ត្រាលី និងបណ្តាប្រទេសជាមិត្ត ដើម្បីប្រសិទ្ធភាព និងប្រសិទ្ធផល ដូចបណ្តាកងមុនៗដែរ។ កងកម្ទេចគ្រឿងផ្ទុះនេះ ក៏ជាជំនាញថ្មី សម្រាប់បេសកកម្មនៅសាធារណរដ្ឋអាហ្វ្រិកកណ្តាល ហើយនារីត្រូវបានតែងតាំងជាមេបញ្ជាការកង ជាលើកដំបូង និងមានសមត្ថភាពប្រើប្រាស់ភាសាបារាំង និងអង់គ្លេស។ នេះសបញ្ជាក់ពីការតាំងចិត្តពីសំណាក់ ប្រមុខរាជរដ្ឋាភិបាល ថ្នាក់ដឹកនាំក្រសួងការពារជាតិ គណកម្មាធិការ ឆ្លើយតបទៅនឹង សកម្មភាពដើម្បីសន្តិភាពបូក និងយុទ្ធសាស្ត្រសមភាពយេនឌ័រ ឆ្នាំ២០២៨ របស់អង្គការសហប្រជាជាតិ។
ឯកឧត្តម ចូសិហ្វ ស៊ូអើ (Joseph Scheuer) អ្នកសម្របសម្រួលអង្គការសហប្រជាជាតិ ប្រចាំកម្ពុជា បានថ្លែងថា ការចេញដំណើរ របស់កងកម្ទេចគ្រឿងផ្ទុះលេខ៩៨ នាថ្ងៃនេះ បានបញ្ជាក់ឡើងវិញពីការតាំងចិត្តរបស់កម្ពុជា ក្នុងការលើកតម្កើងស្មារតី នៃធម្មនុញ្ញរបស់អង្គការសហប្រជាជាតិ និងចូលរួមជាមួយសហគមន៍ដ៏ពិតប្រាកដនៃប្រជាជាតិ រួបរួមគ្នាក្នុងការស្វែងរកសន្តិភាព និងអនាគតដ៏ល្អប្រសើរសម្រាប់មនុស្សជាតិទាំងអស់។ ហើយការចូលរួមរបស់អស់លោក លោកស្រី បង្ហាញថាការរួបរួមគ្នា គឺជាចំណងសាមគ្គីដ៏រឹងមាំ ដែលមិនមានកម្លាំងឥទ្ធិពលណាមកបំបែកបានឡើយ។ ឯកឧត្តម សង្ឃឹមថា ការរួមសាមគ្គីនេះ នឹងដើរតួនាទីជាពន្លឺនៃក្តីសង្ឃឹមដល់មនុស្សដទៃ មិនត្រឹមតែក្នុងប្រទេសកម្ពុជាប៉ុណ្ណោះទេ ប៉ុន្តែនៅទូទាំងពិភពលោកផងដែរ។
ក្នុងឱកាសនោះ សម្ដេចពិជ័យសេនា ទៀ បាញ់ បានមានប្រសាសន៍ថា ការរៀបចំពិធីជូនដំណើរកងកម្ទេចគ្រឿងផ្ទុះលេខ៩៨ ចេញបំពេញបេសកកម្មអង្គការសហប្រជាជាតិ នៅសាធារណរដ្ឋ អាហ្វ្រិកកណ្តាលនាពេលនេះ គឺជាលើកដំបូងបន្ទាប់ពីអាក់ខានចាប់តាំងពីឆ្នាំ២០២០មក ដោយសារវិបត្តិជំងឺកូវីដ-១៩ ជាសកល។ ប៉ុន្តែទោះជាយ៉ាងណាក្តី ក៏មជ្ឈមណ្ឌលជាតិ បានរៀបចំពិធីជូនទទួលដំណើរកងកម្លាំងរក្សាសន្តិភាពជាលក្ខណៈផ្ទៃក្នុង ជាបន្តបន្ទាប់ តាមវិធានការណែនាំរបស់ក្រសួងសុខាភិបាល។
ក្នុងនាមរាជរដ្ឋាភិបាល ក្រសួងការពារជាតិ អគ្គបញ្ជាការដ្ឋាន នៃកងយោធពលខេមរភូមិន្ទ, សម្ដេចពិជ័យសេនា បានសម្ដែងការកោតសរសើរ និងវាយតម្លៃខ្ពស់ ចំពោះគណៈកម្មាធិការជាតិ មជ្ឈមណ្ឌលជាតិ ក្រសួង ស្ថាប័ន និងក្រុមការងារពាក់ព័ន្ធ ដែលបានខិតខំប្រឹងប្រែងយកចិត្តទុកដាក់អនុវត្តន៍ការងារវិស័យរក្សាសន្តិភាព សម្រេចបានសមិទ្ធផល ផ្លែផ្កាជាបន្តបន្ទាប់គួរជាទីមោទនៈ ជូនជាតិមាតុភូមិ និងប្រជាជននៃយើង ដែលជាការឆ្លើយតបទៅនឹងការប្តេជ្ញាចិត្តយ៉ាងមុតមាំរបស់រាជរដ្ឋាភិបាលកម្ពុជា លើវិស័យរក្សាសន្តិភាព។ សម្ដេចពិជ័យសេនា បានគូសបញ្ជាក់ថា រាជរដ្ឋាភិបាលកម្ពុជា បានប្តេជ្ញាចិត្តយ៉ាងមុតមាំក្នុងការជម្រុញបង្កើនការប្រើប្រាស់កម្លាំងជានារី "យេនឌ័រ” សម្រាប់ធានានិរន្តភាព នៃការចូលរួមបំពេញបេសកកម្មរក្សាសន្តិភាពយូរអង្វែង ដោយផ្តោតសំខាន់ទៅលើសកម្មភាពក្នុងវិស័យមួយចំនួន ដែលកម្ពុជាមានលទ្ធភាពចូលរួម ព្រមទាំងខិតខំធ្វើការ កែលម្អលើការងារគ្រប់គ្រង ការពង្រឹងធនធានមនុស្ស ពិសេសការបង្កើនចំនួនចូលរួមជាស្ត្រី ដើម្បីឱ្យស្របទៅនឹងទស្សនៈយេនឌ័រ បញ្ចូលគ្នានៅក្នុងប្រតិបត្តិការរក្សាសន្តិភាព របស់អង្គការសហប្រជាជាតិ។
រាជរដ្ឋាភិបាល និងខិតខំបន្តអភិវឌ្ឍន៍មធ្យោបាយ និងធនធានចាំបាច់មួយចំនួន សម្រាប់បំពាក់ ជូនដល់កងកម្លាំងចូលរួមបេសកកម្មរក្សាសន្តិភាពរបស់អង្គការសហប្រជាជាតិ ដើម្បីអនុវត្តន៍ភារកិច្ចឱ្យកាន់តែមានប្រសិទ្ធភាពខ្ពស់ តាមរយៈការងារដឹកនាំ កំណត់គោលនយោបាយ និងការលើកកម្ពស់ហ្វឹកហ្វឺន ពង្រឹងសមត្ថភាពជំនាញលើគ្រប់វិស័យដល់កងកម្លាំង និងបានបង្ហាញជំហរគាំទ្រនូវចក្ខុវិស័យកិច្ចប្រតិបត្តិការរក្សាសន្តិភាព និងទស្សនាទានសម្រាប់របៀបវារៈការអភិវឌ្ឍ ប្រកបដោយចេរភាព ៕
