នាយឧត្តមសេនីយ៍ ឃឹម ប៊ុនសុង ជួបពិភាក្សាការងារជាមួយអនុប្រធានស្នងការហ្វឹកហ្វឺនកងទ័ពប្រជាជនវៀតណាម
នាយឧត្តមសេនីយ៍ ឃឹម ប៊ុនសុង រដ្ឋលេខាធិការ ក្រសួងការពារជាតិ និងជាប្រធានក្រុមប្រឹក្សាកីឡាកងយោធពលខេមរភូមិន្ទ បានអនុញាតិឲ្យ ឧត្តមសេនីយ៍ត្រី ប៊ូយ ហុងក្វាង អនុប្រធានស្នងការហ្វឹកហ្វឺន នៃអគ្គសេនាធិការ កងទ័ពប្រជាជន វៀតណាម ចូលជួបសម្ដែងការគួរសម នារសៀលថ្ងៃទី០១ ខែមីនា ឆ្នាំ២០២៣។
ឧត្ដមសេនីយ៍ត្រី ប៊ូយ ហុងក្វាង បានមានប្រសាសន៍ថា ស្របតាមស្មារតីនៃកិច្ចសហប្រតិបត្តិការ រវាងក្រសួងការពារជាតិទាំងពីរ កម្ពុជា-វៀតណាម និងមតិនាយឧត្តមសេនីយ៍ ឃឹម ប៊ុនសុង កាលពីខែវិច្ឆិកា ឆ្នាំ២០២២ នៅប្រទេសវៀតណាមកន្លងទៅនេះ បានធ្វើឲ្យគណៈប្រតិភូ ស្នងការហ្វឹកហ្វឺន និងបណ្តាអង្គភាពមួយចំនួនទៀត នៃកងទ័ពប្រជាជនវៀតណាម មកបំពេញទស្សនកិច្ចនៅកម្ពុជានាពេលនេះ។ លោកអនុប្រធានស្នងការហ្វឹកហ្វឺន ក៏បានថ្លែងអំណរគុណចំពោះការទទួលស្វាគមន៍របស់ នាយឧត្តមសេនីយ៍ ឃឹម ប៊ុនសុង និងបានជម្រាបរាយការណ៍អំពីលទ្ធផល នៃកិច្ចប្រជុំទ្វេភាគីរបស់គណៈប្រតិភូ ស្នងការហ្វឹកហ្វឺន កងទ័ពប្រជាជនវៀតណាម ជាមួយនិង ឧត្តមសេនីយ៍ឯក តែម ម៉ឺន នាយក មជ្ឈមណ្ឌលកីឡា ខ.ភ.ម នាថ្ងៃទី២៨ ខែកុម្ភៈ ឆ្នាំ២០២៣ កន្លងទៅនេះ។ លោកបានបញ្ជាក់ថា ពេលវិលត្រឡប់ទៅវិញ នឹងធ្វើរបាយការណ៍ជាបន្ទាន់មួយរាយការណ៍ជូនទៅអគ្គសេនាធិការ និងក្រសួងការពារប្រទេសវៀតណាម ស្តីអំពីតម្រូវការចាំបាច់នានារបស់ ខ.ភ.ម ជុំវិញការពង្រឹងលើវិស័យកីឡា ហើយសង្ឃឹម និងជឿជាក់ថា កម្ពុជានឹងទទួលបានជោគជ័យថ្មីជាបន្តទៀត នៅក្នុងការរៀបចំព្រឹត្តិការណ៍ការប្រកួតកីឡាស៊ីហ្គេម លើកទី៣២ ឆ្នាំ២០២៣ខាងមុខនេះ។
នាយឧត្តមសេនីយ៍ ឃឹម ប៊ុនសុង សម្ដែងការស្វាគមន៍ចំពោះគណៈប្រតិភូកងទ័ពប្រជាជនវៀតណាម ដឹកនាំដោយ ឧត្តមសេនីយ៍ត្រី ប៊ួយ ហុងក្វាង អនុប្រធានស្នងការហ្វឹកហ្វឺន ដែលបានមកបំពេញទស្សនកិច្ចនៅកម្ពុជា តាមការអញ្ជើញរបស់មជ្ឈមណ្ឌលកីឡាកងយោធពលខេមរភូមិន្ទ។ ឯកឧត្តម បានថ្លែងការកោតសរសើរ និងវាយតម្លៃខ្ពស់ចំពោះលទ្ធផលកិច្ចប្រជុំទ្វេភាគី និងចុះពិនិត្យទីតាំងមជ្ឈមណ្ឌល កីឡាកងយោធពលខេមរភូមិន្ទ កាលពីថ្ងៃទី២៨ ខែកុម្ភៈ ឆ្នាំ២០២៣ និងការទស្សនាវិមាន ឈ្នះឈ្នះ គណៈប្រតិភូកងទ័ពប្រជាជនវៀតណាម នឹងបានយល់ជ្រួតជ្រាបកាន់តែច្បាស់នូវតម្លៃសន្តិភាព តាមរយៈការដាក់ចេញនយោបាយឈ្នះ ឈ្នះ របស់សម្តេចអគ្គមហាសេនាបតីតេជោ ហ៊ុន សែន បានធ្វើឱ្យប្រទេសជាតិមានសុខសន្តិភាព ឯកភាពជាតិពេញលេញទូទាំងប្រទេស។ សមិទ្ធផលនេះ ក៏មិនអាចបំភ្លេចបានពីការចូលរួមចំណែករបស់កងទ័ពប្រជាជនវៀតណាម ដែលបានជួយគាំទ្រដល់កងយោធពលខេមរភូមិន្ទផងដែរ។
នៅក្នុងឱកាសនេះ ឯកឧត្តម ពាំនាំនូវប្រសាសន៍សួរសុខទុក្ខពីសំណាក់ សម្តេចពិជ័យសេនា ទៀ បាញ់ ជូនចំពោះឯកឧត្តម នាយឧត្តមសេនីយ៍ ហ្វាន វ៉ាន់ ហ្សាង រដ្ឋមន្ត្រីក្រសួងការពារប្រទេសវៀតណាម ព្រមទាំងនាយទាហាន និងពលទាហានកងទ័ពប្រជាជនវៀតណាមផងដែរ។
ក្នុងនាមក្រសួងការពារជាតិ នៃព្រះរាជាណាចក្រកម្ពុជា ឯកឧត្តម ឃឹម ប៊ុនសុង បានថ្លែងអំណរគុណចំពោះរដ្ឋាភិបាល កងទ័ព និងប្រជាជនវៀតណាម ដែលជានិច្ចកាលតែងតែជួយគាំទ្រ និងសហការយ៉ាងជិតស្និទ្ធក្នុងការរៀបចំ និងចូលរួមក្នុងព្រឹត្តិការណ៍ជាតិ អន្តរជាតិ ដែលរៀបចំដោយរាជរដ្ឋាភិបាល និងក្រសួងការពារជាតិកម្ពុជា។ សង្ឃឹមថា កងទ័ពប្រជាជនវៀតណាម បន្តពង្រឹងកិច្ចសហប្រតិបត្តិការបន្ថែមទៀត ពិសេសនៅលើវិស័យកីឡាកម្ពុជាឲ្យរឹងមាំ និងរីកចម្រើនឡើងថែមទៀត ៕
