អនុព័ន្ធយោធាម៉ាឡេស៊ី ចូលជួបជំរាបលា ឯកឧត្តម នាង ផាត
នៅក្នុងឱកាសបញ្ចប់អាណត្តិបេសកកម្មការទូតនៅកម្ពុជា លោកវរសេនីយ៍ឯក ហាមី ប៊ីន អាត ហាមីដ (Hazmi bin Abd Hamid) នាយការិយាល័យអនុព័ន្ធយោធាម៉ាឡេស៊ីប្រចាំនៅកម្ពុជា បានចូលជួបសំដែងការគួរសម និងជម្រាបលា នាយឧត្តមសេនីយ៍ នាង ផាត រដ្ឋលេខាធិការប្រចាំការក្រសួងការពារជាតិ កាលពីរសៀលថ្ងៃទី០១ ខែមីនា ឆ្នាំ២០២៣ នៅទីស្ដីការក្រសួងការពារជាតិ។
លោកវរសេនីយ៍ឯក ហាមី ប៊ីនអាត ហាមីដ (Hazmi bin Abd Hamid) បានថ្លែងអំណរគុណយ៉ាងជ្រាលជ្រៅចំពោះ ឯកឧត្តម នាង ផាត ក៏ដូចជាថ្នាក់ដឹកនាំ នាយទាហាន នាយទាហានរង និងពលទាហាន នៃខភម ដែលកន្លងមកបានចូលរួមសហការ និងបានបង្កគ្រប់លក្ខណៈ គ្រប់បែបយ៉ាង បានធ្វើឲ្យការបំពេញបេសកកម្មការទូត របស់លោកនៅកម្ពុជា ទទួលបានលទ្ធផលផ្លែផ្កាគួរជាទីមោទនៈ និងបានធ្វើឲ្យកាន់តែប្រសើរនៅការពង្រឹងពង្រីកចំណងទាក់ទង កិច្ចសហប្រតិបត្តិការមិត្តភាព សាមគ្គីភាព រវាងរដ្ឋាភិបាល កងទ័ព និងប្រជាជនប្រទេសទាំងពីរ ម៉ាឡេស៊ី និងកម្ពុជា កាន់តែមានភាពរឹងមាំទ្វេឡើងថែមទៀត។ លោកវីរសេនីយ៍ឯក ហាមី ក៏បានគូសបញ្ជាក់អំពីទំនាក់ទំនង រវាងម៉ាឡេស៊ី និងកម្ពុជា ពិសេសរាជរដ្ឋាភិបាល កងទ័ព និងប្រជាជនប្រទេសទាំងពីរ មានចំណងទាក់ទងរហូតមកដល់ពេលនេះរយៈពេលជាង ៦៥ឆ្នាំមកហើយ។ ហើយទំនាក់ទំនង កិច្ចសហប្រតិបត្តិការនេះ ថ្នាក់ដឹកនាំប្រទេសយើងទាំងពីរ បានផ្លាស់ប្ដូរបទពិសោធន៍គ្នាទៅវិញទៅមក ប្រកបដោយលទ្ធផលវិជ្ជមាន។
ជាការឆ្លើយតប ឯកឧត្តម នាង ផាត បានសម្ដែងនូវការកោតសរសើរ និងវាយតម្លៃខ្ពស់ចំពោះចំណងមិត្តភាព សាមគ្គីភាព ដ៏ល្អរវាងកងទ័ព និងប្រជាជនប្រទេសទាំងពីរ ព្រមទាំងបានថ្លែងអំណរគុណ ចំពោះស្នាដៃដ៏ធំធេង របស់លោកវីរសេនីយ៍ឯក ហាមី ដែលសម្រេចបាននៅក្នុងអាណត្តិបេសកកម្មការទូតយោធា ៤ឆ្នាំកន្លងមកនេះនៅកម្ពុជា ដែលបានធ្វើឲ្យចំណងមិត្តភាព សាមគ្គីភាព នៃប្រទេសយើងទាំងពីរ កាន់តែមានភាពរឹងមាំថែមទៀត។ ឯកឧត្តម ក៏បានគូសបញ្ជាក់បន្ថែមទៀតថា ទំនាក់ទំនងរវាងរាជរដ្ឋាភិបាល កងទ័ព និងប្រជាជន ប្រទេសយើងទាំងពីរ គឺមានតាំងពីយូលុងណាស់មកហើយ ហើយយើងត្រូវតែបន្តថែរក្សាចំណងទាក់ទងដ៏ល្អនេះ ឱ្យនៅស្ថិតស្ថេរគង់វង្សរហូតនាពេលបច្ចុប្បន្ន និងទៅអនាគត។ ឯកឧត្តម នាង ផាត បានគូសបញ្ជាក់ និងរំលឹកឡើងវិញផងដែរ អំពីសមិទ្ធផល និងស្នាដៃជាច្រើន ដែលប្រទេសយើងទាំងពីរកម្ពុជា-ម៉ាឡេស៊ី បានបំពេញរួមគ្នានៅក្នុងការរក្សាបាននៅចំណងមិត្តភាព សាមគ្គីភាព កិច្ចសហប្រតិបត្តិការល្អ ដើម្បីចូលរួមរក្សាការពារ និងទប់ស្កាត់ នូវអំពើភារវកម្មឆ្លងដែន និងអំពើល្មើសច្បាប់ផ្សេងៗ ឆ្លងដែន នៅក្នុងន័យរក្សាសន្តិសុខក្នុងសង្គម និងក្នុងតំបន់អាស៊ាន ពិសេសពិភពលោកទាំងមូល ៕
