សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកោះកុង បានអញ្ជើញជួបសំណេះសំណាលជាមួយនាយទាហាន នាយទាហានរង និងពលទាហាន តាមកងឯកភាពឈរជើងទិសយោធភូមិភាគទី ៣ ប្រមាណជា ៤៥០នាក់ នៅថ្ងៃទី២៣ ខែមីនា ឆ្នាំ២០២៣ កន្លងទៅនេះ ដែលបានប្រព្រឹត្តទៅនៅបរិវេណស្តូបឈ្នះ ឈ្នះ ខេត្តកោះកុង ក្នុងឱកាស អបអរសាទរពិធីបុណ្យចូលឆ្នាំថ្មីប្រពៃណីជាតិខែ្មរ ដែលឈានចូលមកដល់ក្នុងពេលខាងមុខនេះ។
ថ្លែងក្នុងពិធីសំណេះសំណាលនាឱកាសនោះ សម្ដេចពិជ័យសេនា ទៀ បាញ់ បានសំដែងនូវការកោតសរសើរ និងវាយតំលៃខ្ពស់ ចំពោះនាយទាហាន នាយទាហានរង និងពលទាហាន នៅក្នុងទូទាំងយោធភូមិភាគទី ៣ ដែលបានខិតខំបំពេញការងារក្នុងកិច្ចការការពារបូរណភាពទឹកដី ការពារសន្តិសុខ សុវត្តិភាពជូនប្រជាពលរដ្ឋ និងការពារសុខសន្តិភាពសំរាប់ការអភិវឌ្ឍប្រទេសជាតិអោយមានការរីកចំរើន។
សម្ដេចពិជ័យសេនា ទៀ បាញ់ បានមានប្រសាសន៍បញ្ជាក់បន្ថែមថា៖ យើងតែងតែជួបសំណេះសំណាលជាមួយកងកម្លាំងឈរជើងតាមបន្ទាត់ព្រំដែនជារៀងរាល់ឆ្នាំ ក្នុងមួយឆ្នាំម្ដង មិនដែលអាក់ខាន។ តែពេលនេះ យើងជួបជុំគ្នានៅស្តូបឈ្នះ ឈ្នះ ថ្ងៃនេះ គឺដើម្បីបង្ហាញឲ្យនឹកឃើញការរៀបចំការងារ សកម្ម ដែលជាប្រវត្តិសាស្ត្រយោធា ក៏ដូចជាការរំលឹកដឹងគុណដល់នយោបាយឈ្នះ ឈ្នះ របស់យើង ដែលមានគុណតម្លៃដ៏ធំធេង នាំមកនៅសន្តិភាព និងការឯកភាពពេញលេញ។ សម្ដេចពិជ័យសេនា បន្តថា៖ សន្តិភាពដែលយើងទទួលបានក្នុងពេលនេះ យើងទាំងអស់គ្នា ត្រូវតែការពារអោយបាន មិនអោយមានការបាត់បង់ ទៅវិញជាដាច់ខាត។ សម្ដេចពិជ័យសេនា ទៀ បាញ់ បានបញ្ជាក់ថា៖ ចំលាក់ស្តូប ឈ្នះ ឈ្នះ កោះកុង ត្រូវធ្វើអោយបានសមស្របទៅតាមស្ថានភាពក្នុងខេត្តមានភូមិសាស្ត្រក្នុងយោធភូមិភាគទី ៣ ដែលក្នុងនោះ ចំលាក់ត្រូវផ្តើមចេញពី ថ្ងៃ ២០ មិថុនា ឆ្នាំ ១៩៧៧ ទិវាចងចាំដំណើរឆ្ពោះទៅផ្តួលរំលំរបបប្រល័យពូជសាសន៍ ប៉ុល ពត រហូតដល់ ថ្ងៃ ២៩ ធ្នូ ឆ្នាំ ១៩៩៨ ជាទិវានយោបាយឈ្នះ ឈ្នះ ដែលបានបញ្ចប់សង្គ្រាមទាំងស្រុងនៅកម្ពុជា។ ទាក់ទងទៅនឹងការអនុវត្តនយោបាយឈ្នះ ឈ្នះ សម្ដេចពិជ័យសេនា ទៀ បាញ់ បានបញ្ជាក់បន្ថែមថា៖ ថ្ងៃ ១១ ខែកុម្ភៈ ឆ្នាំ១៩៩៦ ជាថ្ងៃនៃដំណើរការអនុវត្តនយោបាយឈ្នះ ឈ្នះ ដែលបានចាប់ដំណើរការពីទិសយោធភូមិភាគទី ៣។
ក្នុងឱកាសនោះ សម្ដេចពិជ័យសេនា ទៀ បាញ់ ក៏បានមានប្រសាសន៍ជំរុញដល់ អនុគណៈកម្មការសាងសង់ស្តូប ឈ្នះ ឈ្នះ ត្រូវសហការ ជាមួយបណ្តាស្ថាប័ន ដែលមានការពាក់ពន្ធ័ ដើម្បីជំរុញអោយដំណើរការ សាងសង់ស្តូប ឈ្នះ ឈ្នះ ប្រព្រឹត្តទទួលបានលទ្ធផលល្អតាមផែនការ ដែលបានគ្រោងទុក។ ឆ្លៀតក្នុងឱកាសនោះ សម្ដេចពិជ័យសេនា ទៀ បាញ់ ក៏បានជំរាបជូនដល់ពិធីសំណេះសំណាល អំពីការរៀបចំពិធីមាតុភូមិវិវត្តន៍អដ្ឋិធាតុយុទ្ធជនកងកម្លាំងប្រដាប់អាវុធសាមគ្គី សង្គ្រោះជាតិកម្ពុជា ពីប្រទេសវៀតណាម មកកាន់កម្ពុជា នឹងបានកំពុងសាងសង់ មហាចេតិយតម្កល់ អដ្ឋិធាតុយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា សំរាប់តម្កល់អដ្ឋិធាតុនេះ ដែលគ្រោងនឹងសម្ពោធដាក់ឱ្យប្រើប្រាស់ជាផ្លូវការនៅថ្ងៃទី០២ ខែមេសា ឆ្នាំ២០២៣ ខាងមុខនេះ។
ក្នុងឱកាស អបអរសាទរពិធីបុណ្យចូលឆ្នាំថ្មីប្រពៃណីជាតិខែ្មរ ដែលឈានចូលមកដល់ក្នុងពេលខាងមុខនេះសម្ដេចពិជ័យសេនា ទៀ បាញ់ ក៏បានជូនពរឆ្នាំថ្មី ដល់នាយទាហាន នាយទាហានរង និងពលទាហាន នៅក្នុងទូទាំងយោធភូមិភាគទី ៣ ទាំងអស់ សូមអោយមានសិរីសួរស្តី ជ័យមង្គល និងសំរេចបានជោគជ័យធំៗបន្ថែមទៀត ជូនជាតិមាតុភូមិ។ ក្នុងឱកាសចុះសាកសួរ សុខទុក្ខ យោធិន នៅទិសយោធភូមិភាគ ទី៣ នាឱកាសនោះដែល សម្ដេចពិជ័យសេនា ទៀ បាញ់ ក៏បានចែកអំណោយជាថវិកាជូន ដល់បណ្តាអង្គភាពនានាចំណុះយោធភូមិភាគសំរាប់ពិធីបុណ្យចូលឆ្នាំថ្មីប្រពៃណីជាតិខែ្មរ ដែលឈានចូលមកដល់ក្នុងពេលខាងមុខនេះ ផងដែរ ៕
