សម្ដេចពិជ័យសេនា ទៀ បាញ់ ចុះត្រួតពិនិត្យតំបន់ប្រវត្តិសាស្ត្រយោធា ភ្នំវែង ស្រុករតនៈមណ្ឌល ខេត្តបាត់ដំបង
ក្នុងឱកាសចូលរួមអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងឈានចូលមកដល់នាពេលខាងមុខនេះ កាលពីថ្ងៃទី២៦ ខែមីនា ឆ្នាំ២០២៣ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិអមដំណើរដោយ នាយឧត្តមសេនីយ៍ អ៊ី ឈាន រដ្ឋលេខាធិការក្រសួងការពារជាតិ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង និងជានាយសេនាធិការចំរុះ ខភម ព្រមទាំងអភិបាល នៃគណៈអភិបាល ខេត្តបាត់ដំបង ឯកឧត្តមជា អគ្គនាយក អគ្គនាយករង មេបញ្ជាការ មេបញ្ជាការរង យោធភូមិភាគទិ៥ កងពលតូចថ្មើរជើងលេខ ៥២ បានអញ្ជើញចុះត្រួតពិនិត្យភូមិសាស្ត្រ ភ្នំវែង ស្ថិតនៅក្នុងឃុំត្រែង ស្រុករតនៈមណ្ឌល ខេត្តបាត់ដំបង។ ភ្នំវែង ត្រូវបានចាត់ទុកជាតំបន់ប្រវត្តិសាស្ត្រយោធា ដែលទីតាំងភ្នំវែងនេះពីអតីតកាល គឺជាទីបញ្ជាការ អគ្គសេនាធិការ ខភម ប្រចាំការសមរភូមិមុខ ទិសប៉ៃលិន ភ្នំកូនដំរី ភ្នំសណ្តែក និងបណ្តាភូមិសាស្ត្រនានា ដែលជាប់នឹងតំបន់ប៉ៃលិន កាលពីសម័យសង្គ្រាម មុនពេលអនុវត្តគោលនយោបាយឈ្នះ ឈ្នះ របស់សម្តេចតេជោ ហ៊ុន សែន ក្នុងឆ្នាំ១៩៩៦។
នៅក្នុងឱកាសនោះ លោកឧត្តមសេនីយ៍ត្រី គុជ នាង មេបញ្ជាការកងពលតូចថ្មើរជើងលេខ ៥២ បានបញ្ជាក់ឲ្យដឹងថា៖ នៅដើមខែកុម្ភៈ ឆ្នាំ២០២៣ ក្រុមការងារប្រវត្តិសាស្ត្រយោធា ដឹកនាំដោយ នាយឧត្តមសេនីយ៍ ណឹម សុវត្ថិ ទីប្រឹក្សាពិសេស សម្តេចពិជ័យសេនា អគ្គនាយក អគ្គនាយកដ្ឋាននយោបាយ និងកិច្ចការបរទេស និងជាប្រធានក្រុមការងារសិក្សាស្រាវជ្រាវប្រវត្តិសាស្ត្រយោធា បានចុះមកសិក្សាស្រាវជ្រាវនៅភ្នំវែងនេះ ដែលទីតាំងភ្នំវែងនេះ គឺជាអតីត ទីបញ្ជាការ អគ្គសេនាធិការកងយោធពលខេមរភូមិន្ទក្នុងអំឡុងឆ្នាំ ១៩៩៤ -១៩៩៥ និង១៩៩៦ ដែលបានដឹកនាំបញ្ជា ដោយ ឯកឧត្តម កែ គឹមយ៉ាន ឯកឧត្តម ហុក ឡងឌី និង យោធភូមិភាគទី៥។ តឹកតាងប្រវត្តិសាស្ត្រដែលបានបន្សល់ទុកនៅទីនេះ មានបាតគ្រិះ ទីបញ្ជាការធ្វើពីបេតុង និង លេណដ្ឋាន នៅជុំវិញតំបន់នេះ។ លោកឧត្តមសេនីយ៍ត្រី គុជ នាង បានបញ្ជាក់អោយដឹងថា៖ ក្រោយពី អ៊ុនតាក់ ស្វែងរកសន្តិភាពមិនបានជោគជ័យជូនប្រទេសកម្ពុជា និងភាគីខ្មែរក្រហមមិនចូលរួមជាមួយរដ្ឋាភិបាល ឈានចូលមកដល់ឆ្នាំ ១៩៩៥-១៩៩៦ កម្លាំងកងទ័ពខ្មែរក្រហមបានធ្វើសមាហរណកម្ម ជាបន្តបន្ទាប់ ក្រោមគោលនយោបាយឈ្នះ ឈ្នះ របស់សម្តេចតេជោ ហ៊ុន សែន បានធ្វើអោយប្រទេសជាតិទទួលបាននូវសុខសន្តិភាព នៅទូទាំងប្រទេស។ តាមរយៈការចុះសិក្សាស្រាវជ្រាវ នៅភូមិសាស្ត្រភ្នំវែង ទីតាំងភ្នំវែងនេះ នឹងត្រូវកំណត់ជាតំបន់ប្រវត្តិសាស្ត្រយោធា នៅក្នុងយោធភូមិភាគទី ៥ សំរាប់ទុកសិក្សារៀនសូត្រដល់អ្នកជំនាន់ក្រោយ ដើម្បីអោយបានយល់ដឹងអំពី ប្រវត្តិតស៊ូ ការធ្វើពលិកម្ម របស់អ្នកជំនាន់មុន គ្រប់ជាន់ថ្នាក់ ដែលបានខិតខំប្រឹងប្រែងតស៊ូ លះបង់ គ្រប់ការលំបាករហូតបាននាំមកនូវសុខ សន្តិភាព ជូនជាតិមាតុភូមិកម្ពុជា មកដល់សព្វថ្ងៃនេះ។
សូមបញ្ជាក់ថា៖ តាមរយៈការចុះសិក្សាស្រាវជ្រាវ ក្នុងពេលកន្លងមក យោធភូមិភាគទី៥ បានរៀបចំតំបន់ប្រវត្តិសាស្ត្រយោធា បានចំនួន ២៦ ទីតាំង ក្នុងនោះនៅក្នុងខេត្តបន្ទាយមានជ័យមាន ៧ ទីតាំង ខេត្តបាត់ដំបង ៩ ទីតាំង ខេត្តប៉ៃលិន ៣ ទីតាំង និងខេត្តពោធិសាត់មានចំនួន ៧ ទីតាំង។ ក្រោយពីបានធ្វើសិក្ខាសាលាប្រវត្តិសាស្ត្រយោធា នៅយោធភូមិភាគទី ៥ រួចមក យោធភូមិភាគទី ៥ បានស្នើសុំបង្កើនតំបន់ប្រវត្តិសាស្ត្រយោធា ថ្មីចំនួន ៦ ទីតាំង គឺ តំបន់ប្រវត្តិសាស្ត្រយោធា សែន ចៅ ស្ថិតនៅក្នុងស្រុកសំឡូត តំបន់ប្រវត្តិសាស្ត្រយោធា ឃ្លាំង ប៊ុយ ក្នុងស្រុកសំឡូត តំបន់ប្រវត្តិសាស្ត្រយោធា ភ្នំវែង ស្រុករតនៈមណ្ឌល តំបន់ប្រវត្តិសាស្ត្រយោធា ក្បាលឡាន ក្នុងស្រុកវាលវែង តំបន់ប្រវត្តិសាស្ត្រយោធា ស្លាបកប៉ាល់ហោះ ស្ថិតនៅក្នុងស្រុកគ្រគរ និង តំបន់ប្រវត្តិសាស្ត្រយោធា កប៉ាល់ហោះធ្លាក់ ស្ថិតនៅកំពង់ស្ពឺ។
មានប្រសាសន៍សំណេះសំណាលនាឱកាសនោះ សម្ដេចពិជ័យសេនា ទៀ បាញ់ បានរំលឹកឡើងវិញអំពីតំបន់ភ្នំវែង ដែលទីតាំងទីបញ្ជាការភ្នំវែងនេះ សម្តេចធ្លាប់បានអញ្ជើញមកកាន់ទីនេះ ដើម្បីជួបសំណេះសំណាល សាកសួរសុខទុក្ខកងទ័ព កាលពី២៧ឆ្នាំ កន្លងទៅ។ ឆ្លៀតក្នុងឱកាសនោះ សម្ដេចពិជ័យសេនា ទៀ បាញ់ បានជំរុញដល់ អាជ្ញាធ័រខេត្ត និង ស្ថាប័ន ដែលមានការពាក់ពន្ធ័ គិតគូររៀបចំ ភ្នំវែង អោយក្លាយទៅជាតំបន់ប្រវត្តិសាស្ត្រយោធា ដើម្បីរក្សាទុកទីនេះ សំរាប់អ្នកជំនាន់ក្រោយបានសិក្សារៀនសូត្រ។ សម្ដេចពិជ័យសេនា ក៏បានណែនាំដល់ក្រុមការងារប្រវត្តិសាស្ត្រយោធាយោធភូមិភាគទី ៥ និងក្រុមការងារប្រវត្តិសាស្ត្រយោធាកងពលតូចថ្មើរជើងលេខ ៥២ បន្តធ្វើការសិក្សាស្រាវជ្រាវប្រវត្តិសាស្ត្រយោធា ប្រមូលនូវតឹកតាងនានា ដែលបានបន្សល់ទុកកាលពីសម័យសង្គ្រាម ដើម្បីដំកល់ទុកក្នុងទីស្នាក់ការប្រវត្តិសាស្ត្រ សំរាប់ការសិក្សាស្រាវជ្រាវសិក្សារៀនសូត្រទៅថ្ងៃខាងមុខ និងសំរាប់ឆ្លាក់រូបចម្លាក់ បំពាក់នៅស្តូបឈ្នះ ឈ្នះ ផងដែរ។ ក្នុងឱកាសចូលរួមអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងឈានចូលមកដល់នាពេលខាងមុខនេះ សម្ដេចពិជ័យសេនា ទៀ បាញ់ បានជូនពរឆ្នាំថ្មី ជូនដល់ នាយទាហាន នាយទាហានរង និងពលទាហានទាំងអស់ សូមអោយជួបប្រទះតែសេចក្តីសុខ សេចក្តីចំរើន មានសុខភាពល្អ កម្លាំងខ្លាំងក្លា និងសំរេចគ្រប់ភារកិច្ចដែលរាជរដ្ឋាភិបាលប្រគល់ជូន ៕
