សម្ដេចពិជ័យសេនា ទៀ បាញ់ សាកសួរសុខទុក្ខកងទ័ពនៅយោធភូមិភាគទី ៤
បន្ទាប់ពីបានអញ្ជើញចុះសាកសួរសុខទុក្ខ នាយទាហាន នាយទាហានរង និងពលទាហាន នៅតាមបណ្តាអង្គភាពនានា ក្នុងយោធភូមិភាគទិ៥ ក្នុងឱកាសចូលរួមអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងឈានចូលមកដល់ នាពេលខាងមុខរួចមក នៅថ្ងៃទី២៧ ខែមីនា ឆ្នាំ២០២៣ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ អមដំណើរដោយ នាយឧត្តមសេនីយ៍ គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស អគ្គលេខាធិការ សមាគមអតីតយុទ្ធជនកម្ពុជា អនុប្រធានទី១ នៃ គណៈកម្មាធិការជាតិគ្រប់គ្រងគ្រោះមហន្តរាយ និងជាប្រធានអនុគណៈកម្មការសាងសង់ស្តូប ឈ្នះ ឈ្នះ អន្លង់វែង នាយឧត្តមសេនីយ៍ នាង ផាត រដ្ឋមន្ត្រីប្រតិភូ អមនាយករដ្ឋមន្ត្រី និងជារដ្ឋលេខាធិការប្រចាំការក្រសួងការពារជាតិ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង និងជានាយសេនាធិការចំរុះ ខភម ព្រមទាំង ឯកឧត្តមជា អគ្គនាយក អគ្គនាយករង និងនាយទាហានជាន់ខ្ពស់នៅក្នុងក្រសួងការពារជាតិ អគ្គបញ្ជាការ បញ្ជាការដ្ឋានកងទ័ពជើងគោក ជាច្រើនរូបទៀត បានអញ្ជើញចុះសាកសួរសុខ នាយទាហាន នាយទាហានរង និងពលទាហាន នៅតាមបណ្តាអង្គភាពនានា ក្នុងយោធភូមិភាគទី ៤ ដែលពិធីចុះសាកសួរសុខទុក្ខកងទ័ព នៅទិសយោធភូមិភាគទី ៤ នេះ បានប្រារព្ធធ្វើនៅ ការដ្ឋានសាងសង់ស្តូបឈ្នះ ឈ្នះ អន្លុងវែង ខេត្តឧត្តរមានជ័យ។
នៅក្នុងឱកាសនោះ បន្ទាប់ពី ឧត្តមសេនីយ៍ឯក ពៅ ហេង មេបញ្ជាការរង កងទ័ពជើងគោក និងជាមេបញ្ជាការយោធភូមិភាកទី ៤ បានឡើងថ្លែងសន្ទរកថាស្វាគមន៍ និងរាយការណ៍អំពីលទ្ធផលការងារ ដែល យោធភូមិភាកទី ៤ សំរេចបានលើភារកិច្ចការពារសន្តិសុខ សុវត្ថិភាពសង្គមជូនប្រជាពលរដ្ឋ ការការពារបូរភាពទឹកដី ក្នុងភូមិសាស្ត្រយោធភូមិភាគទី ៤ ការងាររៀបចំតំបន់ប្រវត្តិសាស្ត្រ ក្នុងទិសយោធភូមិភាគទី ៤ រួចមក មានប្រសាសន៍សំណេះសំណាលជាមួយនាយទាហាន នាយទាហានរង និងពលទាហាន នៅតាមបណ្តាអង្គភាពនានា ក្នុងយោធភូមិភាគទី៤ នាឱកាសនោះ សម្ដេចពិជ័យសេនា ទៀ បាញ់ បានពាំនាំនូវការផ្តាំផ្ញើសាកសួរសុខទុក្ខ ពីសម្តេចតេជោ ហ៊ុន សែន និងសម្តេចកិត្តិព្រឹត្តបណ្ឌិត ប៊ុន រ៉ានី ហ៊ុនសែន ជូនចំពោះបងប្អូន នាយទាហាន ពលទាហានទាំងអស់ នៅក្នុងទិសយោធភូមិភាគទី ៤ ក្នុងឱកាសចូលរួមអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ។
សម្ដេចពិជ័យសេនា ទៀ បាញ់ ក៏បានលើកឡើងពីសមិទ្ធផលសំខាន់ៗដែល ខភម សម្រេចបាន ក្នុងនោះ ខភម នៅតែរក្សាការពារបានយ៉ាងរឹងមាំនូវឯករាជ្យ អធិបតេយ្យបូរណភាព ទឹកដី និងបានពង្រឹងកិច្ចសហប្រតិបត្តិការជាមួយប្រទេសជាមិត្តនៅតាមព្រំដែន តាមរយៈកិច្ចទំនាក់ទំនងជិតខាងល្អ មិត្តភាពជាប្រពៃណី បានប្រែក្លាយអតីតសមរភូមិទៅជាតំបន់អភិវឌ្ឍន៍រីកចម្រើនលើគ្រប់វិស័យ កសាងព្រំដែនសន្តិភាព និងកិច្ចសហប្រតិបត្តិការ។ ឆ្លៀតនៅក្នុងឱកាសនោះ សម្ដេចពិជ័យសេនា ទៀ បាញ់ បានរំឭកព្រឹត្តិការណ៍ជាប្រវត្តិសាស្ត្រមួយចំនួន ដែលតម្រូវឱ្យមានការសាងសង់ស្តូបឈ្នះ ឈ្នះ អន្លង់វែង ខេត្តឧត្តរមានជ័យ។ សម្ដេចពិជ័យសេនា បញ្ជាក់ថា៖ ព្រឹត្តិការណ៍នៅអន្លង់វែង យើងដឹងរួចហើយថា ជាភូមិសាស្ត្រនៃនយោបាយឈ្នះ ឈ្នះ ដែលបានកំណត់ថាជោគជ័យ និងជាភូមិសាស្ត្រដែលវិលត្រឡប់ពីសង្គ្រាមមកសន្តិភាព។ មិនត្រឹមតែអន្លង់វែងដែលជាភូមិសាស្ត្រគោលទេ តែត្រូវអមជុំវិញដោយភូមិសាស្ត្រដទៃទៀត រួមទាំងត្រពាំងប្រាសាទ ទំនប់ដាច់ ក្បាលទន្សោង ច្រោក អូរស្វាយ ក្បាលរមាស តាទុំ អូរស្មាច់ ភ្នំស្រួច ភ្នំបាយ និងភ្នំបាក់។ ទាំងអស់នេះសុទ្ធតែទីតាំងដែលមានប្រវត្តិ រួមផ្ដុំក្នុងដំណើរការ មិនត្រឹមតែបច្ចុប្បន្ន មានចាប់តាំងពីទសវត្សរ៍មុនៗជាហូរហែ។ ឆ្លៀតនៅក្នុងឱកាសនោះដែរ សម្តេចពិជ័យសេនា បានអំពាវនាវដល់នាយទាហាន ពលទាហានក្នុងយោធភូមិភាគទី ៤ បន្តចូលរួមពង្រឹងកិច្ចការពារសុខសន្តិភាព សន្តិសុខ សណ្ដាប់ធ្នាប់សង្គម រក្សាការពារឱ្យបានរឹងមាំ នូវឯករាជ្យ អធិបតេយ្យបូរណភាពទឹកដី និងពង្រឹងកិច្ចសហប្រតិបត្តិការជាមួយប្រទេសជាមិត្តនៅតាម ព្រំដែនឱ្យបានល្អតាមនយោបាយរបស់រាជរដ្ឋាភិបាល។ បន្តកសាងពង្រឹងកិច្ចការពារជាតិលើគ្រប់វិស័យ នៅតាមតំបន់ព្រំដែន និងចូលរួមទប់ស្កាត់សកម្មភាពបទល្មើសគ្រប់ប្រភេទ និងសកម្មភាពឆ្លងដែនខុស ច្បាប់ទៅវិញទៅមក រវាងប្រទេសជិតខាងឱ្យមានប្រសិទ្ធភាព។
ក្នុងឱកាសនោះបន្ទាប់ពីបានចែកជូននូវអំណោយជូនដល់បណ្តាអង្គភាពនានាសំរាប់ពិធីបុណ្យចូលឆ្នាំថ្មីរួចមក សម្ដេចពិជ័យសេនា ទៀ បាញ់ ក៏បានអញ្ជើញទៅពិនិត្យការដ្ឋានសាងសង់ស្តូបឈ្នះ ឈ្នះ អន្លុងវែងផងដែរ។ សូមបញ្ជាក់ថា៖ ស្តូបឈ្នះ ឈ្នះ អន្លង់វែង ដែលបានកំពុងដំណើរការសាងសង់នេះ គឺជានិមិត្តរូបសន្តិភាព នៅតំបន់អន្លង់វែង ក្រោមការអនុវត្តគោលនយោបាយឈ្នះ ឈ្នះ របស់សម្តេចតេជោ ហ៊ុន សែន។ ស្តូបនេះបន្ទាប់ពីសាងសង់រួចនឹងបង្ហាញនូវតឹកតាងប្រវត្តិសាស្ត្រជាច្រើន ក្នុងដំណើរការអនុវត្តនយោបាយឈ្នះ ឈ្នះនៅអន្លង់វែងទុកអោយអ្នកជំនាន់ក្រោយបានសិក្សារៀនសូត្រ។ សូមបញ្ជាក់ថា៖ តំបន់អន្លង់វែងនេះ បានប្រមូលផ្តុំទៅដោយកេរ្ដិ៍ដំណែល និងបន្សល់ទុកនូវប្រវត្តិសាស្ត្រជាច្រើន ដោយសារតែអន្លង់វែងមានសារៈសំខាន់ ចំពោះភាពស្វិតស្វាញនៃចលនាតស៊ូរបស់ខ្មែរក្រហម។ ដូចនេះ តំបន់នេះ គឺជាទីតាំងនិមិត្តរូបតំណាងឱ្យជ័យជំនះចុងក្រោយនៃគោលនយោបាយ ឈ្នះ ឈ្នះ របស់រាជរដ្ឋាភិបាលកម្ពុជា។
ធាតុចូលនៃរឿងរ៉ាវជាច្រើនដែលបានរកឃើញនៅទីនេះ ជាការរួមចំណែកនៃប្រតិបត្តិករទាំងអស់ទាំង កងយោធពលខេមរភូមិន្ទ ស្ថាប័ននានា និងទាំងអតីតកម្លាំងកម្ពុជាប្រជាធិបតេយ្យ ដែលកំពុងនៅទី នេះ” ក្នុងស្មារតីសាមគ្គី ឆន្ទៈ បន្តកាន់ទង់សន្តិភាពតកូនតចៅទាំងអស់គ្នាតទៅ។ នេះហើយគឺជាខឿន ការពារជាតិ ជាប្រវត្តិសាស្ត្រដែលមិនអាចកាត់ថ្លៃបាន ដែលបញ្ជាក់លើពាក្យស្លោក “អរគុណសន្តិភាព ! អរគុណនយោបាយ ឈ្នះ ឈ្នះ ! ដឹងគុណស្ថាបនិក មគ្គុទ្ទេសក៍ឯក និងប្រតិបត្តិករនយោបាយ ឈ្នះឈ្នះ ដែលនាំមកនូវសន្តិភាព និងការឯកភាពជាតិពេញលេញ !” ៕
