ពិធីសម្ពោធមហាចេតិយតម្កល់អដ្ឋិធាតុយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា នៅតំបន់ប្រវត្តិសាស្ត្រយោធាតេជោកោះថ្ម អ៊ិច-១៦
បន្ទាប់ពីបានប្រារព្ធពិធីក្រុងពាលីសម្ពោធមហាចេតិយតម្កល់អដ្ឋិធាតុយុទ្ធជនកងកម្លាំងប្រដាប់អាវុធសាមគ្គី សង្គ្រោះជាតិកម្ពុជា នៅតំបន់ប្រវត្តិសាស្ត្រយោធាតេជោកោះថ្ម អ៊ិច-១៦ ស្ថិតនៅ ភូមិចង្គុំទី១ ឃុំទន្លូង ស្រុកមេមត់ ខេត្តត្បូងឃ្មុំ ត្រូវបានប្រារព្ធធ្វើ នៅរសៀលថ្ងៃទី០១ ខែមេសា ឆ្នាំ២០២៣ ស្ថិតក្រោមអធិបតីភាព នាយឧត្តមសេនីយ៍ សៅ សុខា អគ្គមេបញ្ជាការរង ខភម មេបញ្ជាការកងរាជអាវុធហត្ថលើផ្ទៃប្រទេស និងជាប្រធានក្រុមការងារបច្ចេកទេស ដើម្បីរៀបចំមាតុភូមិនិវត្តន៍អដ្ឋិធាតុយុទ្ធជន កងកម្លាំងប្រដាប់អាវុធសាមគ្គីសង្គ្រោះជាតិកម្ពុជា ពីសាធារណរដ្ឋសង្គមនិយមវៀតណាមរួចមក នៅព្រឹកថ្ងៃទី០២ ខែមេសា ឆ្នាំ២០២៣ ពិធី សម្ពោធ មហាចេតិយតម្កល់អដ្ឋិធាតុយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា នៅតំបន់ប្រវត្តិសាស្ត្រយោធាតេជោកោះថ្ម អ៊ិច-១៦ ត្រូវបានប្រារព្ធធ្វើក្រោមអធិបតីភាព សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាតំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងមានការអញ្ជើញចូលរួមពីឯកឧត្តម លោកជំទាវជា សមាជិកព្រឹទ្ធសភា រដ្ឋសភា សមាជិករាជរដ្ឋាភិបាល រដ្ឋលេខាធិការ អនុរដ្ឋលេខាធិការក្រសួងការពារជាតិ អគ្គនាយក អគ្គនាយករង មេបញ្ជាការ មេបញ្ជាការរង កងទ័ពជើងគោក ជើងទឹក ជើងអាកាស កងរាជអាវុធហត្ថ យោធភូមិភាគ ផែនកងកម្លាំងប្រដាប់អាវុធ សិស្សានុសិស្ស ព្រមទាំងឯកឧត្តម លោកជំទាវជាអតីតយុទ្ធមិត្ត ធ្លាប់បំពេញភារកិច្ច ក្នុងកងកម្លាំងប្រដាប់អាវុធសាមគ្គី សង្គ្រោះជាតិកម្ពុជា ក្នុងឆ្នាំ១៩៧៨-១៩៧៩ ជាច្រើនរូបទៀត។
នៅក្នុងពិធី សម្ពោធមហាចេតិយ នាឱកាសនោះ បន្ទាប់ពីសម្តេចពិជ័យសេនា ទៀ បាញ់ បានកាត់ខែ្សបូរសម្ពោធមហាចេតីយរួចមក ក្រុមការងារបច្ចេកទេស ដើម្បីរៀបចំមាតុភូមិនិវត្តន៍អដ្ឋិធាតុយុទ្ធជន កងកម្លាំងប្រដាប់អាវុធសាមគ្គី សង្គ្រោះជាតិកម្ពុជា ពីសាធាណរដ្ឋសង្គមនិយមវៀតណាម បានធ្វើពិធីដង្ហែរអដ្ឋិធាតុយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា ទាំង ៤៩ រូប ដែលបានរក្សាទុក បណ្តោះអាសន្ន នៅអគារមិត្តភាព ក្នុងតំបន់ប្រវត្តិសាស្ត្រយោធាតេជោកោះថ្ម X-16 មកដម្កល់ទុកក្នុងមហាចេតិយ ដែលបានដឹកនាំក្បួនដង្ហែរដោយ ឯកឧត្តម សៅ សុខា និងនាំមុខ ដោយកងកិត្តិយស កងត្រែទ័ព នៃខភម។
សូមបញ្ជាក់ថា៖ អដ្ឋិធាតុយុទ្ធជនពលីទាំង ៤៩រូប ដែលបានយកមកដម្កល់ទុកក្នុងមហាចេតិយ នាពេលនេះ បានប្រសូតនៅក្នុងចន្លោះឆ្នាំ១៩១៤ ដល់ ឆ្នាំ១៩៦៤។ យុទ្ធជនទាំងអស់មានស្រុកកំណើតផ្សេងៗគ្នា ក្នុងនោះមាន ៤៧ រូប នៅខេត្តស្វាយរៀង ម្នាក់នៅខេត្តកំពង់ចាម និងម្នាក់ទៀតមិនមានអត្តសញ្ញាណច្បាស់លាស់ ។ ការបាត់បង់នូវយុទ្ធជនតស៊ូរំដោះជាតិ គឺជាការបាត់បងនូវគំរូ វីរភាពដ៏អង់អាចក្លាហាន ធ្វើអោយយុទ្ធជនរួមអាវុធទាំងអស់ និងកម្មាភិបាលគ្រប់ជាន់ថ្នាក់ ចងចាំ ជានិច្ចមិនអាចបំភ្លេចបាន។ ទោះបីរយៈពេលជាង ៤០ឆ្នាំ បានកន្លងផុតទៅហើយក៏ពិតមែន ប៉ុន្តែអ្វីដែលយើងទាំងអស់គ្នា មិនអាចបំភ្លេចបាននោះ គឺការចងចាំនូវគុណូបការៈ និងវីរភាពដ៏អង់អាចក្លាហាន ហ៊ានធ្វើពលិកម្មគ្រប់យ៉ាង ឆ្លងកាត់គ្រប់ឧបសគ្គ និងការលំបាកយ៉ាងច្រើនឥតគណនា ក្នុងបុព្វហេតុរំដោះប្រទេសជាតិ និងសង្គ្រោះអាយុជីវិត ប្រជាជនកម្ពុជា អោយរួចផុតពីរបបប្រល័យពូជសាសន៍ ប៉ុល ពត។ នៅក្នុងឱកាសនោះបន្ទាប់ពីបានប្រារព្ធពិធីដង្ហែរអដ្ឋិធាតុយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា ទាំង ៤៩ រូប មកដម្កល់ទុកក្នុងមហាចេតិយ រួចមក សម្តេចពិជ័យសេនា ទៀ បាញ់ ព្រមទាំងគណៈអធិបតីចូលរួមទាំងអស់ បានដាក់កម្រងផ្កា គោរពវិញាណក្ខន្ធ យុទ្ធជន កងកម្លាំងប្រដាប់អាវុធសាមគ្គីសង្គ្រោះជាតិកម្ពុជា ទាំង ៤៩ រូប។
ជាបន្តបន្ទាប់មកទៀត គណៈប្រតិភូខេត្តប៊ិញភឿក នៃសាធារណៈរដ្ឋសង្គមនិយមវៀតណាម និងប្រតិភូអតីតជំនាញការវៀតណាម ក៏បានអញ្ជើញដាក់កម្រងផ្កា គោរពវិញាណក្ខន្ធ យុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា ទាំង ៤៩ រូប ផងដែរ ៕
