សម្តេចពិជ័យសេនា ទៀ បាញ់ ទស្សនាវិមានឈ្នះ-ឈ្នះ
នៅព្រឹកថ្ងៃទី០៣ ខែឧសភា ឆ្នាំ២០២៣ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាសាងសង់វិមានឈ្នះ ឈ្នះ អមដំណើរដោយ ឯកឧត្តម ជារដ្ឋលេខាធិការក្រសួងការពារជាតិ អគ្គនាយក អគ្គនាយករង និង នាយទាហាន នៅក្នុងក្រសួងការពាជាតិជាច្រើនរូបទៀត បានអញ្ជើញចុះពិនិត្យ វឌ្ឍនភាពនៃការសាងសង់វិមានឈ្នះ ឈ្នះ ក្នុងនោះមាន សួនប្រវត្តិកាល ដែលបានដំណើរការសាងសង់ជិតរួចរាល់ជាស្ថាពរ ហើយមកដល់ពេលនេះ។
ក្នុងឱកាសនោះ សម្តេចពិជ័យសេនា ទៀ បាញ់ ព្រមទាំងប្រតិភូអមដំណើរ ទាំងអស់ បានអញ្ជើញទៅទស្សនា តំបន់សុខដុមនីយកម្ម ប្រវត្តិសាស្ត្រខ្មែរ ក្នុងបរិវេណវិមាន ឈ្នះ ឈ្នះ ដែលតំបន់សុខដុមនីយកម្ម ប្រវត្តិសាស្ត្រខ្មែរ បានរៀបចំឡើងក្នុងគោលបំណង រំលេចអំពីប្រវត្តិសាស្ត្រ វប្បធម៌ និង អរិយធម៌ខ្មែរ នាសម័យកាលដ៏រុងរឿង ដោយព្រះមហាក្សត្រ បានដឹកនាំប្រទេសលើមូលដ្ឋានវប្បធម៌ នៃសុខដុមនីយកម្ម រុងរឿង ក្នុងប្រវត្តិសាស្ត្រជាតិ ពីបុព្វកាលមក។ សូមបញ្ជាក់ថា៖ តំបន់សុខដុមនីយកម្ម ប្រវត្តិសាស្ត្រខ្មែរ នៅក្នុងបរិវេណវិមានឈ្នះ ឈ្នះ ត្រូវបានសាងសង់ឡើងដោយមាន បណ្តុំប្រាសាទចំនួន ៤ រួមមាន៖ ប្រាសាទព្រះវិហារ ប្រាសាទសម្បូរព្រៃគុហ ប្រាសាទបាយន័ និងប្រាសាទកោះកេរ៍។
នៅក្នុងឱកាសនោះ នាយឧត្តមសេនីយ៍ ណឹម សុវត្ថិ ទីប្រឹក្សាពិសេសសម្តេចពិជ័យសេនា អគ្គនាយក អគ្គនាយកដ្ឋាននយោបាយ និងកិច្ចការបរទេស ក្រសួងការពារជាតិ និងជាប្រធានក្រុមការងារសិក្សាស្រាវជ្រាវសាសង់វិមានឈ្នះ ឈ្នះ បានជំរាបជូន សម្តេចពិជ័យសេនា អំពីវឌ្ឍនភាព នៃដំណើរការសាងសង់វិមានឈ្នះ ឈ្នះ ដែលក្នុងនោះ ប្រាសាទមួយចំនួន នៅក្នុងតំបន់សុខដុមនីយកម្ម ប្រវត្តិសាស្ត្រខ្មែរ បានកំពុងដំណើរការជួសេជុល ផ្នែកខ្លះឡើងវិញ ព្រមទាំងចម្លាក់មួយចំនួន ក៏ត្រូវបានឆ្លាក់រួចរាល់ និងបន្តឆ្លាក់នូវចម្លាក់ថ្មី មួយចំនួនទៀត ដែលក្រុមការងារ បានស្រាវជ្រាវរកឃើញ និងខ្លឹមសារ ចម្លាក់ថ្មីៗ ស្របទៅនឹងសភាពការណ័វិវឌ្ឍរីកចំរើនរបស់ប្រទេសជាតិ។ សូមបញ្ជាក់ថា៖ វិមានអនុស្សាវរីយ៍នយោបាយឈ្នះឈ្នះ ត្រូវបានសាងសង់ឡើងដោយបញ្ជាក់នូវ អត្ថន័យដ៏មានសារសំខាន់ ចំនួនបី រួមមាន៖ ទី១. កំពូលវិមានដែលមានជ្រុង បី តំណាងឲ្យនយោបាយគន្លឹះសំខាន់ៗ ចំនួន៣ នាំឲ្យនយោបាយឈ្នះ-ឈ្នះ ទទួលបានជោគជ័យ (ទី១.ការធានារូបកាយ និងអាយុជីវិត, ទី២. ធានាអាជីព និងមុខរបរ និងទី៣. ការធានាកម្មសិទ្ធិ និងទ្រព្យសម្បត្តិ ទាំងចលនទ្រព្យ និងអចលនទ្រព្យ)។ ទី២. តួវិមាន ដែលមាន ៥ ជ្រុង តំណាងឲ្យយុទ្ធសាស្ដ្រ ឌីហ្វីត ( DIFID )គឺ បំបែក ឯកោ បញ្ចប់ ធ្វើសមាហរណកម្ម និងអភិវឌ្ឍ) ដែលជាយុទ្ធសាស្ដ្ររំលាយអង្គការចាត់តាំងនយោបាយ និងយោធាខ្មែរក្រហម និង សារៈសំខាន់ ទី៣. តួវិមានមាន ៧ ជ្រុង តំណាងកត្តានាំឲ្យ នយោបាយឈ្នះ-ឈ្នះ ទទួលបានជោគជ័យ។
បរិវេណនៃវិមានឈ្នះ ឈ្នះ មានចែកចេញជា ៤ តំបន់ រួមមាន៖ តំបន់ទី១ ជាតំបន់សុខដុមនីយកម្ម ប្រវត្តិសាស្ត្រខ្មែរ តំបន់ទី ២ ជាតួ វិមានឈ្នះ ឈ្នះ ដែលនៅជុំវិញតួវិមានសាងសង់ជា ចម្លាក់ មាន៖ ហង្ស -គ្រុឌ និង រូបដំរីក្បាល ៣ និង រូបចម្លាក់នាគ និង តោ។ តំបន់ទី ៣ ៖ គឺតំបន់សួនតេជោសន្តិភាព ដែលមានដាំដើម ឈើ មានតាំង សព្វាវុធ ដែលបានបន្សល់ទុកកាលពីសម័យសង្គ្រាម រួមមាន ៖ រថក្រោះ រថពាសដែក កាំភ្លើងធំ រថយន្ត តូច ធំ នាវា និងយន្តហោះ ។ តំបន់ទី ៤ ៖ជាតំបន់សួនសមិទ្ធផលតេជោ។ ការសាងសង់វិមានឈ្នះ ឈ្នះ គឺតំណាងអោយនិមិត្តរូបសន្តិភាព ដែលបានមកពីគោលនយោបាយឈ្នះ ឈ្នះ របស់សម្តេចតេជោ ហ៊ុន សែន ។ នយោបាយឈ្នះ-ឈ្នះ ជាគោលនយោបាយដ៏ធំមួយក្នុងការដឹកនាំប្រទេសកម្ពុជា ដើម្បីនាំមកនូវការបញ្ចប់ សង្គ្រាមស៊ីវិលទាំងស្រុង និងនាំមកនូវសន្តិភាព ព្រមទាំងការឯកភាពពេញលេញនៅកម្ពុជា។ គោលនយោបាយនេះ បានបង្កើតឡើងដោយមគ្គទេសក៍ឆ្នើម របស់កម្ពុជា គឺសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មិនមែនជាការចៃដន្យនោះទេ តែជាពលិកម្មដ៏មហាធំធេងមួយ ដែលប្រជាជនខ្មែរគ្រប់រូបត្រូវចងចាំជាប្រវត្តិសាស្ត្រ និងគោរព មហាវីរៈភាពដែល សម្តេចតេជោ បានយកជីវិតមកប្តូរ ដើម្បីសន្តិភាព»។
គុណតម្លៃដ៏មហាសាលរបស់នយោបាយឈ្នះ ឈ្នះ ចំពោះប្រទេសកម្ពុជាពិតជាមិនអាចកាត់ថ្លៃបាន ឡើយនៅក្នុងបេះដូងរបស់ប្រជាជនកម្ពុជាគ្រប់រូប។ ការកសាងឡើងនូវវិមានឈ្នះ ឈ្នះ ដែលជាសក្ខីភាព នៃការបង្រួបបង្រួមជាតិកម្ពុជា និងបង្ហាញនូវតឹកតាងប្រវត្តិសាស្ត្រដែលកើតមានជាក់ស្តែងនៅក្នុងប្រវត្តិសាស្ត្រ ដល់កូនខ្មែរជំនាន់ក្រោយគ្រប់រូបបានសិក្សាឈ្វេងយល់ ក៏ដូចជាគុណតម្លៃធំធេង នៃនយោបាយឈ្នះ ឈ្នះ ដែលបាននាំមកនូវសន្តិភាពពេញលេញមកដល់ប្រទេសកម្ពុជា។ វិមានឈ្នះ ឈ្នះ មិនត្រឹមតែជាសំណង់ដែលបង្ហាញពីភស្តុតាងប្រវត្តិសាស្ត្រប៉ុណ្ណោះទេ តែវិមានឈ្នះ ឈ្នះបានក្លាយទៅជាមជ្ឈមណ្ឌលលំហែរកាយដ៏ធំមួយនៅរាជធានីភ្នំពេញ ដែលមានបងប្អូន ប្រជាជនមកទស្សនាកំសាន្តជារៀងរាល់ថ្ងៃមិនដាច់ឡើយ។ ទីតាំងនេះបានបង្ហាញនូវ ទស្សវិជ្ជាសុខដុមនីយកម្ម ដែលបានប្រមូលផ្តុំនូវគោលគំនិតសុខដុមនីយកម្មប្រវត្តិសាស្រ្ត សុខដុមនីយកម្មសាសនា ដែលជាមាគ៌ានាំ ប្រទេសកម្ពុជាឲ្យទទួលបាននូវសន្តិភាពពេញលេញ។ វិមានឈ្នះ ឈ្នះ បានក្លាយទៅជាអត្តសញ្ញាណ ដោយបង្កប់ និងបង្ហាញនិមិត្តរូបនៃដួងព្រលឹងជាតិ ក្នុងការរួបរួមសាមគ្គី និងការអភិវឌ្ឍសម្រាប់ការសិក្សាស្រាវជ្រាវបន្ថែមទៀតនាពេលខាងមុខស្តីពីកិច្ចការទាំងនេះ។
ក្នុងឱកាសនោះដែល បន្ទាប់ ពីបានពិនិត្យចម្លាក់ជំវិញបរិវេណវិមានឈ្នះ ឈ្នះ រួចមក សម្តេចពិជ័យសេនា បានអញ្ជើញទៅពិនិត្យមើល សួនតេជោសន្តិភាព និង តំបន់សួនសមិទ្ធផលតេជោ ដែលក្នុងនោះ សួនប្រវត្តិកាល បានដំណើរការសាងសង់ជិតរួចរាល់ជាស្ថាពរហើយឈានចូលមកដល់ ខែ ឧសភា ឆ្នាំ ២០២៣ នេះ ។ «សួនប្រវត្តិកាល ស្ថាបត្យកម្មនៃវិមានឈ្នះ ឈ្នះ- ស្ថិតក្នុងសួនសមិទ្ធផលតេជោ នៃវិមានឈ្នះ ឈ្នះ មានទំហំ ២៩ ម៉ែត្រX ២៣ ម៉ែត្រ បានរៀបចំឡើង ដើម្បីដាក់បង្ហាញនូវប្រវត្តិកាល នៃដំណើរការកសាងវិមានឈ្នះ ឈ្នះ គិតចាប់ពីការ សិក្សាស្រាវជ្រាវ និងរៀបចំទស្សនទាន នៃ វិមាន ឈ្នះ ឈ្នះ រហូត ការកសាងវិមានឈ្នះ ឈ្នះ ទាំងមូល ដើម្បីរំលេចចេញនូវគុណតម្លៃននយោបាយឈ្នះ ឈ្នះ។ សួននេះ បានរៀបចំឱ្យមានភាពងាយស្រួលក្នុង ការទស្សនា ដោយសាធារណជនអាចស្វែងយល់អំពី អត្ថន័យខ្លឹមសារ នៃនយោបាយឈ្នះ ឈ្នះ ក៏ដូចជាកិច្ចការងារ កសាងវិមាន ឈ្នះ ឈ្នះ ដែលសាធារណជនអាចស្វែងយល់ពីស្ថាបត្យកម្ម រចនាបថ និងខ្លឹមសារចម្លាក់ផ្សេងៗនៅក្នុងតំបន់នេះ។
តាមរយៈការចុះពិនិត្យមើលវឌ្ឍនភាព នៃការសាងសង់វិមានឈ្នះ ឈ្នះ នាឱកាសនោះ សម្តេចពិជ័យសេនា ទៀ បាញ់ បានសំដែងនូវកាតកោតសរសើរចំពោះ ក្រុមការងារ វិមានឈ្នះ ឈ្នះ ដែលបានប្រចាំការនៅវិមានឈ្នះ ឈ្នះទាំងអស់ ដែលបានខិតខំប្រឹងប្រែងទាំងយប់ ទាំងថ្ងៃ ក្នុងការមើលថែទាំ សំណង់វិមានឈ្នះឈ្នះ សំរាប់បងប្អូនប្រជាពលរដ្ឋកម្ពុជា ភ្ញៀវទេសចរណ៍ ជាតិអន្តរជាតិ ចូលទស្សនាជារៀងរាល់ថ្ងៃ។ សម្តេចពិជ័យសេនា ទៀ បាញ់ ក៏បានធ្វើការណែនាំ នាយទាហាន នាយទាហានរង និង ពលទហាន ប្រចាំការនៅវិមានឈ្នះឈ្នះត្រូវបន្តយកចិត្តទុកដាក់ក្នុងការគ្រប់គ្រង ថែរក្សានូវរាល់សមិទ្ធផលនានា នៅក្នុងវិមានឈ្នះឈ្នះអោយបានល្អ បន្តការធ្វើអនាម័យ ការពារសន្តិសុខ សុវត្តិភាពជូនដល់ភ្ញៀវទេសចរណ៍ ជាតិ អន្តរជាតិ ដែលចូលមក ទស្សនាវិមានឈ្នះឈ្នះ ជារៀងរាល់ថ្ងៃ ៕
