សមយុទ្ធ វិធីបង្ការ និងពន្លត់អគ្គីភ័យនៅទីស្ដីការក្រសួងការពារជាតិ
កាលពីព្រឹកថ្ងៃទី២៧ ខែឧសភា ឆ្នាំ២០២៣ ក្រុមការងារប្រតិបត្តិការ របស់នាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ ក្រសួងមហាផ្ទៃ សហការជាមួយជំនាញ នៃនាយកដ្ឋានវិស្វកម្ម និងអគ្គលេខាធិការដ្ឋាន ក្រសួងការពារជាតិ បានធ្វើសមយុទ្ធរួមគ្នាជាក់ស្តែងមួយ ដើម្បីបំប៉នវិធីបង្ការ ពន្លត់អគ្គីភ័យ និងសង្គ្រោះ (បឋម) ឲ្យដល់មន្ត្រីនៃកងយោធពលខេមរភូមិន្ទ ដែលកំពុងបម្រើការ នៅក្នុងបរិវេណ និងនៅមុខទីស្តីការក្រសួងការពារជាតិ ស្ថិតតាមបណ្តោយមហាវិថីសហពន្ធ័រុស្សី ឲ្យបានយល់ដឹងពីវិធីបង្ការ ពន្លត់អគ្គីភ័យ និងសង្គ្រោះបឋម ពេលមានបញ្ហាអគ្គីភ័យកើតឡើងជាយថាហេតុណាមួយ នៅក្នុងបរិវេណអគាររដ្ឋបាល និងសាលប្រជុំថ្មី នៃទីស្ដីការក្រសួងការពារជាតិ។ សមយុទ្ធវិធីបង្គា ពន្លត់អគ្គីភ័យ និងសង្គ្រោះ បានធ្វើឡើងនេះ បានប្រព្រឹត្តទៅនៅសាលប្រជុំ និងក្នុងបរិវេណនៃទីស្ដីការក្រសួងការពារជាតិ ក្រោមវត្តមាន នាយឧត្តមសេនីយ៍ ឃុន វុធ រដ្ឋលេខាធិការក្រសួងការពារជាតិ និងជាប្រធានគណៈកម្មការគ្រប់គ្រង ថែទាំ អគាររដ្ឋបាល និងសាលប្រជុំទីស្ដីការក្រសួងការពារជាតិ។
ឧត្តមសេនីយ៍ទោ លឹម ចាន់រិទ្ធី នាយករងនាយកដ្ឋានវិស្វកម្មក្រសួងការពារជាតិ បានគូសបញ្ជាក់ថា៖ នៅក្នុងអគាររដ្ឋបាល និងសាលប្រជុំធំថ្មី របស់ក្រសួងការពារជាតិនេះ ត្រូវបានសាងសង់រួចរាល់នៅខែធ្នូ ឆ្នាំ២០២១ និងបានបំពាក់ប្រព័ន្ធបង្ការ និងពន្លត់អគ្គិភ័យឆ្លាតវៃតាមបទដ្ឋានបច្ចេកទេសត្រឹមត្រូវ ច្បាស់លាស់ មានដូចជា៖ ប្រព័ន្ធគ្រប់គ្រងរលកសញ្ញាប្រកាសអាសន្ន និងជូនដំណឹងអំពីអគ្គិភ័យនៅបន្ទប់ប្រចាំការរួមដែលអាចដឹងបានភ្លាមៗនៅគ្រប់តំបន់ ដែលកំពុងមានហានិភ័យ។
ឧត្តមសេនីយ៍ទោ សឿ រិទ្ធី អនុប្រធាននាយកដ្ឋាននគរបាលបង្ការ ពន្លត់អគ្គីភ័យ និងសង្គ្រោះ នៃអគ្គស្នងការនគរបាលជាតិ បានបញ្ជាក់ថា៖ ការធ្វើសមយុទ្ធពន្លត់អគ្គិភ័យជាក់ស្ដែង និងការបំប៉នជំនាញបឋមនៅពេលនេះ មានប្រើប្រាស់រថយន្តពន្លត់ អគ្គិភ័យចំនួន ៣គ្រឿង និងមានកម្លាំងជំនាញចូលរួមប្រតិបត្តិការចំនួន ២៨នាក់។ ឧត្តមសេនីយ៍ទោ សឿ រិទ្ធី បញ្ជាក់ទៀតថា៖ នេះគឺជាលើកទីមួយហើយ សម្រាប់ស្ថាប័នជាតិ ដែលមានក្រសួងការពារជាតិ ជាគំរូ ដែលបានយកចិត្តទុកដាក់ខ្ពស់ អំពីសុវត្ថិភាពពាក់ព័ន្ធវិស័យអគ្គីភ័យ ពីព្រោះថា ការធ្វើសមយុទ្ធពន្លត់អគ្គីភ័យ និងការបំប៉នជំនាញសង្គ្រោះបឋម ពេលនេះ បានបង្ហាញអំពីការយកចិត្តទុកដាក់ខ្ពស់ របស់ថ្នាក់ដឹកនាំក្រសួងការពារជាតិ សម្រាប់បង្កើនចំណេះដឹង ដល់កងកម្លាំងវិស្វកម្ម ក្នុងការចូលរួមបង្ការទប់ស្កាត់ ក្នុងហេតុការណ៍អាក្រក់ណាមួយ ដែលកើតមានឡើងដោយចៃដន្យ។
នាយឧត្តមសេនីយ៍ ឃុន វុធ រដ្ឋលេខាធិការក្រសួងការពារជាតិ បានថ្លែងថា៖ សមយុទ្ធជាក់ស្ដែង បំប៉នវិធីបង្ការ ពន្លត់អគ្គីភ័យ និងសង្គ្រោះ ដែលបង្ហាត់បង្ហាញដោយមន្ត្រីនៃនាយកដ្ឋានបង្ការពន្លត់អគ្គីភ័យ និងសង្គ្រោះ របស់អគ្គស្នងការនគរបាលជាតិ ក្រសួងមហាផ្ទៃ ឲ្យដល់មន្ត្រី នៃកងយោធពលខេមរភូមិន្ទ ដែលកំពុងបម្រើការនៅក្នុងអគាររដ្ឋបាល និងសាលប្រជុំថ្មី នៃទីស្ដីការក្រសួងការពារជាតិ នៅពេលនេះ គឺពិតជាមានសារៈសំខាន់បំផុត ដើម្បីជាទុនមួយ ដល់មន្ត្រីទាំងនោះ អាចប្រើប្រាស់នៅប្រព័ន្ធពន្លត់អគ្គីភ័យ បឋម ដែលមានស្រាប់នៅក្នុងអគារ ពេលមានហេតុការណ៍អគ្គីភ័យណាមួយកើតឡើង ជាយថាហេតុ នៅក្នុងបរិវេណនៃអគាររដ្ឋបាល និងសាលប្រជុំថ្មី នៃទីស្ដីការក្រសួងការពារជាតិ បានយ៉ាងទាន់ពេលវេលា។ ដូច្នេះនាយទាហានទាំងអស់ដែលចូលរួមនៅថ្ងៃនេះ ត្រូវយកចិត្តទុកដាក់ ស្ដាប់អនុវត្តប្រតិបត្តិ តាមការពន្យល់ណែនាំរបស់គ្រូឧទ្ទេសជំនាញបង្ការ ពន្លត់អគ្គីភ័យ និងសង្គ្រោះ របស់នាយកដ្ឋានបង្ការ ពន្លត់អគ្គីភ័យ និងសង្គ្រោះ នៃអគ្គស្នងការនគរបាលជាតិ ក្រសួងមហាផ្ទៃ ក្នុងអំឡុងពេលនៃសមយុទ្ធជាក់ស្ដែងនេះ ៕
