សម្តេចពិជ័យសេនា ទៀ បាញ់ ជួបសំដែងការគួរសម ឯកឧត្តម Ng Eng Hen រដ្ឋមន្ត្រីការពារជាតិសិង្ហបុរី
ក្នុងឱកាសអញ្ជើញចូលរួមកិច្ចប្រជុំកំពូលសន្តិសុខអាស៊ី លើកទី២០ នៅប្រទេសសិង្ហបុរី នៅរសៀលថ្ងៃទី០៣ ខែមិថុនា ឆ្នាំ២០២៣ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីការពារជាតិ បានចូលជួបសំដែងការគួរសម ឯកឧត្តម Ng Eng Hen រដ្ឋមន្ត្រីការពារជាតិសិង្ហបុរី។
ក្នុងជំនួបនោះ ឯកឧត្តម រដ្ឋមន្ត្រីការពារជាតិសិង្ហបុរី បានសម្ដែងការស្វាគមន៍ និងបានថ្លែងអំណរគុណចំពោះ សម្ដេចពិជ័យសេនា ទៀ បាញ់ ដែលបានអញ្ជើញមកគាំទ្រកិច្ចសន្ទនាសាំងគ្រីឡានៅសិង្ហបុរី ក្នុងនោះសម្ដេចពិជ័យសេនា បានអញ្ជើញមកចូលរួមក្នុងកិច្ចប្រជុំកំពូលសន្តិសុខអាស៊ី ឬកិច្ចសន្ទនាសាំងគ្រីឡាតាំងពីដំបូងមក រួមទាំងកិច្ចប្រជុំរដ្ឋមន្ត្រីការពារជាតិអាស៊ានបូកផងដែរ។ ឯកឧត្តម ក៏បានថ្លែងអំណរគុណ និងអបអរចំពោះកម្ពុជាដែលបានធ្វើជាម្ចាស់ផ្ទះកីឡាស៊ីហ្គេម លើកទី៣២ ទទួលបានជោគជ័យ ហើយទទួលបានការកោតសរសើរជាច្រើនថែមទៀត។
មានមតិឆ្លើយតបវិញសម្ដេចពិជ័យសេនា ទៀ បាញ់ ចាត់ទុកវេទិកា កិច្ចសន្ទនាសាំងគ្រីឡានេះ បានផ្ដល់ពុទ្ធិយ៉ាងច្រើន ដែលពាក់ពន្ធ័ទៅនឹងសភាពការណ៍វិវឌ្ឍន៍ថ្មីៗជាច្រើន ដើម្បីស្ដាប់ នឹងការសម្ដែងមតិ របស់បណ្ដាប្រទេសនីមួយៗដែលនៅក្នុងកិច្ចប្រជុំកំពូលសន្តិសុខអាស៊ីលើកទី ២០ នេះ មានរដ្ឋមន្ត្រីការពារជាតិមកពីបណ្តាប្រទេសនានា យ៉ាងច្រើនកុះករបានមកចូលរួម។ សម្ដេចពិជ័យសេនា បានថ្លែងអំណរគុណដល់សិង្ហបុរី ដែលបានបញ្ជូនកីឡាករទៅចូលរួមក្នុងការប្រកួតកីឡាស៊ីហ្គេមលើកទី ៣២ ដែលកម្ពុជាធ្វើជាម្ចាស់ផ្ទះ ក្នុងខែ ឧសភា កន្លងមក ហើយនៅថ្ងៃទី០៣ ខែមិថុនា ឆ្នាំ២០២៣ កម្ពុជាបានបន្តការបើកប្រកួតកីឡាអាស៊ានប៉ារ៉ាហ្គេមលើកទី ១២ បន្តទៀត។
ក្នុងឱកាសនោះ សម្ដេចពិជ័យសេនា ទៀ បាញ់ និង ឯកឧត្តម Ng Eng Hen រដ្ឋមន្ត្រីការពារជាតិសិង្ហបុរី ក៏បានធ្វើការផ្លាស់យោបល់គ្នាទៅវិញទៅមក ទាក់ទងទៅនឹងបញ្ហាសន្តិសុខ ដូចជាវិបត្តិសង្គ្រាមនៅ អ៊ុយក្រែន ជំលោះការនេសាទលើដែនសមុទ្រ ដែលបញ្ហាទាំងអស់នេះ ត្រូវតែរកវិធីចរចាបញ្ចប់បញ្ហាដោយសន្តិវិធី ៕
