ឯកឧត្តម នាង ផាត ជួបប្រតិភូប្រតិភូ វិទ្យាស្ថានយុទ្ធសាស្ត្រការពារជាតិ នៃសាធារណរដ្ឋឥណ្ឌូណេស៊ី
ទីស្តីការក្រសួងការពារជាតិ នារសៀលថ្ងៃទី២០ ខែមិថុនា ឆ្នាំ២០២៣ នាយឧត្តមសេនីយ៏ នាង ផាត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការក្រសួងការពារជាតិ បានអនុញ្ញាតឱ្យគណៈប្រតិភូវិទ្យាស្ថានយុទ្ធសាស្ត្រការពារជាតិ នៃសាធារណរដ្ឋឥណ្ឌូណេស៊ីប្រមាណ ៣១នាក់ ជាសិក្ខាកាមរបស់វិទ្យាស្ថាន ដែលដឹកនាំដោយ ឯកឧត្តមបណ្ឌិត រ៊ូប៊ី ស៊ូហ្វារីយ៉ាឌី អគ្គលេខាធិការ នៃវិទ្យាស្ថានយុទ្ធសាស្ត្រការពារជាតិ ចូលជួបសំដែងការគួរសម និងមកទទួលបទពិសោធន៏លើកិច្ចការ មួយចំនួន ដែលកម្ពុជាសំរេចបានកន្លងទៅ។
ឯកឧត្តមបណ្ឌិត រ៊ូប៊ី ស៊ូហ្វារីយ៉ាឌី តាងនាមឲ្យគណៈប្រតិភូបានលើកឡើងថា៖ គណៈប្រតិភូរបស់លោកដែលជាសិក្ខាកាម បានមកបំពេញទស្សនកិច្ចសិក្សាលើកនេះ គឺចង់ដឹងថាកម្ពុជាបានអនុវត្តនយោបាយ ឈ្នះ ឈ្នះ តាមរបៀបណា? បើតាមរយៈទស្សកិច្ចនៅសារមន្ទីរគុកទួលស្លែងលោកឃើញថា របបប្រល័យពូជសាសន៏ជា របបដែលពុំអាចអត់ឱនឲ្យបាននោះ?។ គណៈប្រតិភូជាសិក្ខាកាម ក៏បានលើកជាសំណួរជាច្រើនទៀតមានដូចជា៖ ទស្សនៈកម្ពុជា ទាក់ទងទៅនឹងបញ្ហាជម្លោះនៅសមុទ្ទចិនខាងត្បូង, បញ្ហាជម្លោះចិន និងអាមេរិក ក្នុងពេលបច្ចុប្បន្ន, បញ្ហាដែលកើតមានលើលំហរសមុទ្ទបញ្ហាវិធានការចំពោះកិច្ចការពារសន្តិសុខ សុវត្តិភាព ក្នុងកិច្ចប្រជុំកំពូលអាស៊ាន, អាស៊ានហ្គេម ក៏ដូចជាកំរិតទំនាក់ទំនងកិច្ចសហប្រតិបត្តិការ កម្ពុជា និងឥណ្ឌូណេស៊ីជាដើម។
ក្នុងឱកាសនោះ ឯកឧត្តម នាង ផាត បានឆ្លើយទៅនឹងសំណួរជាលំដាប់លំដោយជូនទៅដល់គណៈប្រតិភូសិក្ខាកាម នៃវិទ្យាស្ថានយុទ្ធសាស្ត្រការពារជាតិ នៃសាធារណរដ្ឋឥណ្ឌូណេស៊ី ឲ្យបានដឹងអំពីយុទ្ធសាស្ត្រនយោបាយ ឈ្នះ ឈ្នះ ដែលមាន សម្តេចតេជោ ជាមគ្គុទ្ទេសឆ្នើម ក្នុងការបង្រួបបង្រួមជាតិ ឯកភាពជាតិ ដោយមិនប្រកាន់និន្នាការនយោបាយកន្លងមក។ ចំពោះទស្សនៈបញ្ហាជម្លោះ សមុទ្ទចិនខាងត្បូង និងជម្លោះរវាងចិន និងអាមេរិក ក្នុងពេលបច្ចុប្បន្ន ក្នុងនាមកម្ពុជាជាប្រធាននៃកិច្ចប្រជុំអាស៊ានកន្លងមក ឯកឧត្តម នាង ផាត បានបញ្ជាក់ថា៖ កម្ពុជាបានខិតខំ ប្រឹងប្រែងខ្លាំងណាស់ក្នុងការស្វែងរកដំណោះស្រាយរួមមួយដើម្បីបញ្ជៀសមិនឲ្យមានការប្រឈមមុខដាក់គ្នាដោយអាវុធ គឺស្វែងរកនូវដំណោះស្រាយតាមការចរចារ ដោយបង្កើតឲ្យមានជំនួបជាបន្តបន្ទាប់ ក្នុងកិច្ចប្រជុំអាស៊ានបូកជាដើម។ ឯ.ឧ រដ្ឋលេខាបានបន្តទៀតថា៖ ក្នុងឱកាសដែលកម្ពុជាធ្វើជាប្រធានអាស៊ាន កម្ពុជាបាន ជួបប្រឈម ទៅនឹងដំណោះស្រាយលើបញ្ហាធំៗជាច្រើនរួមមាន៖ បញ្ហាជម្លោះសមុទ្ទចិនខាងត្បូង, ជម្លោះចិន-អាមេរិក, បញ្ហាប្រទេសមីយ៉ាម៉ា ហើយនិងបញ្ហាសង្គ្រាមរវាងរុស្សី និងអ៊ុយក្រែនជាដើម។ ចំពោះសំណួរទាក់ទង ទៅនឹងកិច្ចការការពារសន្តិសុខ សណ្តាប់ធ្នាប់ និងសុវត្ថិភាព ក្នុងកិច្ចប្រជុំអាស៊ាន កីឡាស៊ីហ្គេម កន្លងទៅ កម្ពុជាបានអនុវត្តបានល្អ នូវកិច្ចសហប្រតិបត្តិការ រវាងកងកំលាំងសមត្ថកិច្ចគ្រប់ជាន់ថ្នាក់ ពិសេសយើងមាន ការសាមគ្គីជាតិ បានល្អ រវាងសមត្ថកិច្ច និងប្រជាពលរដ្ឋយើង។ ឯ.ឧ នាង ផាត ក៏បានលើកឡើងដែរថា ក្នុងការប្រកួតកីឡាស៊ីហ្គេម និងប៉ារ៉ាហ្គេមកន្លងទៅ កម្ពុជាបានបង្ហាញថា ប្រទេសកម្ពុជាជាប្រទេសតូច តែមានបេះដូងធំ ដោយកម្ពុជា ទទួលការ ហូបចុក ស្នាក់នៅ របស់កីឡាករគ្រប់ប្រទេស, ការចូលទស្សនា និងការផ្សព្វផ្សាយ ដោយមិនយកប្រាក់ឡើយ ៕
