នាយឧត្តមសេនីយ៍ ម៉ឹង សំផន ប្រគល់ត្រាសិទ្ធិជូនដល់អគ្គនាយក និងនាយក តែងតាំងថ្មី ក្នុងអគ្គនាយកដ្ឋានភស្តុភារ ហិរញ្ញវត្ថុ ក្រសួងការពារជាតិ
នាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ បានអញ្ជើញជាអធិបតី ក្នុងពិធីប្រគល់ត្រាសិទ្ធិ អគ្គនាយក នៃអគ្គនាយកដ្ឋានភស្តុភារ ហិរញ្ញវត្ថុ ក្រសួងការពារជាតិ ត្រាសិទ្ធ នាយក នៃនាយកដា្ឋនផ្គត់ផ្គង់ និងនាយក នាយកដ្ឋានហិរញ្ញវត្ថុ ជូនដល់អគ្គនាយក និងនាយកតែងតាំងថ្មី ក្នុងអគ្គនាយកដ្ឋានភស្តុភារ ហិរញ្ញវត្ថុ ក្រសួងការពារជាតិ ដែលត្រូវបានព្រះមហាក្សត្រ រាជរដ្ឋាភិបាល និងក្រសួងការពារជាតិ តែងតាំងថ្មី ជាអគ្គនាយក និងជានាយក ដែលបានប្រព្រឹត្តទៅនៅថ្ងៃទី១៧ ខែសីហា ឆ្នាំ២០២៣ នៅទីស្ដីការក្រសួងការពារជាតិ។ សូមបញ្ជាក់ថា៖ ត្រាសិទ្ធ ដែលត្រូវបានប្រគល់ដល់អគ្គនាយក, និងនាយកដ្ឋានទាំងពីរ ក្នុងអគ្គនាយកដ្ឋានភស្តុភារ ហិរញ្ញវត្ថុ ក្រសួងការពារជាតិ នាពេលនេះ ត្រូវបានប្រគល់ជូនដល់ ឧត្តមសេនីយ៍ទោ ម៉ឹង ពន្លក ដែលជាអគ្គនាយកថ្មី ទើបត្រូវបានព្រះមហាក្សត្រ រាជរដ្ឋាភិបាល ក្រសួងការពារជាតិ តែងតាំងថ្មី ជាអគ្គនាយក នៃអគ្គនាយកដ្ឋានភស្តុភារ ហិរញ្ញវុត្ថ, ប្រគល់ត្រាសិទ្ធ ជូនឧត្តមសេនីយ៍ទោ សេង សំរិទ្ធ ជាអគ្គនាយករង និងជានាយក នាយកដ្ឋានផ្គត់ផ្គង់, និងប្រគល់ត្រាសិទ្ធ ជូនឧត្តមសេនីយ៍ត្រី គឹម សុវណ្ណារ៉ា ជានាយក នាយកដ្ឋានហិរញ្ញវត្ថុ នៃអគ្គនាយកដ្ឋានភស្តុភារ ហិរញ្ញវត្ថុ របស់ក្រសួងការពារជាតិ។
នាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ បានមានប្រសាសន៍ថា៖ ការប្រគល់ត្រាសិទ្ធ ជូនអគ្គនាយក នៃអគ្គនាយកដ្ឋានភស្តុភារ ហិរញ្ញវត្ថុ ត្រាសិទ្ធជូនដល់នាយកដ្ឋានផ្គត់ផ្គង់ និងនាយកដ្ឋានហិរញ្ញវត្ថុ នៃអគ្គនាយកដ្ឋានភស្តុភា-ហិរញ្ញវត្ថុ របស់ក្រសួងការពារជាតិ នាពេលនេះ គឺជាផ្នែកមួយនៃផែនការកែទម្រង់ កងយោធពលខេមរភូមិន្ទ ដែលបានដាក់ចេញ ស្របនឹងសភាពការណ៍វិវត្តន៍ថ្មីៗនាពេលបច្ចុប្បន្ន និងទៅអនាគត។ ជាមួយគ្នានេះ ឯកឧត្តម ម៉ឹង សំផន ក៍បានសម្តែងនូវការអបអរសាទរចំពោះ ឯកឧត្តម អស់លោក ដែលត្រូវបាន ព្រះមហាក្សត្រ នៃព្រះរាជាណាចក្រកម្ពុជា ត្រាស់បង្គាប់តែងតាំង និងការសម្រេចរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា តែងតាំង ឯកឧត្តមទាំងអស់ តាមសំណើរបស់ក្រសួងការពារជាតិ។ នាយឧត្តមសេនីយ៍ ម៉ឹង សំផន ក៏បានថ្លែងនូវការកោតសរសើរ និងវាយតម្លៃខ្ពស់ចំពោះ ឯកឧត្តម អស់លោក ជាប្រធានស្ថាប័ន-មេបញ្ជាការ គ្រប់កងឯកភាពជំនាញភស្តុភារ-ហិរញ្ញវត្ថុ នៃកងយោធពលខេមរភូមិន្ទ ដែលបានរួមគ្នាខិតខំប្រឹងប្រែងបំពេញភារកិច្ច និងបេសកកម្មរបស់ខ្លួនយ៉ាងខ្ជាប់ខ្ជួន ប្រកបដោយស្មារតីទទួលខុសត្រូវ ហើយសម្រេចបាននូវសមិទ្ធផលជាច្រើនគួរឲ្យកត់សម្គាល់នាពេលកន្លងមក។ ឯកឧត្តម បញ្ជាក់ថា៖ ជាការពិត នៅក្នុងនីតិកាលទី៦ នៃរដ្ឋសភា រយៈពេល៥ឆ្នាំកន្លងមកនេះ នាយទាហាន នាយទាហានរង ជំនាញ ភស្តុភារ-ហិរញ្ញវត្ថុ នៃកងយោធពលខេមរភូមិន្ទ បានពុះពារបំពេញការងារតួនាទី ភារកិច្ច ដែលរាជរដ្ឋាភិបាល និងក្រសួងការពារជាតិ ប្រគល់ជូន និងទទួលបានលទ្ធផលគួរជាទីមោទនៈ។
ឯកឧត្តម ម៉ឹង សំផន ក៍បានលើកឡើងដែរថា៖ នាយទាហានជំនាញភស្តុភារ-ហិរញ្ញវត្ថុ ត្រូវបានចាត់ទុកជាឆ្អឹងខ្នងដ៏សំខាន់ ក្នុងវិស័យការពារជាតិ ដែលមិនអាចខ្វះបាន ក្នុងតួនាទីភារកិច្ចចូលរួមការពារ អធិបតេយ្យ បូរណភាពទឹកដី និងសេចក្តីសុខសាន្តសម្រាប់ប្រទេសជាតិ និងប្រជាជន។ នាយឧត្តមសេនីយ៍ ម៉ឹង សំផន បានផ្តាំផ្ញើដល់អគ្គនាយកថ្មី នៃអគ្គនាយកដ្ឋានភស្តុរភារ-ហិរញ្ញវត្ថុ និងនាយក នាយកដ្ឋានជំនាញទាំងពីរ បន្តថែរក្សាសមិទ្ធផល ដែលមាននៅពេលនេះ ឲ្យនៅគង់វង្ស តទៅមុខ ដោយត្រូវយកចិត្តទុកដាក់ពង្រឹងពង្រីកសាមគ្គីភាពឯកភាពផ្ទៃក្នុង លើការអនុវត្តការងារ ឲ្យបានកាន់តែល្អ តាមឋានានុក្រម ក្នុងការបម្រើឲ្យគ្រប់សកម្មភាពរបស់កងយោធពលខេមរភូមិន្ទ នាអាណត្តិថ្មីនេះឲ្យកាន់តែមានភាពជោគជ័យ។
ជាមួយនឹងពិធីនេះដែរ ឯកឧត្តម ក៍បានរំលឹកអំពីការរៀបចំព្រឹត្តការណ៍ការប្រកួតកីឡាស៊ីហ្គេម លើកទី៣២ ដែលកម្ពុជាធ្វើជាម្ចាស់ផ្ទះ ឆ្នាំ២០២៣ ដែលក្នុងនោះកងយោធពលខេមរភូមិន្ទយើង បានដើរតួនាទីយ៉ាងសំខាន់ ដោយបានធ្វើឱ្យល្បីរន្ទឺកិត្តិនាមកិត្តិស័ព្ទ មានមុខមាត់លើឆាកអន្តរជាតិ។ ហើយទន្ទឹមនឹងនេះ កម្ពុជា ក៍នឹងទទួលបានសិទ្ធ នៃការត្រៀមរៀបចំធ្វើជាម្ចាស់ផ្ទះ នៃព្រឹត្តិការណ៍កីឡាយុវជនអូឡាំពិកពិភពលោក ឆ្នាំ២០២៩ផងដែរ នាពេលខាងមុខ។ ជាមួយគ្នានេះដែរ ឯកឧត្តម ម៉ឹង សំផន ក៏បានបញ្ជាក់ ដល់នាយទាហាន ដែលត្រូវចូលមកកាន់មុខតំណែងថ្មី ហើយបានប្រកាសប្រគល់ត្រាសិទ្ធ នាពេលនេះ ត្រូវបន្តវេន ក្នុងការបំពេញតួនាទីភារកិច្ច ឲ្យទទួលបានកាន់តែជោគជ័យធំៗថ្មីៗបន្ថែមទៀត ជូនក្រសួងការពារជាតិ កងយោធពលខេមរភូមិន្ទ និងរាជរដ្ឋាភិបាលថ្មី នីតិកាលទី៧ ៕
