កងទ័ព កម្ពុជា-ចិន បើកសមយុទ្ធ «ទេវតាសន្តិភាព» ឆ្នាំ២០២៣
សមយុទ្ធរួមគ្នា រវាងកងយោធពលខេមរភូមិន្ទ-ជាមួយកងទ័ពរំដោះប្រជាជនចិន ដែលមានឈ្មោះថា "ទេវតាសន្តិភាព ២០២៣" ក្រោមប្រធានបទ (ប្រតិបត្តិការសង្គ្រោះ សុខាភិបាល មនុស្សធម៌អន្តរជាតិ រួមគ្នានៅតំបន់គ្រោះមហន្តរាយខ្យល់ព្យុះ និងទឹកជំនន់ធ្ងន់ធ្ងរ) បានប្រារព្ធពិធីបើក នៅថ្ងៃទី១៦ ខែកញ្ញា ឆ្នាំ ២០២៣ ក្រោមអធិបតីភាព នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចំរុះ នៃកងយោធពលខេមរភូមិន្ទ និងជាប្រធានគណៈកម្មការដឹកនាំធ្វើលំហាត់ និងសមយុទ្ធ រវាងកងយោធពលខេមរភូមិន្ទ ជាមួយបណ្ដាប្រទេសជាមិត្ត និងលោកវរសេនីយ៍ឯក ពិសេស ហាវ លីនយាន នាយករង នាយកដ្ឋានសុខាភិបាល អគ្គនាយកដ្ឋានផ្គត់ផ្គង់ ភស្តុភារ នៃគណៈកម្មាធិការយោធាមជ្ឈឹម នៃសារធារណរដ្ឋប្រជាមានិតចិន ដែលបានប្រព្រឹត្តទៅ នៅបញ្ជាការដ្ឋានទ័ពពិសេស កងទ័ពជើងគោក ស្ថិតក្នុងភូមិសាស្ត្រ សង្កាត់កំបូល ខណ្ឌកំបូល រាជធានីភ្នំពេញ។
ក្នុងរបាយការណ៍របស់ ឧត្តមសេនីយ៍ទោ ប៉ែន សុក្រឹត្យវិទ្យា នាយលេខាធិការដ្ឋានសេនាធិការចម្រុះ និងជាប្រធានក្រុមការងារដឹកនាំលំហាត់សមយុទ្ធភាគីកម្ពុជា បានមានប្រសាសន៍ថា៖ សមយុទ្ធទេវតាសន្តិភាពឆ្នាំ២០២៣ បានរៀបចំ ខ្លឹមសារសមយុទ្ធជាកម្លាំងទ័ពពិត ធ្វើការចល័តតាមទីតាំង ផ្សារភ្ជាប់នឹងស្ថានភាពជាក់ស្ដែង តាមប្រធានបទ ខាងលើមានចំនួន៧ ក្នុងនោះរួមមាន៖ ការបញ្ជាកម្លាំងសុខាភិបាលរួមគ្នា ការដឹកជញ្ជូនកម្លាំងទ័ព-ការពង្រាយកម្លាំងប្រតិបត្តិការ-ការជួយសង្គ្រោះ នៅទីតាំងរងគ្រោះ-ការផ្ទេរបញ្ជូនអ្នករងគ្រោះព្យាបាលបន្ត-ការបញ្ជូនអ្នករង គ្រោះតាមផ្លូវអាកាស និងការការពារបង្ការជំងឺឆ្លង។ ជាមួយគ្នានេះដែរកងទ័ព ទាំងពីរ ក៍បានរៀបចំសេនារីយ៉ូតាមប្រធានបទ ឱ្យមានភាពប្រទាក់ក្រឡាគ្នាពីខ្លឹមសារ មួយទៅខ្លឹមសារមួយ ដូចនៅក្នុងសភាពការណ៍ជាក់ស្តែង ដោយចាត់តាំងសមយុទ្ធតាមវិធីសាស្ត្រដូចជា ការចាត់តាំងប្រព័ន្ធបញ្ជាការសង្គ្រោះ ៣កម្រិត ដែលរួមមាន៖ និតិវិធីទី១ ទីបញ្ជាការសង្គ្រោះ រុករករួមគ្នា, មណ្ឌលបញ្ជាការសង្គ្រោះជួរមុខ, និងក្រុមបញ្ជាការ កងកម្លាំងសុខាភិបាល។ និតិវិធីទី២ គឺការសង្គ្រោះសុខាភិបាលកម្រិត រួមមាន៖ ការសង្គ្រោះកម្រិតមួយ, ការសង្គ្រោះកម្រិតពីរ (បែងចែកជា១០ក្រុម), និង និតិវិធីទី៣ ការសង្គ្រោះកម្រិតបី។ របាយការណ៍បានបញ្ជាក់ទៀតថា៖ ចំពោះការប្រើប្រាស់កម្លាំងរបស់ភាគីទាំងពីរ៖ គឺភាគីកងទ័ពរំដោះប្រជាជនចិនមានចំនួនសរុប ១២៦នាក់ ក្នុងនោះក្រុមដឹកនាំសមយុទ្ធចំនួន ២០នាក់ ក្រុមអាកាសយានិកចំនួន ១០នាក់ កម្លាំងសុខាភិបាលចំនួន ៩៥នាក់។ ភាគីកម្ពុជាមានចំនួនសរុប ៥៩៥នាក់ ក្នុងនោះក្រុមដឹកនាំសមយុទ្ធ ២៤នាក់ កម្លាំងធ្វើសមយុទ្ធ ២៣៧នាក់ កម្លាំងបម្រើការចំនួន ៣៣៤នាក់។ ចំពោះការប្រើប្រាស់គ្រឿងបំពាក់របស់ភាគីទាំងពីរ៖ ភាគីចិនប្រើប្រាស់យន្តហោះសង្គ្រោះសុខាភិបាល ប្រភេទ Y-9 ចំនួន ០១គ្រឿង រថយន្តសុខាភិបាល ចំនួន០៣គ្រឿង (រថយន្តសង្គ្រោះបន្ទាន់លទ្ធភាពចល័តខ្ពស់ ចំនួន០១គ្រឿង រថយន្តបង្ការ ជំងឺឆ្លងលទ្ធភាពចល័តខ្ពស់ ចំនួន ០១គ្រឿង រថយន្តសង្គ្រោះ សម្ពាធទាបចំនួន ០១គ្រឿង) បរិក្ខារសង្គ្រោះ និងសម្ភារៈធានាគ្រប់ប្រភេទប្រមាណ ១០០០ឈុត និងប្រើប្រាស់យន្តហោះដឹកជញ្ជូន ប្រភេទ Y-20– A ចំនួន០៦គ្រឿង សម្រាប់ដឹកជញ្ជូនកម្លាំងទ័ព និងសម្ភារៈដែលបានរៀបរាប់ខាងលើ។ ដោយឡែកភាគីកម្ពុជាប្រើប្រាស់ ឧទ្ធម្ភាគចក្រប្រភេទ Mi-17 ចំនួន ០២គ្រឿង ឧទ្ធម្ភាគចក្រ ប្រភេទ Z-9 ចំនួន ០២ គ្រឿង រថយន្តសង្គ្រោះចំនួន ០៦ គ្រឿង ព្រមទាំងបរិក្ខារសុខាភិបាល និងសង្គ្រោះមួយចំនួនទៀត។ តាមរយៈនៃការធ្វើសមយុទ្ធរួមគ្នា "ទេវតាសន្តិភាព" រវាងកងទ័ពរំដោះប្រជាជនចិន ជាមួយនឹងកងយោធពលខេមរភូមិន្ទក្នុងរយៈពេល ១៣ថ្ងៃនេះ គណៈកម្មការដឹកនាំសមយុទ្ធ ក៏បានអំពាវនាវដល់បងប្អូនប្រជាពលរដ្ឋ ដែលមានបំណងចង់ចូលពិនិត្យ និងព្យាបាលជំងឺដូចបានរៀបរាប់ខាងលើ សូមអញ្ជើញទៅចុះឈ្មោះដើម្បីទទួលការពិនិត្យ និងព្យាបាលជូនបងប្អូនដោយឥតគិតថ្លៃនៅមន្ទីរពេទ្យយោធាព្រះកេតុមេលា និងនៅមន្ទីរពេទ្យយោធារបស់យោធភូមិភាគទី ៤ ក្នុងខេត្តសៀមរាប ចាប់ពីថ្ងៃនេះតទៅ។
ថ្លែងបើកសមយុទ្ធ នាយឧត្តមសេនីយ៍ ឥត សារ៉ាត់ បានបញ្ជាក់ថា៖ បច្ចុប្បន្នកម្ពុជា បានខិតខំ ពុះពាររក្សាបាននូវសុខ សន្តិភាព ស្ថិរភាពនយោបាយ និងម៉ាក្រូសេដ្ឋកិច្ច ក៏ដូចជាសន្តិសុខសាធារណៈ យ៉ាងល្អប្រសើរ ក្រោមការដឹកនាំរបស់រាជរដ្ឋាភិបាលថ្មី នីតិកាលទី ៧ ដែលប្រសូត្រចេញពីការបោះឆ្នោតដោយឆន្ទៈប្រជាពលរដ្ឋ ស្របច្បាប់ បន្តវេន ពីរាជរដ្ឋាភិបាលចាស់ ដែលមានសម្តេចតេជោ ហ៊ុន សែន ជាប្រមុខដឹកនាំប្រទេស ជាពិសេសជោគជ័យ នៃការគ្រប់គ្រងប្រកបដោយប្រសិទ្ធភាព ការឆ្លងរាតត្បាត នៃជំងឺឆ្លងជាសកលកូវីដ-១៩ ដោយមានការចូលរួមយ៉ាងសកម្មពីសំណាក់កងយោធពលខេមរភូមិន្ទ។ ឯកឧត្តម បានសង្កត់ធ្ងន់ថា៖ យើងមិនអាចប្រមើល ឃើញជាមុនអំពីការកើតឡើងនូវគ្រោះមហន្តរាយ ឬជំងឺឆ្លងរាតត្បាតថ្មីទៀតនៅពេលខាងមុខបានឡើយ ជាពិសេសក្នុងបរិការណ៍ នៃការប្រែប្រួល ប្រព័ន្ធអេកូឡូហ្ស៊ី និងការកើនឡើងកម្តៅ នៃអាកាសធាតុពិភពលោក។ កត្តានេះបានតម្រូវឱ្យកម្ពុជា ក៏ដូចជាប្រទេសក្នុងតំបន់ និងសកលលោក ត្រូវត្រៀមខ្លួនជានិច្ច ក្នុងការបង្ការទប់ស្កាត់ និងឆ្លើយតប។ ឯកឧត្តម ឥត សារ៉ាត់ បានកត់សម្គាល់ថា ប្រធានបទឆ្នាំនេះ ពិតជាឆ្លើយតបទៅនឹងគោលបំណង និងសំណូមពរភារកិច្ចចំពោះមុខ នៃកងទ័ពប្រទេសទាំងពីរ ដែលក្នុងនោះ យើងរំពឹងនឹងទទួលបានដោយជាក់ស្ដែង លើការងារមួយចំនួនដូចជា ការផ្លាស់ប្ដូរបទពិសោធន៍លើ “ ប្រតិបត្តិការសង្គ្រោះ សុខាភិបាល មនុស្សធម៌អន្តរជាតិ រួមគ្នានៅតំបន់គ្រោះមហន្តរាយ ខ្យល់ព្យុះ និងទឹកជំនន់ធ្ងន់ធ្ងរ ” និងប្រតិបត្តិការជួយសង្គ្រោះមនុស្សធម៌ក្នុងគ្រោះមហន្តរាយផ្សេងៗ ខណៈដែលកម្ពុជា ក៏ធ្លាប់ទទួលរងនូវគ្រោះមហន្តរាយនានា ដោយយថាហេតុ នៅក្នុងផ្ទៃប្រទេសនាពេលកន្លងមកផងដែរ។ នាយឧត្តមសេនីយ៍ ឥត សារ៉ាត់ បានផ្ដល់ជូននូវអនុសាសន៍មួយចំនួនដល់កម្លាំងចូលរួមធ្វើសមយុទ្ធភាគីកងទ័ពទាំងពីរ រួមមាន *ត្រូវយកចិត្តទុកដាក់ចែករំលែក ផ្លាស់ប្ដូរបទពិសោធន៍ ពីគ្នាទៅវិញទៅមក ដើម្បីអនុវត្តគ្រប់វិញ្ញាសារ នៃលំហាត់ជំនាញ យុទ្ធវិធី ក្នុងប្រតិបត្តិការ ឲ្យបានជោគជ័យតាមប្រធានបទ និងខ្លឹមសារនៃសមយុទ្ធ។ *ត្រូវពង្រឹងស្មារតីជាក្រុម ដែលជាមូលដ្ឋានគ្រឹះសំខាន់បំផុតសម្រាប់ជោគជ័យរបស់អង្គភាព និងភាពជោគជ័យរាល់បេសកកម្មនីមួយៗ។ *ត្រូវលើកកម្ពស់ស្មារតីមិត្តភាព សាមគ្គីភាព តាមរយៈការស្វែងយល់អំពីវប្បធម៌ពីគ្នាទៅវិញទៅមក ដូចជាការលេងកីឡា ការសំដែងសិល្បៈបង្ហាញពីវប្បធម៌គ្នាទៅវិញទៅមក ជាមួយគ្នា ដើម្បីបង្កើនភាពស្និទ្ធស្នាល រវាងយោធិនជាលក្ខណៈបុគ្គល ដែលអាចចូលរួមចំណែកយ៉ាងសំខាន់ក្នុងការពង្រឹងទំនាក់ទំនងរវាងកងទ័ព និងប្រជាជនប្រទេសទាំងពីរ។ ត្រូវយកចិត្តទុកដាក់ថែទាំសុខភាព និងអនុវត្តឱ្យបានម៉ឺងម៉ាត់នៅវិធានការ និងការណែនាំផ្សេងៗ របស់គណៈកម្មការដឹកនាំសមយុទ្ធ សំដៅធានាបាននៅសុខសុវត្ថិភាព ចំពោះទាំងមនុស្ស និងសម្ភារៈ គ្រឿងបំពាក់។ ឯកឧត្តម ក៍បានរំលឹកផងដែរដល់គណៈកម្មការ និងក្រុមការងារដឹកនាំប្រតិបត្តិ សមយុទ្ធភាគីទាំងពីរ ព្រមទាំងអាជ្ញាធរដែនដី សមត្ថកិច្ច ពាក់ព័ន្ធទាំងអស់ត្រូវចាប់វិធានការដោយប្រុងប្រយ័ត្ន និងផ្សព្វផ្សាយ ព័ត៌មានជូនដល់ប្រជាពលរដ្ឋ និងសាធារណៈជន នៅក្នុងមូលដ្ឋាន ដើម្បីជៀសវាងកុំឲ្យមានជួបនៅគ្រោះថ្នាក់ និងការភ័យខ្លាចដោយប្រការណាមួយ មកពីការអនុវត្តនៅក្នុងអំឡុងពេល ដែលកងយោធពលខេមរភូមិន្ទ និងកងទ័ពរំដោះប្រជាជនចិន កំពុងប្រតិបត្តិការធ្វើលំហាត់សមយុទ្ធនេះ ៕
