នាយឧត្តមសេនីយ៏ ទៀ សីហា ជួបឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋអ៊ីស្លាមប៉ាគីស្ថាន
បន្ទាប់ពីបានជួបគណៈប្រតិភូយោធាចិន និងអនុព័ន្ធយោធាកាណាដារួចមក នៅរសៀលថ្ងៃទី២១ ខែកញ្ញា ឆ្នាំ២០២៣ ដដែល ឯកឧត្តម នាយឧត្តមសេនីយ៏ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ក៏បានអនុញ្ញាត្តឱ្យ ឯកឧត្តម ស្សាសៀរូឌីន បាបាថាហ៊ីម (Zaheeruddin Babar Thaheem) ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋអ៊ីស្លាមប៉ាគីស្ថាន ប្រចាំកម្ពុជា ចូលជួបសម្តែងការគួរសម។
នៅក្នុងជំនួបនេះ ឯកឧត្តម ទៀ សីហា បានសម្តែងស្វាគមន៏ ចំពោះឯកឧត្តម Zaheeruddin Babar Thaheem ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋអ៊ីស្លាមប៉ាគីស្ថានប្រចាំកម្ពុជា ដែលកំពុងបំពេញបេសកកម្មនៅកម្ពុជា និងសូមជូនពរ ឯ.ឧ ឯកអគ្គរដ្ឋទូតបំពេញភារកិច្ច ប្រកបដោយ ជោគជ័យ។ ឯកឧត្តម មានជំនឿថា៖ តាមរយៈឯកឧត្តម ឯកអគ្គរដ្ឋទូតសាធារណរដ្ឋអ៊ីស្លាមប៉ាគីស្ថាន នឹងខិតខំ ប្រឹងប្រែងធ្វើឱ្យទំនាក់ទំនងកិច្ចសហប្រតិបត្តិការ រវាងកម្ពុជា ជាមួយសាធារណរដ្ឋអ៊ីស្លាមប៉ាគីស្ថាន កាន់តែទូលំទូលាយ ជិតស្និទ្ធ និងស៊ីជម្រៅថែមទៀត ព្រមទាំងបានពង្រឹង សាមគ្គីភាពនិងមិត្តភាព យូរអង្វែង។ ឯ.ឧ ទៀ សីហា បន្ថែមថា៖ ចំពោះក្រសួងការពារជាតិទាំង២ កម្ពុជា ប៉ាគីស្ថាន នឹងបន្តពង្រឹង កិច្ចសហប្រតិបត្តិការលើវិស័យរក្សាសន្តិភាព, ធ្វើការផ្លាស់ប្តូរដំណើរទស្សកិច្ចទៅវិញទៅមក ហើយយើងនឹង បន្តពិភាក្សារៀបចំអនុស្សារណៈយោគយល់គ្នា រវាងក្រសួងការពារជាតិទាំង២ កម្ពុជា-ប៉ាគីស្ថា។
ជាកិច្ចឆ្លើយតប ឯកឧត្តម Zaheeruddin Babar Thaheem ឯកអគ្គរដ្ឋទូតវិសាមញ្ញ និងពេញសមត្ថ ភាពនៃសាធារណរដ្ឋអ៊ីស្លាមប៉ាគីស្ថាន ប្រចាំកម្ពុជា បានសំដែងនូវអំណរគុណ យ៉ាងជ្រាលជ្រៅចំពោះ ក្រសួងការពារជាតិកម្ពុជា ដែលបានអនុញាត្តឲ្យ ឯកឧត្តម បានចូលជួបសំដែងការគួរសម ដើម្បីបានពង្រឹងពង្រីក ចំណងទាក់ទង កិច្ចសហប្រតិបត្តិការ និងការសាមគ្គីភាព មិត្តភាព ឲ្យកាន់តែមានភាពជិតស្និទ្ធ។ ឯកឧត្តម បានអបអរសាទរ និងជូនពរចំពោះ ឯកឧត្តម ឯកអគ្គរដ្ឋទូត ក៏បានសម្ដែងការអបអរសាទរ និងជូនពរចំពោះ ឯ.ឧ ទៀ សីហា ដែលរាជរដ្ឋាភិបាលកម្ពុជា នាពេលថ្មីៗនេះបានតែងតាំង ឯកឧត្តម ជាឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ។ ឯ.ឧ ឯកអគ្គរដ្ឋទូតប៉ាគីស្ថាន សង្ឃឹមថា៖ ក្រសួងការពារជាតិ នៃប្រទេសទាំង២ កម្ពុជា-ប៉ាគីស្ថាន នឹងបន្តពង្រឹងកិច្ចសហប្រតិបត្តិការលើវិស័យរក្សាសន្តិភាព, ធ្វើការផ្លាស់ប្តូរដំណើរ ទស្សកិច្ច ទៅវិញទៅមក ហើយយើងនឹងបន្តពិភាក្សារៀបចំអនុស្សារណៈ យោគយល់គ្នារវាងក្រសួងការពារជាតិទាំង២ បានសំរេចដោយជោគជ័យ ៕
