ឯ.ឧ មាស សាវ៉ន នាំអំណោយក្រុមហ៊ុនលឹមគ្រុប ចែកជូនគ្រួសារយោធិនពិការ ៣១៧កោះស្លា - ព័ត៌មានក្នងស្រុក

ព័ត៌មាន

ឯ.ឧ មាស សាវ៉ន នាំអំណោយក្រុមហ៊ុនលឹមគ្រុប ចែកជូនគ្រួសារយោធិនពិការ ៣១៧កោះស្លា

       អំណោយសម្ភារៈថវិកាប្រមាណជិត ៦ពាន់ដុល្លារបស់ក្រុមហ៊ុន លឹមគ្រុប ត្រូវបានយកទៅចែកជូនដល់ក្រុមគ្រួសារយោធិនពិការ សិស្សានុសិស្ស គ្រូពេទ្យ និង គ្រូបង្រៀន ដែលកំពុងរស់នៅ និងបំពេញការងារ ក្នុងភូមិតេជោអភិវឌ្ឍន៍ ឃុំតេជោអភិវឌ្ឍន៍ ស្រុកឈូក ខេត្តកំពត នាថ្ងៃទី២៩ ខែវិច្ឆិកាម្សិលមិញនេះ។ ពិធីនេះបានប្រព្រឹត្តទៅស្ថិតក្រោមអធិបតីភាព ឯ.ឧ នាយឧត្តមសេនីយ៍ មាស សាវ៉ន អគ្គនាយក អគ្គនាយកដ្ឋានយោធសេវា ក្រសួងការពារជាតិ។
      ឯ.ឧ ទិត្យ ម៉េងឡុង នាយកមជ្ឈមណ្ឌលយោធិនពិការ ៣១៧កោះស្លា បានឲ្យ ដឹងថា ភូមិតេជោអភិវឌ្ឍន៍ ជាភូមិទើបនឹងបង្កើតឡើងថ្មី ក្រោមគំនិតផ្តួចផ្តើមពីសម្តេច អគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា។ ដើម្បីបង្កើនជីវភាពក្រុមគ្រសារយោធិនពិការ ដោយបានចែកដី ផ្ទះ និងសម្ភារៈប្រើ ប្រាស់សព្វបែបយ៉ាង និងបានកសាងផ្លូវគមនាគមន៍ វត្តអារាម សាលារៀន និង មន្ទីរពេទ្យ។ បច្ចុប្បន្នមានក្រុមគ្រួសារយោធិនពិការ គ្រូពេទ្យ និងគ្រូបង្រៀនចំនួន ៣៩៩គ្រួសារ។ ផ្ទៃដីដែលបានចែកជូនត្រូវបានបងប្អូនកាប់ឆ្ការ និងបានដាំដំណាំ គ្រប់ប្រភេទ និងកំពុងទទួលទិន្នផលជាបណ្តើរៗ ធ្វើឲ្យជីវភាពរបស់ក្រុមគ្រួសារ នីមួយៗបានល្អប្រសើរពីមួយថ្ងៃទៅមួយថ្ងៃ យើយកូនៗបានចូលរៀនទាំងអស់គ្នា មកដល់ពេលនេះមានសិស្សានុសិស្ស ១.៥៦៩នាក់។
លោកលឹម ជុងប៊ុន នាយកក្រុមហ៊ុន លឹមគ្រុប បានវាយតម្លៃខ្ពស់ចំពោះការរីក ចម្រើននានានៅមជ្ឈមណ្ឌលយោធិនពិការ ៣១៧កោះស្លា ជាពិសេសក្រុមគ្រួសារ យោធិនពិការ និងប្រជាពលរដ្ឋ នៅភូមិតេជោអភវឌ្ឍន៍ នាពេលបច្ចុប្បន្ននេះ។ លោកបន្តថា កន្លងមកនេះក្រុមហ៊ុនបានសហការ និងធ្វើការបណ្តុះបណ្តាលលើ វិស័យកសិកម្ម ជាពិសេសលើការដាំដំណាំល្ហុងប្រេង ទៅដល់បងប្អូនយោធិនពិការ នៅមជ្ឈមណ្ឌលយោធិនពិការ ៣១៧គូនលេន ខេត្តសៀមរាបរួចមក ហើយកិច្ចការនេះ ក្រុមហ៊ុនក៏មានបំណងមកធ្វើកិច្ចសហការ និងការបណ្តុះបណ្តាលលើវិស័យកសិកម្ម ការដាំដំណាំល្ហុងប្រេង ទៅដល់បងប្អូនយោធិនពិការ ៣១៧កោះស្លាផងដែរ។

ក្នុងនាមថ្នាក់ដឹកនាំក្រសួងការពារជាតិ និងគ្រួសារយោធិនពិការ, ឯ.ឧ នាយឧត្តម សេនីយ៍ មាស សាវ៉ន អគ្គនាយក អគ្គនាយកដ្ឋានយោធសេវា បានសម្តែងនូវការ ស្វាគមន៍ និងអំណរគុណចំពោះគោលបំណង និងការនាំយកអំណោយសម្ភារៈ និងថវិកាជាច្រើនរបស់ក្រុមហ៊ុន លឹមគ្រុប មកចែកជូនដល់ក្រុមគ្រួសារយោធិនពិការ សិស្សានុសិស្ស គ្រូពេទ្យ និងគ្រូបង្រៀន នៅក្នុងភូមិតេជោអភិវឌ្ឍន៍ នាពេលនេះ។      ឯ.ឧ បានចាត់ទុកថា នេះជាទឹកចិត្តកាយវិការមួយដ៏ល្អ ដែលបានចូលរួមចំណែក យ៉ាងធំធេងជាមួយក្រសួងការពារជាតិ ក្នុងការលើកំពស់ជីវភាពរស់នៅរបស់ក្រុម គ្រួសារយោធិនពិការ និងជាការរួមចំណែកដល់រាជរដ្ឋាភិបាល់កម្ពុជា ក្នុងការកាត់ បន្ថយភាពក្រីក្រប្រជាជនកម្ពុជា។ ឯ.ឧ មាស សាវ៉ន សង្ឃឹមថា ក្រុមហ៊ុននឹងបន្តជួយ ជាបន្តទៅទៀតដល់មជ្ឈមណ្ឌល និងក្រុមគ្រួសារយោធិនពិការ នៅលើការបណ្តុះ បណ្តាលផ្នែកកសិកម្មនេះ។
      ឯ.ឧ មាស សាវ៉ន បានបំពាក់មេដាយស្ថាបនាជាតិដល់សប្បុរសជនចំនួនបីរូប ក្នុងនោះក្រុមហ៊ុនលឹមគ្រុម បានឧបត្ថម្ភដល់មជ្ឈមណ្ឌលយោធិនពិការ ៣១៧កោះស្លា មានអង្ករចំនួន ៥តោន និងថវិកា ២.៦០០ដុល្លា, ឧបត្ថម្ភដល់មន្ទីរពេទ្យបង្អែក ប៊ុនរ៉ានី ហ៊ុនសែន កោះស្លា សម្រាប់ជីកអណ្តូងថវិកា ៣.០០០ដុល្លា ព្រមទាំងចែកជូន អំណោយដល់គ្រួសារយោធិនពិការ គ្រូពេទ្យ គ្រូបង្រៀន និងសិស្សានុសិស្សផងដែរ៕