ពិធីបូជាសព ឯកឧត្តម នាយឧត្តមសេនីយ៏ ញឹក ហួន - ព័ត៌មានក្នងស្រុក

ព័ត៌មាន

ពិធីបូជាសព ឯកឧត្តម នាយឧត្តមសេនីយ៏ ញឹក ហួន

          សព ឯកឧត្តម នាយឧត្តមសេនីយ៏ ញឹក ហួន អគ្គមេបញ្ជាការរងនៃខ.ភ.ម ត្រូវបានប្រារព្ធពិធីដង្ហែនិងបូជានៅទីលានមុខវត្តបុទុមវត្តីរាជធានីភ្នំពេញវេលាព្រឹកថ្ងៃទី២១ ខែមករា ឆ្នាំ២០១៦។ពិធីបូជាសព ឯ.ឧនាយឧត្តមសេនីយ៏ ញឹក ហួនបានប្រព្រឹត្តទៅក្រោមអធីបតីភាពសម្តេចវិបុលសេនាភក្តី សាយ ឈុំ ប្រធានព្រឹទ្ធសភា ឯកឧត្តម នាយឧត្តមសេនីយ៏ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ឯកឧត្តម នាយឧត្តមសេនីយ៏ ប៉ុល សារឿន អគ្គមេបញ្ជាការនៃខ.ភ.មនិងដោយមានការចូលរួមពីសំណាក់សមាជិកព្រឹទ្ធសភា សភា រាជរដ្ឋា ភិបាល មន្ត្រីរាជការ និងកងកំលាំងប្រដាប់អាវុធទូទាំងក្នុង ខ.ភ.ម ព្រមទាំងគ្រួសារនៃសពជាច្រើន។
          បន្ទាប់ពី ឯកឧត្តម នាយឧត្តមសេនីយ៏ ប៉ុល សារឿន អគ្គមេបញ្ជាការនៃខ.ភ.ម បានអាននូវជីវ ប្រវត្តិនិងវិយោគកថារបស់សព ឯ.ឧ នាយឧត្តមសេនីយ៏ ញឹក ហួន អគ្គមេបញ្ជាការ រងនៃខ.ភ.មរួចមកគណអធិបតីនិងនាយទាហានទាំងអស់បានសំដែងនូវការសោកស្ដាយនិងចូលរួមមរណៈទុក្ខយ៉ាងក្រៀមក្រំជាមួយគ្រួសារនៃសពដែលពេលនេះបានបាត់បង់នូវនាយ ទាហានជាន់ខ្ពស់មួយរូបដែលធ្លាប់មានភក្ដីភាពចំពោះជាតិនិងមាតុភូមិហើយបានបូជាកំលាំងកាយនិងចិត្តដើម្បីការពារប្រទេសនិងប្រជាជន ។
         ការបាត់បង់រូប ឯកឧត្តម នាយឧត្តមសេនីយ៏ ញឹក ហួន គឺជាការបាត់បង់នូវធនធានមនុស្សដ៏មានតំលៃម្នាក់ដែលធ្លាប់មានស្នាដៃជាច្រើននៅលើការតស៊ូរំដោះជាតិនិងប្រជាជនឲ្យ រួចផុតពីរបបប្រល័យពូជសាសន៍ប៉ុលពតនិងការពារជាតិប្រជាជននៅតាមបណ្ដាសមរភូមិព្រំដែនកម្ពុជាកន្លងមក។
         ទោះបីរូប ឯកឧត្តម បានបាត់បង់ទៅពិតមែនក៏ប៉ុន្តែកិត្តិយសគំរូវីរភាពភាពអង់អាចក្លាហាន និងសេចក្ដីល្អរបស់ឯកឧត្តមស្ថិតស្ថេរក្នុងដួងចិត្តរបស់ភរិយា បុត្រា បុត្រី ចៅប្រុស ចៅ ស្រី បងប្អូន ញាតិមិត្ត និងយុទ្ធមិត្តដែលធ្លាប់តស៊ូរួមលេណដ្ឋានជាមួយគ្នាជារៀងរហូត ៕