កិច្ចប្រជុំក្រៅផ្លូវការរដ្ឋមន្ត្រីការពារជាតិអាស៊ាន-ចិនផ្តោតសំខាន់ទៅលើការជំរុញធ្វើអោយប្រសើរឡើងនូវបញ្ហាសន្តិសុខក្នុងតំបន់និងកិច្ចសហប្រតិបត្តិការការពារជាតិ - ព័ត៌មានក្នងស្រុក

ព័ត៌មាន

កិច្ចប្រជុំក្រៅផ្លូវការរដ្ឋមន្ត្រីការពារជាតិអាស៊ាន-ចិនផ្តោតសំខាន់ទៅលើការជំរុញធ្វើអោយប្រសើរឡើងនូវបញ្ហាសន្តិសុខក្នុងតំបន់និងកិច្ចសហប្រតិបត្តិការការពារជាតិ

បន្ទាប់ពីបានបញ្ចប់កិច្ចប្រជុំរដ្ឋមន្ត្រីការពារជាតិអាស៊ានលើកទី១០រួចមកនៅរសៀលថ្ងៃទី២៥ខែឧសភាឆ្នាំ២០១៦ក្រសួងការពារជាតិឡាវក៏បានបន្តរៀបចំកិច្ចប្រជុំក្រៅផ្លូវការរដ្ឋមន្ត្រីការពារជាតិអាស៊ាន-ចិនបន្តទៀត។កិច្ចប្រជុំក្រៅផ្លូវការរដ្ឋមន្ត្រីការពារជាតិអាស៊ាននិងរដ្ឋមន្ត្រីការពារជាតិចិននាពេលនោះបានផ្តោតការយកចិត្តទុកដាក់សំខាន់ទៅលើបញ្ហាសន្តិសុខនិងស្ថេរភាពនៅក្នុងតំបន់ការបង្កើនទំនាក់ទំនងកិច្ចសហប្រតិបត្តការការពារជាតិការកសាងទំនុកចិត្តគ្នាទៅវិញទៅមកអោយបានកាន់តែប្រសើរឡើងថែមទៀត។
ឯកឧត្តមឧត្តមសេនីយ៍ឯកចាន់សាម៉ន.ចាន់យ៉ាឡាតរដ្ឋមន្ត្រីក្រសួងការពារជាតិឡាវបានថ្លែងបើកកិច្ចប្រជុំដោយបានគូសបញ្ចាក់ថា៖អាស៊ាននិងចិនមានទំនាក់ទំនងជាមួយគ្នាជាយូរមកហើយនិងបានក្លាយជាដៃគូរសន្ទានាឆ្នាំ១៩៩៦ហើយជាដៃគូរសេដ្ឋកិច្ចដ៏ធំបំផុតរបស់អាស៊ាន។ឯកឧត្តមរដ្ឋមន្ត្រីក្រសួងការពារជាតិឡាវបានបញ្ចាក់ថា៖កិច្ចប្រជុំក្រៅផ្លូវការរដ្ឋមន្ត្រីការពារជាតិអាស៊ាននិងរដ្ឋមន្ត្រីការពារជាតិចិនកាលពីឆ្នាំមុននៅប្រទេសចិនគឺបានបើកឪកាសអោយយើងពិនិត្យមើលថាតើយើងត្រូវធ្វើកិច្ចសហប្រតិបត្តិការផ្នែកសន្តិសុខនៅច្រើនវិស័យយ៉ាងដូចម្តេចទៀត។ក្នុងនាមជារដ្ឋមន្ត្រីការពារជាតិអាស៊ានឯកឧត្តមឧត្តមសេនីយ៍ឯកចាន់សាម៉ន.ចាន់យ៉ាឡាតបានសំដែងការអបអរសាទរនិងកោតសរសើរចំពោះប្រទេសចិនក្នុងការផ្តល់គំនិតផ្តួចផ្តើមទាក់ទងទៅនិងការជំរុញអោយមានសន្តិភាពស្ថេរភាពនៅក្នុងតំបន់ក៏ដូចជាការអភិវឌ្ឍន៍សេដ្ឋកិច្ចថែមទៀត ។
ថ្លែងទៅកាន់កិច្ចប្រជុំក្រៅផ្លូវការរដ្ឋមន្ត្រីការពារជាតិអាស៊ាន-ចិននាឪកាសនោះឯកឧត្តមចាង.វ៉ាន់ឈាន់( Chang Wanquan )រដ្ឋមន្ត្រីក្រសួងការពារជាតិចិនបានសំដែងការអបអរសាទរចំពោះលទ្ធផលជាផ្លែផ្កានែកិច្ចប្រជុំរដ្ឋមន្ត្រីការពារជាតិអាស៊ានលើកទី១០ដែលបានបញ្ចប់នាពេលនេះ។ឯកឧត្តមបានបន្តថាឆ្នាំនេះជាឆ្នាំពិសេសសំរាប់យើងទាំងអស់គ្នានិងជាឆ្នាំទី១បន្ទាប់ពីការប្រកាសសហគមន៍អាស៊ានហើយឆ្នាំនេះក៏ជាខួបទី២០ឆ្នាំនៃទំនាក់ទំនងអាស៊ានចិនដែលបានចាប់ផ្តើមពីដៃគូរសន្ទនារហូតដល់ក្លាយជាដៃគូរយុទ្ធសាស្ត្រ។ប្រទេសចិននៅតែបន្តយកចិត្តទុកដាក់ចំពោះអាស៊ានគឺជាអទិភាពទីមួយដ៏សំខាន់ក្នុងទំនាក់ទំនងជាមួយប្រទេសជិតខាងហើយចិនគាំទ្រតួនាទីស្នូលរបស់អាស៊ានក្នុងកិច្ចសហប្រតិបត្តការផ្សេងៗ។ឯ.ឧបានបញ្ជាក់បន្ថែមថា៖ការរីកចំរើនសេដ្ឋកិច្ចអាចកើតឡើងបានទាល់តែមានសន្តិភាពនិងស្ថេរភាព។ដូចនេះយើងត្រូវអោយតំលៃទៅលើសន្តិភាពស្ថេរភាពក្នុងតំបន់ដោយត្រូវធ្វើយ៉ាងណាជំរុញកិច្ចសហប្រតិបត្តិបន្ថែមទៀតដើម្បីអោយមានការគោរពគ្នាទៅវិញទៅមកនៅក្នុងតំបន់។ទាក់ទងទៅនិងបញ្ហាសន្តិសុខវិញឯកឧត្តមចាង.វ៉ាន់ឈាន់បានសង្កត់ធ្ងន់ថា៖ទន្ទឹមនិងការគំរាមកំហែងសន្តិសុខប្រពៃណីនិងសន្តិសុខមិនប្រពៃណីនិងភេរវកម្មប្រទេសចិនចង់អោយមានការពង្រឹងកិច្ចសហប្រតិបត្តិការប្រឆាំងភេរវកម្មរវាងចិន-អាស៊ាន។សូមបញ្ជាក់ថា៖នៅក្នុងកិច្ចប្រជុំក្រៅផ្លូវការរដ្ឋមន្ត្រីការពារជាតិអាស៊ាន-ចិននាឪកាសនោះបណ្តារដ្ឋមន្រ្តីការពារជាតិអាស៊ានក៏បានធ្វើការពិភាក្សាផ្លាស់ប្តូរយោបល់គ្នាដើម្បីស្វែងរកយល់អោយបានទូលំទូលាយបន្ថែមទៀតក្នុងការកសាងទំនុកចិត្តគ្នាទៅវិញទៅមកអោយបានកាន់តែប្រសើរឡើង។ទន្ទឹមនេះដែរកិច្ចប្រជុំក៏បានធ្វើការផ្លាស់ប្តូរទស្សនៈស្តីពីកិច្ចសហប្រតិបត្តិការការពារជាតិឆ្ពោះទៅរកសហគមន៍ប្រកបដោយសន្តិភាពនិងវិបុលភាព។នៅក្នុងកិច្ចប្រជុំក្រៅផ្លូវការរដ្ឋមន្ត្រីការពារជាតិអាស៊ាន-ចិននាពេលនោះឯ.ឧនាយឧត្តមសេនីយ៏ទៀ.បាញ់ឧបនាយករដ្ឋមន្រ្តីរដ្ឋមន្រ្តីក្រសួងការពារជាតិបានថ្លែងថា៖កិច្ចប្រជុំក្រៅផ្លូវការរដ្ឋមន្ត្រីការពារជាតិអាស៊ាន-ចិននាពេលនេះបានក្លាយជាព្រឹត្តិការណ៍ដ៏មានសារៈសំខាន់ក្នុងការបង្កើនកិច្ចសហប្រតិបត្តិការការពារជាតិរវាងអាស៊ាននិងចិន។ចិនបានដើរតួនាទីយ៉ាងសំខាន់ក្នុងការរក្សាសន្តិភាពស្ថេរភាពនិងវិបុលភាពនៅក្នុងតំបន់អាស៊ានតាមរយះកិច្ចសហប្រតិបត្តការនិងភាពជាដៃគូរដ៏រឹងមាំរបស់យើង។ឯ.ឧទៀ.បាញ់បានសំដែងនូវជំនឿជឿជាក់ថា៖ទំនាក់ទំនងនិងកិច្ចសហប្រតិបត្តិការរវាងអាស៊ាន-ចិននឹងកាន់តែប្រសើរឡើងដើម្បីផលប្រយោជន៍នៃប្រជាជនប្រទេសទាំងពីរអាស៊ាននិងចិនតាមរយៈការលើកកំពស់សន្តិភាពស្ថេរភាពនិងការអភិឌ្ឍន៍នៅក្នុងតំបន់៕