ឯ.ឧ. នាងផាត ឧទ្ទេសនាមការងារអប់រំចិត្តសាស្ត្រនៅបញ្ជាការដ្ឋានអង្គរក្ស - ព័ត៌មានក្នងស្រុក

ព័ត៌មាន

ឯ.ឧ. នាងផាត ឧទ្ទេសនាមការងារអប់រំចិត្តសាស្ត្រនៅបញ្ជាការដ្ឋានអង្គរក្ស

កងទ័ពត្រូវប្រឆាំងដាច់ខាតនូវបដិវត្តពណ៌នៅកម្ពុជាហើយមានតួនាទីនិងភារកិច្ចយ៉ាងសំខាន់ក្នុងកិច្ចការពារជាតិសាសនានិងព្រះមហាក្សត្រការពាររដ្ឋធម្មនុញ្ញរាជរដ្ឋាភិបាលនិងភាពត្រឹមត្រូវស្របច្បាប់។ឯ.ឧ.នាយឧត្តមសេនីយ៍ នាង ផាត រដ្ឋលេខាធិការក្រសួងការពារជាតិបានមានប្រសាសន៍ដូចនេះនៅក្នុងឱកាសអញ្ជើញជួបសំណេះសំណាលនិងធ្វើបទឧទ្ទេសនាមការងារអប់រំចិត្តសាស្ត្រជូនដល់នាយទាហាននិងពលទាហានបញ្ជាការដ្ឋានអង្គរក្សនៃខ.ភ.ម នាព្រឹកថ្ងៃទី១៤ខែមិថុនាឆ្នាំ២០១៦នេះនៅឯទីបញ្ជាការដ្ឋានអង្គរក្សទួលក្រសាំងស្ថិតក្នុងក្រុងតាខ្មៅខេត្តកណ្តាល។
       ក្នុងសន្ទរកថាស្វាគមន៍របស់ឯ.ឧ ឧត្តមសេនីយ៍ឯក តូច តារាមេបញ្ជាការរង បញ្ជាការដ្ឋានអង្គរក្សបានចាត់ទុកថាការអញ្ជើញរបស់ឯ.ឧ នាយឧត្តមសេនីយ៍ នាង ផាត នៅពេលនេះពិតជាមានសារៈសំខាន់ ដែលបានផ្តល់នូវទស្សនៈនិងការយល់ដឹងថ្មីៗបន្ថែមទៀតពីសភាពការណ៍វិវត្តន៍របស់ជាតិ-អន្តរជាតិ អំពីសិទ្ធិនិងតួនាទីភារកិច្ចរបស់កងទ័ព ដើម្បីធ្វើជាទុនពង្រឹងបាននូវស្មារតីនិងឆន្ទៈមោះមុតបំពេញការងារការពារសុវត្តិភាពសន្តិសុខជូនថ្នាក់ដឹកនាំប្រមុខរាជរដ្ឋាភិបាលនិងប្រជាជន។
       ក្នុងឱកាសនោះឯ.ឧនាយឧត្តមសេនីយ៍ នាង ផាត ក្នុងនាមថ្នាក់ដឹកនាំក្រសួងការពារជាតិនិងអគ្គមេបញ្ជាការនៃខ.ភ.ម បានសំដែងនូវការកោតសរសើរនិងវាយតម្លៃខ្ពស់ចំពោះស្នាដៃនឹងសមិទ្ធផលទាំងឡាយរបស់បញ្ជាការដ្ឋានអង្គរក្សដែលបានខិតខំសម្រេចនាពេលកន្លងមកក្នុងនោះការបំពេញតួនាទីភារកិច្ចស្នូលក្នុងការការពារសុវត្ថិភាពសន្តិសុខជូនសម្តេចនាយករដ្ឋមន្ត្រីតេជោនិងសម្តេចកិត្តិព្រឹទ្ធបណ្ឌិត ព្រមទាំងក្រុមគ្រួសារ។ទន្ទឹមនឹងនេះបានសហការទប់ស្កាត់បង្ការ និងបង្រ្កាបបានយ៉ាងទាន់ពេលវេលានៅរាល់ បទល្មើសខុសច្បាប់នានា ការកសាងអង្គភាពហ្វឹកហ្វឺនរៀនសូត្រលើកកំពស់គុណភាពសមត្ថភាពនិងសុខមាលភាពកងទ័ពព្រមទាំងការចូលរួមចំណែកជាមួយនឹងរាជរដ្ឋាភិបាល ក្នុងការកសាងអភិវឌ្ឍជាតិឲ្យមានការរីកចំរើនលើគ្រប់វិស័យ។
         ឯ.ឧ នាង ផាត បានលើកឡើងនូវព្រឹត្តិការណ៍សំខាន់ៗ និងគោលដៅភារកិច្ច ជាអាទិភាពរបស់ ខ.ភ.ម នៅជុំវិញសភាពការណ៍ថ្មីៗចំពោះមុខមួយចំនួន និងទស្សនៈ វិស័យសម្រាប់អនាគតរបស់ ខ.ភ.ម, ក៏ដូចជាព្រឹត្តិការណ៍ដែលកើតឡើងថ្មីៗបំផុតនៅ ក្នុងប្រទេស ដោយបានធ្វើកាឆ្លុះបញ្ចាំងអំពីសភាពការណ៍គ្រប់គ្រងនយោបាយសន្តិសុខ និងរដ្ឋបាលសាធារណៈរបស់រដ្ឋនៅឆមាសទី២ ឆ្នាំ២០១៦នេះ និងពីសភាពការណ៍ដែលបាននិងកំពុងមានការវិវត្តន៍ប្រែប្រួលមួយចំនួន លើពិភពលោក តំបន់ និងដែលបានជះឥទ្ធិពលមកដល់កម្ពុជានាពេលបច្ចុប្បន្ន ដែលបានបង្ហាញនូវភាពរឹងមាំនិងម៉ត់ចត់ ក្នុងការពង្រឹងស្ថេរភាពនយោបាយសន្តិសុខសណ្តាប់ធ្នាប់ ដើម្បីធានាឲ្យបានប្រក្រតីភាពនៃជីវភាពរស់នៅរបស់ប្រជាជន នៅក្រោមការដឹកនាំដ៏ឈ្លាស់វៃ និងប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជា។ ក្នុងនោះសម្តេចបានលើកឡើងថា ត្រូវធានាឲ្យបាននូវភាពរឹងមាំនិងភាពម៉ត់ចត់ ក្នុងមានន័យថា ការធានាឲ្យបាននូវស្ថេរភាពនយោបាយ ឧត្តមគតិប្រយោជន៍ជាតិ និងប្តេជ្ញាដាច់ខាត់មិនឲ្យមានបដិវត្តន៍ពណ៌នៅកម្ពុជា។
        ឯ.ឧ.នាយឧត្តមសេនីយ៍បានបញ្ជាក់ថារាជរដ្ឋាភិបាលនៅក្រោមការដឹកនាំរបស់សម្តេចអគ្គមហាសេនាបតីតេជោបានឆ្លងកាត់ការដឹកនាំប្រទេសទាំងពេលមានអំណោយផលផង និងមិនអំណោយផលផងហើយបានការពារប្រទេសឲ្យស្ថិតស្ថេរគង់វង្សក្នុងឯករាជ្យសន្តិភាពអធិបតេយ្យភាពនិងបូរណភាពដែនដីដ៏ពេញលេញ។ទន្ទឹមនេះក៏បានខិតខំប្រឹងប្រែងកសាងនិងអភិវឌ្ឍប្រទេសជាតិដោយចេញពីបាតដៃទទេក្នុងនោះបានកសាងនូវហេដ្ឋារចនាសម្ព័ន្ធនានាជាច្រើនធ្វើឲ្យប្រទេសជាតិមានការរីកចំរើនយ៉ាងឆាប់រហ័សនៅលើគ្រប់វិស័យព្រមទាំងបានលើកស្ទួយនូវកិត្យានុភាពប្រទេសជាតិ និងខ.ភ.មឲ្យស្មើរមុខស្មើរមាត់នៅលើឆាតអន្តរជាតិ។ឯ.ឧ បានបន្តថាចំពោះផែនការយុទ្ធសាស្ត្រការពារជាតិ,រាជរដ្ឋាភិបាលក៏បានយកចិត្តទុកដាក់យ៉ាងខ្លាំងក្លាដោយបានធ្វើការប្រែក្លាយតំបន់ដែលធ្លាប់តែមានជម្លោះប្រយុទ្ធនឹងគ្នាទៅជាតំបន់អភិវឌ្ឍន៍ និងតំបន់ទេសចរណ៍ដោះស្រាយព្រំដែនដោយសន្តិវិធីដោយបានធ្វើឲ្យខ្សែបន្ទាត់ព្រំដែនមិត្តភាពសន្តិភាពកិច្ចសហប្រតិបត្តិការ និងការអភិវឌ្ឍន៍។
      ឯ.ឧ.នាយឧត្តមសេនីយ៍បានជំរុញនិងលើកទឹកចិត្តដល់នាយទាហាននិងពលទាហានបញ្ជាការដ្ឋានអង្គរក្សនៃ ខ.ភ.ម បន្តចូលរួមអនុវត្តនូវប្រពៃណីដ៏ល្អរបស់ខ្លួនបន្តទៀត ក្នុងនោះការថែរក្សាសម្ភារៈយោធបិក្ខានិងគ្រឿងបំពាក់,ហើយអនុវត្តឲ្យបានជោគជ័យនូវរាល់អនុសាសន៍របស់សម្តេចតេជោហ៊ុនសែន ក៏ដូចជាកម្មវិធីនយោបាយរបស់រាជរដ្ឋាភិបាលក្នុងការកែទម្រង់ ខ.ភ.ម ៕