ទីលានបាញ់គ្រាប់ពិតមរតកតេជោ
សែន ភ្នំវាលចាប យោធភូមិភាគទី៥ ត្រូវបានចាប់ផ្តើមដំណើរការសាងសង់ពីខែធ្នូ ឆ្នាំ២០១៤ លើផ្ទៃដីទំហំ ៦៥០ហិកតា ដោយកងវិស្វកម្មសម្តេចតេជោរបស់ ឯកឧត្តម នាយឧត្តមសេនីយ៏ ខេង សុមេធ
អគ្គស្នងការរងនគរបាលជាតិ ដែលត្រូវបានសម្តេចតេជោ ហ៊ុន សែន នាយករដ្ឋមន្ត្រី
និងសម្តេចកិត្តិព្រឹទ្ធបណ្ឌឹត ប៊ុន រ៉ានី ឧបត្ថម្ភនូវថវិការកសាងទាំងស្រុង។ សមិទ្ធផលរបស់ទីលានរួមមាន៖ ខ្លោងទ្វា,
ប្រព័ន្ធផ្លូវក្រាលគ្រួសក្រហមចូល និងនៅក្នុងទីលាន,ផ្លូវចល័តរថក្រោះ ៨ខ្សែ និងផ្លូវបេតុងឡើងភ្នំទៅវេទិការប្រវែង
១៦គីឡូម៉ែត្រ, បន្ទប់ទឹក នឹងទីលានចុះឧទ្ធម្ភាគចក្រ ២កន្លែង, ប្រព័ន្ធលូផ្លូវចល័តរថក្រោះ ៨ខ្សែ, ទំនប់បង្ហៀរទឹក១, អាគារស្នាក់នៅសិក្ខាកាម ៣ខ្នង, ទីចាត់ការ ១ខ្នង, សាលប្រជុំ ១ខ្នង,
អាគារផ្ទះបាយបំពាក់តុកៅអី ១ខ្នង, គិលានដ្ឋាន ១ខ្នង, រោងដាក់រថក្រោះ ១ខ្នង,
ឃ្លាំងដាក់អាវុធគ្រាប់ និងសំភារៈ ១ខ្នង និងតបណ្តាញទឹក ភ្លើង ក្នុងទីលាន។
ក្រៅពីនោះយោធភូមិភាគបានកសាងបន្ថែមនូវសំណង់មួយចំនួនដូចជា៖ ផ្ទះកងការពារ ៦កន្លែង, រោងសក្ការៈ
និងកែសំរួលហេដ្ឋារចនាសម្ព័ន្ធមួយចំនួន។
ចំពោះការសំដែងលំហាត់សហការបាញ់គ្រាប់ពិតគឺបានប្រើប្រាស់កំលាំងសារុបប្រមាណ ៣០០នាក់ ក្នុងនោះមកពីកងពលតូចលេខ៥១ ចំនួន ៤៧នាក់, កងពលតូចលេខ៥២ ចំនួន ១១១នាក់, កងពលតូចលេខ៥៣ ចំនួន ២២នាក់, នគរបាលជាតិខេត្តបាត់ដំបងចំនួន ៤០នាក់, វរៈសេនាតូចលេខ៦៧ ចំនួន ២៥នាក់, វរសេនាតូចការពារអាកាសយោធភូមិភាគទី៥ ចំនួន ១០នាក់, វរសេនាតូចវិស្វកម្មយោធភូមិភាគទី៥ ចំនួន ៧នាក់, កងអនុសេនាធំបញ្ជូនសារយោធភូមិភាគទី៥ ចំនួន ៧នាក់, ក្រុមគ្រូកងទ័ពជើងគោក ១៤នាក់ និងក្រុមគ្រូយោធភូមិភាគទី៥ ចំនួន ១៦នាក់ ដោយប្រើប្រាស់រថក្រោះចំនួន ៥គ្រឿង, កាំភ្លើងត្បាល់ ១០០ម.ម ចំនួន ៦ដើម, កាំភ្លើងការពារអាកាស ២៣ម.ម ចំនួន ២ដើម, អាវុធ ១២,៧ម.ម ចំនួន ៤ដើម និងប្រភេទ បេ៤០, បេ៤០, ៥, បេ៤១ ចំនួន ១២ដើម។កម្មសិក្សាការីទាំងអស់បានទទួលការហ្វឹកហ្វឺនរយៈពេល ៦១ថ្ងៃ គឺ ២៥ថ្ងៃ កំលាំងថ្មើរជើងហ្វឹកហ្វឺននៅនឹងអង្គភាព ដោយឡែកជំនាញអាវុធហ្វឹកហ្វឺននៅនឹងសាលាពលទាហានយោធភូមិភាគទី៥ នឹង រយៈពេល ៣៦ថ្ងៃ កំលាំងទាំងអស់ចូលហ្វឹកហ្វឺនជាក់ស្ដែងនៅលើទីលានភ្នំវាលចាបនេះតែម្តង។
ក្នុងឱកាសនោះ ឯកឧត្តម ឧត្តមសេនីយ៍ឯក ប៊ុន សេង បានថ្លែងអំណរគុណចំពោះសម្តេចតេជោ និងសម្តេចកិត្តិព្រឹទ្ធបណ្ឌឹត ដែលបានជួយឧបត្ថម្ភនូវថវិការកសាងទីលានបាញ់គ្រាប់ពិតនេះទាំងស្រុងសំរាប់ទុកជាមរតកដ៏ថ្លៃថ្លាដល់យោធភូមិភាគទី៥ ក្នុងការបំរើផលប្រយោជន៏ជាតិនាពេលបច្ចុប្បន្ននិងទៅថ្ងៃអនាគត ឯកឧត្តម ក៏បានថ្លែងអំណរគុណចំពោះថ្នាក់ដឹកនាំក្រសួងការពារជាតិ, អគ្គបញ្ជាការ, កងទ័ពជើងគោក អគ្គស្នងការនគរបាលជាតិ ដែលតែងតែគាំទ្រគ្រប់សកម្មភាពក្នុងការឆ្លើយតបនូវបទបញ្ជារបស់សម្តេចតេជោ និងសម្តេចកិត្តិព្រឹទ្ធបណ្ឌឹត ក្នុងការធ្វើឲ្យទីលាននេះចេញជារូបរាងដូចថ្ងៃនេះ។ ឯកឧត្តម មេបញ្ជាការយោធភូមិភាគ ក៏បានកោតសរសើរ និងវាយតំលៃខ្ពស់ចំពោះការខិតខំប្រឹងប្រែងរៀនសូត្រ, ហ្វឹកហាត់របស់នាយ និងពលទាហានជាកម្មសិក្សាការីក្នុងការពង្រឹងសមត្ថភាពលើជំនាញសហការប្រយុទ្ធរវាងកំលាំងថ្មើរជើងរបស់ ខ.ភ.ម, កំលាំងនគរបាលជាតិ និងអាវុធគាំទ្រគ្រប់ប្រភេទដោយទទួលបានលទ្ធផលល្អប្រសើរនាពេលនេះ៕
