ឯ.ឧ គន់ គីម ប្រជុំបច្ចុប្បន្នភាពការងារសមាគមអតីតយុទ្ធជនទិសយោធភូមិភាគ៣ - ព័ត៌មានក្នងស្រុក

ព័ត៌មាន

ឯ.ឧ គន់ គីម ប្រជុំបច្ចុប្បន្នភាពការងារសមាគមអតីតយុទ្ធជនទិសយោធភូមិភាគ៣

កាលពីព្រឹកថ្ងៃទី១៤ខែកក្កដាឆ្នាំ២០១៦ឯ.ឧនាយឧត្តមសេនីយ៏ គន់ គីម ក្នុងនាមអគ្គលេខាធិការសមាគមអតីតយុទ្ធជនកម្ពុជាបានអញ្ជើញជាអធិបតីភាពនៅក្នុងកិច្ច ប្រជុំ បច្ចុប្បន្នភាពអំពីសកម្មភាពនៃការអនុវត្តភារកិច្ចអតីតយុទ្ធជនកម្ពុជារបស់ទិសយោធភូមិភាគទី៣។
កិច្ចប្រជុំដែលបានធ្វើឡើងនៅទីបញ្ជាការយោធភូមិភាគទី៣ដោយមានការចូលរួមពីឯកឧត្តមអស់លោកជាសមាជិកគណៈកម្មាធិការកណ្តាលសមាគមប្រធាន និងអនុប្រធានគណៈកម្មាធិការ សមាគមថ្នាក់ខេត្តក្រុងចំណុះឲ្យទិសយោធភូមិភាគទី៣។តាមកិច្ចពិភក្សារបស់សមាគមថ្នាក់យោធភូមិ
ភាគ និងតាមបណ្តាខេត្តនីមួយៗបានលើកឡើងពីការយកចិត្តទុកដាក់បំពេញភារកិច្ចតាមអនុសាសន៏ទាំង១៤ចំណុចរបស់សម្តេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជនកម្ពុជានៅក្នុងការសម្រេចការងារធំៗរួមមាន៖ការបើកផ្តល់ប្រាក់បេឡាមរណៈជូនគ្រួសារសពអតីតយុទ្ធជន ការចុះជួបសួរសុខទុក្ខសមាជិកនៅមូលដ្ឋានការចុះជួយសាងសង់លំនៅដ្ឋានជូនគ្រួសារសមាជិកអតីតយុទ្ជជន និងការគៀងគររក មូលនិធិដើម្បីទ្រទ្រង់ដល់សមាគមជាដើម។
មានប្រសាសន៏នាឱកាសនោះនាយឧត្តមសេនីយ៏ គន់ គីម បានវាយតម្លៃខ្ពស់ចំពោះស្មារតីពុះពាររបស់ថ្នាក់ដឹកនាំគ្រប់ថ្នាក់ដែលបានធ្វើឲ្យបងប្អូនអតីតយុទ្ធជន និងគ្រួសារ មានភាពកក់ក្តៅនិងមានការជឿជាក់លើការដឹកនាំរបស់សមាគម តាមរយៈនៃការដោះស្រាយសំណូមពរ និងការបើកប្រាក់គោលរបបផ្សេងៗបានទាន់ពេលវេលា។ នាយឧត្តមសេនីយ៏ គន់ គីម បានផ្តាំផ្ញើដល់ថ្នាក់ដឹកនាំគ្រប់ថ្នាក់ត្រូវបន្តយកចិត្តទុកដាក់ដល់ការធ្វើបច្ចុប្បន្នភាពនិងគ្រប់គ្រងសមាជិកអតីតយុទ្ធជនឲ្យ កាន់តែសុក្រិត្យតាមពត៌មានវិទ្យា។ជាមួយនោះត្រូវសហការជាមួយស្ថាប័នពាក់ព័ន្ធអាជ្ញាធរដែនដីដើម្បីជួយបង្កលក្ខណៈងាយស្រួលដល់បងប្អូនអតីតយុទ្ធជននិងគ្រួសាររបស់ខ្លួន មានអាទិភាពទទួលបាននូវសេវាសាធារណៈដូចជា៖ការបណ្តុះបណ្តាលវិជ្ជាជីវៈ,ការជួយសាងសង់ផ្ទះសម្បែង,ការបង្កើតមុខរបរ,ការផ្តល់ជំនួយសង្គ្រោះបន្ទាន់ពេលមានជម្ងឺ ឬគ្រោះថ្នាក់ផ្សេងៗជាយថាហេតុ៕