ក្នុងរបាយការណ៍បូកសរុបដែលអានដោយលោក សន សុផល ប្រធានមន្ទីរសង្គមកិច្ច រាជធានីភ្នំពេញ និងជាអនុប្រធានសមាគមអតីតយុទ្ធជនកម្ពុជារាជធានីភ្នំពេញ បានឲ្យដឹងថាក្នុងរយៈពេល៦ខែ ដើមឆ្នាំ២០១៦ នេះសមាគមបានចុះធ្វើការប្រកាសទទួលស្គាល់គណៈកម្មាធិការសមាគមអតីតយុទ្ធជនកម្ពុជានៅខណ្ឌទាំង១២ និងសាខាសង្កាត់ចំនួន៩៦ ហើយប្រធានកិត្តិយសគ្រប់ខណ្ឌបានចុះសួរសុខទុក្ខ និងប្រគល់ថវិកាមរណៈសង្គ្រោះតាមខណ្ឌនីមួយៗ។ បច្ចុប្បន្នសមាគម មានស្ថិតិសមាជិកសរុប ៦៥២៧នាក់។
ឯកឧត្តម នាយឧត្តមសេនីយ៍ ជួន សុវណ្ណ អគ្គស្នងការរង និងជាស្នងការនគរបាល រាជធានីភ្នំពេញ ប្រធានសមាគមអតីតយុទ្ធជនកម្ពុជា រាជធានីភ្នំពេញ បានមានប្រសាសន៍ឲ្យដឹងដែរថាសមាគមបានទទួលសំណុំឯកសារស្នើសុំថវិកាចំនួន ៧៧នាក់ មកដល់ពេលនេះបានដោះស្រាយប្រគល់ថវិកាបេឡាមរណៈសង្គ្រោះជូនរួចរាល់ចំនួន៧៧នាក់។ នៅក្នុងឆមាសទី២នេះសមាគមមានផែនការធ្វើបច្ចុប្បន្នភាពទៅលើចំនួនសមាជិកសមាគមឲ្យបានច្បាស់លាស់ដើម្បីងាយស្រួលមានលទ្ធភាពក្នុងការជួយផ្គត់ផ្គង់ និងទំនាក់ទំនងដោះស្រាយបាននូវបញ្ហាផ្សេងៗរបស់ពួកគាត់ ហើយនឹងបង្កើតមូលនិធិសប្បុរសជនរបស់សមាគម ដើម្បីគៀងគរពីសប្បុរសជនមកទ្រទ្រង់ដល់សមាគមដែលបច្ចុប្បន្នមានថវិកាតម្កល់ចំនួនជាង ៩១លានរៀល។
ឯកឧត្តម នាយឧត្តមសេនីយ៍ នាង ផាត ក្នុងនាមសម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា និងឯកឧត្តម អគ្គលេខាធិការសមាគមអតីតយុទ្ធជនកម្ពុជា បានសម្តែងនូវការកោតសរសើរ និងវាយតម្លៃខ្ពស់ចំពោះសមាគមអតីតយុទ្ធជនកម្ពុជា រាជធានីភ្នំពេញ ដែលកន្លងមកនេះ បានខិតខំប្រឹងប្រែងបំពេញតួនាទីភារកិច្ចនិងសម្រេចបាននូវសមិទ្ធផលស្នាដៃជាច្រើនលើការជួយដោះស្រាយការលំបាកខ្វះខាតរបស់បងប្អូនសមាជិកសមាគមអតីតយុទ្ធជនរាជធានីភ្នំពេញ។ឯ.ឧ បានមានប្រសាសន៍ថា ក្រោមការដឹកនាំរបស់សម្តេចតេជោ ហ៊ុន សែន ជាស្ថាបនិក ដែលបានផ្តួចផ្តើមបង្កើត និងធ្វើជាប្រធានដឹកនាំ ចំពោះសមាគមអតីតយុទ្ធជនកម្ពុជា ដើម្បីលើកស្ទួយជីវភាព បង្កើតស្មារតីជួយឧបត្ថម្ភគ្នាទៅវិញទៅមក លើកកម្ពស់តួនាទីរបស់អតីតយុទ្ធជនឲ្យសក្តិសម ទៅនឹងគុណបំណាច់ចំពោះជាតិ និងប្រជាជន។ ជាងនេះទៅទៀត សម្តេចអគ្គមហាសេនាបតីតេជោ បានបង្កើតសំណាញ់សុវត្ថិភាពសង្គមប្រកបដោយចិរភាព ក្នុងការលើកកម្ពស់កម្រិតជីវភាពរស់នៅរបស់បងប្អូនគ្រួសារអតីតយុទ្ធជនកម្ពុជា ដែលបានផ្តល់ការរស់នៅ ប្រកបដោយសុខដុមរមនាជាមួយក្រុមគ្រួសារ និងសហគមន៍ តាមរយៈការបណ្តុះបណ្តាលវិជ្ជាជីវៈ ការផ្តល់ដីសម្បទានសង្គមកិច្ច ជួយសាងសង់លំនៅដ្ឋាន ការផ្តល់មុខរបរ និងការជួយដោះស្រាយជីវភាពរំសាយចូលនិវត្តន៍ បាត់បង់សមត្ថភាព ពិការ និងគ្រួសារយុទ្ធជនពលីមរណៈ។ ជាក់ស្តែងទិវារំលឹកគុណអតីតយុទ្ធជន ត្រូវបានប្រព្រឹត្តទៅជារៀងរាល់ឆ្នាំ នៅថ្ងៃទី២១ ខែមិថុនា ទូទាំងប្រទេស។ ឯ.ឧ នាង ផាត ជំរុញនិងលើកទឹកចិត្តដល់សមាគមអតីតយុទ្ធជនកម្ពុជា រាជធានីភ្នំពេញ បន្តការបំពេញតួនាទី ភារកិច្ចដ៏ល្អរបស់ខ្លួនថែមទៀត ដើម្បីលើកស្ទួយកិត្តិយស ជីវភាពរស់នៅ សត្តិអារម្មណ៍របស់បងប្អូនអតីតយុទ្ធជន។
ក្នុងឱកាសនោះ ឯកឧត្តម នាង ផាត និងឯកឧត្តម ជួន សុវណ្ណ បានប្រគល់ថវិកាបេឡាមរណៈសង្គ្រោះជូនដល់គ្រួសារសពសមាជិកអតីតយុទ្ធជនរាជធានីភ្នំពេញ ចំនួន១១នាក់ ក្នុងម្នាក់ៗថវិកាចំនួន០៤លានរៀល៕
