ឯកឧត្តមនាយឧត្តមសេនីយ៍សៅសុខា បានមានប្រសាសន៍ថា ការកិច្ចប្រជុំនេះ ផ្តោតលើការប្រគល់ ភារកិច្ច ពីការប្រតិបត្តិ តួនាទីជំនាញ របស់កងរាជអាវុធហត្ថ ដែលមិនអាចកាត់ផ្តាច់បានពីការងារកសាងកម្លាំង ហើយក៏មិនអាចកាត់ផ្តាច់បានពីការងារធានាផ្គត់ផ្គង់ មធ្យោបាយ ភស្តុភារ បានដែរ។ ឯកឧត្តមនាយឧត្តមសេនីយ៍មេបញ្ជាការបានបន្ថែមថា ការប្រជុំនេះដើម្បីមានមូលដ្ឋានក្នុងការប្រតិបត្តិ តួនាទី ភារកិច្ច របស់កងរាជអាវុធហត្ថ ជាពិសេសមេបញ្ជាការ និងនាយទាហានទទួលខុសត្រូវតាមបណ្តាផ្នែកតាមបណ្តា ជំនាញនិងវិស័យនីមួយៗ ត្រូវក្តាប់ឲ្យបាននូវភារកិច្ចដែលខ្លួន ត្រូវធ្វើ ជាមួយនឹងកិច្ចការងារដែលខ្លួនមិនត្រូវធ្វើនិងត្រូវជៀសវាង។ ឯកឧត្តម ក៏បានជំរុញឲ្យមានសកម្មភាពខ្លាំងក្លាថែមទៀត និងឲ្យតម្លៃការងារជំនាញ ព័ត៌មានសន្តិសុខ ទាំងនៅក្នុងនិងក្រៅប្រទេសឬពីក្រៅប្រទេសមកក្នុងប្រទេស តាមដាននិងសំអាតគឺមិន ទុកឲ្យពួកភាវរករអាចយកទឹកដីកម្ពុជាធ្វើសកម្មភាពបានជាដាច់ខាត នេះជាកិច្ចការដ៏មានសារៈសំខាន់ចំបង ទី១ បំរើឲ្យប្រតិបត្តិការរបស់កងរាជអាវុធហត្ថមានប្រសិទ្ធិភាពខ្ពស់។ ក្នុងនោះដែរ ឯកឧត្តម ក៏បានជំរុញឲ្យគ្រប់បណ្តាអង្គភាពកងរាជអាវុធហត្ថតាមខេត្ត ត្រូវអប់រំ ពន្យល់ ឲ្យយល់ច្បាស់ពីប្រយោជន៍ និងសារៈសំខាន់ នៃការងារព័ត៌មានដល់ជំនាញ ដើម្បីវាយតម្លៃ និងមានវិធានការណ៍ដោះស្រាយបានទាន់សភាពការណ៍។ ឯកឧត្តម ក៏បានព្រមានដល់អាវុធហត្ថណាដែលប្រើប្រាស់គ្រឿងញៀន និងមានភស្តុតាងច្បាស់លាស់ ស្ថិតក្នុងឋានន្តរសក្តិណាក៏ដោយនឹងត្រូវលប់ឈ្មោះចេញពីបញ្ជីកងរាជអាវុធហត្ថភ្លេមដោយ អនុវត្តរបបសមូហភាព បុគ្គលជាអ្នកទទួលខុសត្រូវ។ ជាមួយនោះដែរ ត្រូវធ្វើការត្រួតពិនិត្យ និងអនុវត្តច្បាប់ ចំពោះ អាវុធហត្ថណា ដែលប្រើប្រាស់ ឬរក្សាទុកអាវុធខុសច្បាប់ ព្រមទាំងត្រូវត្រួតពិនិត្យអាវុធហត្ថណា ដែលអវត្តមានយូពីអង្គភាព និងគ្មានមូលហេតុ ក៏ត្រូវបានលប់ចេញពីបញ្ជីផងដែរ ព្រមជាមួយនោះ ក៏បានព្រមានចំពោះអាវុធហត្ថណា ដែលយកតួនាទីរបស់ខ្លួន ទៅបទល្មើស ប្រព្រឹត្តអំពើពុករលួយ ពិសេសនៅក្នុងបទ ល្មើស គ្រឿងញៀន។ ឯកឧត្តម មេបញ្ជាការ ជំរុញឲ្យអាវុធហត្ថទាំងអស់ ត្រូវចូលរួម អនុវត្តច្បាប់ ចរាចរណ៍ផ្លូវគោក ទាំងអស់គ្នា។
