ឯកឧត្តម មាស សាវ៉ន ធ្វើបឋកថា នៅកងរាជអាវុធហត្ថ - ព័ត៌មានក្នងស្រុក

ព័ត៌មាន

ឯកឧត្តម មាស សាវ៉ន ធ្វើបឋកថា នៅកងរាជអាវុធហត្ថ

ថ្មីៗនេះ ឯកឧត្តម នាយឧត្តមសេនីយ៏ មាស សាវ៉ន អគ្គនាយក អគ្គនាយកដ្ឋានយោធសេវា និង ឯកឧត្តម ឧត្តមសេនីយ៍ឯក នាង អេង អគ្គនាយករង អគ្គនាយកដ្ឋានយោធសេវា និងជានាយក នាយកដ្ឋានអប់រំចិត្តសាស្ត្រក្រសួងការពារជាតិ បានអញ្ជើញទៅធ្វើបឋកថាស្តីពីសភាពការណ៏ជាតិ អន្តរជាតិ តួនាទីខ.ភ.ម និងនយោបាយឈ្នះ ! ឈ្នះ ! របស់សម្តេចតេជោ ហ៊ុន សែន ជូនដល់វគ្គបំប៉ននាយទាហានកងរាជអាវុធហត្ថថ្នាក់ឧត្តមសេនីយ៏ឆ្នាំ២០១៦ ដែលមានចំនួន ២៨នាក់។
ចំពោះសភាពការណ៏សាកលលោក ឯកឧត្តម មាស សាវ៉ន បានលើកឡើងនូវបញ្ហាអន្តរជាតិដែលបាននឹងកំពុងកើតឡើងនៅក្នុងតំបន់អឺរ៉ុប,តំបន់មជ្ឈឹមបូព៌ា,តំបន់ អាស៊ីប៉ាស៊ីហ្វិក និងតំបន់អាស៊ីអាគ្នេយ៏ដែលទទួលរងនូវអំពើភេវរកម្មហើយថ្មីៗនេះវិបត្តិនៃការដកខ្លួនរបស់ចក្រភពអង់គ្លេសពីសហភាពអឺរ៉ុប។ហើយបច្ចុប្បន្នសាកលលោកកំពុងមានការបត់បែនចំរូងចំរាស់ដែលពុំទាន់ដោះស្រាយបានជាពិសេសការប្រកួតប្រជែងខាងសេដ្ឋកិច្ច ពាណិជ្ជកម្ម និងវិនិយោគ។ការដណ្ដើមភូមិសាស្ត្រដែលសំបូរធនធានធម្មជាតិ ជំលោះសង្គ្រាមស៊ីវិល ជំលោះដណ្ដើមទឹកដី ការគំរាមដោយអំពើភេរវកម្មបញ្ហាអាវុធនុយក្លេអ៊ែរ និងគ្រោះធម្មជាតិ។ដោយឡែកសមាគមន៏អាស៊ានក៏កំពុងប្រឈមនឹងការមានបណ្ដាញភេវរកម្ម ការធ្វើអន្តោប្រវេសន៏ បញ្ហាសន្តិសុខដែនសមុទ្រ ហើយថ្មីៗនេះបញ្ហាសមុទ្រចិនខាងត្បូងក៏ជាការដណ្ដើមតួនាទីរបស់ប្រទេសមហាអំណាចក្នុងតំបន់ផងដែរ។ ឯកឧត្តម ក៏បានបន្តទៀតថា៖ ចំពោះព្រឹត្តិការក្នុង ប្រទេសកម្ពុជាក៏កំពុងទទួលឥទ្ធិពលពីបណ្តាប្រទេសមហាអំណាចនិងពីបណ្តាប្រទេសក្នុងតំបន់ទាំងនោះផងដែរ ។ តែក្រោមការដឹកនាំដ៏ត្រឹមត្រូវរបស់រាជរដ្ឋាភិបាលដែលមានសម្តេចតេជោ ហ៊ុន សែន ជាប្រមុខនៅតែបន្តការរក្សានូវសន្តិសុខនិងស្ថេរភាពនយោបាយសង្គមរួមជាមួយនឹងការអភិវឌ្ឍន៏ឥតឈប់ឈរទោះបីមានជនអគតិមួយចំនួនមានបំណងបំផ្លាញសមិទ្ធិផលទាំងនេះតាមរយៈការនាំ ចូលនៅវិធីធ្វើបដិវត្តន៏ពណ៌ក៏ដោយ ។ឯកឧត្តម នាយឧត្តមសេនីយ៏ មាស សាវ៉ន បានបញ្ជាក់បន្តទៀតថា៖តួនាទីស្នូលរបស់ខ.ភ.មគឺមានភារកិច្ចការពារជាតិ សាសនា ព្រះមហាក្សត្រ និងការពារបូរណភាពទឹកដី សហការជាមួយស្ថាប័ននានាដើម្បីចូលរួមអភិវឌ្ឍន៏ប្រទេសបង្កើនកិច្ចសហប្រតិបត្តិការអន្តរជាតិ។ ខ.ភ.ម ត្រូវ ចាំបាច់មានការហ្វឹកហ្វឺនបណ្ដុះបណ្តាលធនធានមនុស្សជាប្រចាំដើម្បីពង្រឹងសមត្ថភាពការពារព្រំដែន ទប់ស្កាត់ និងបង្ក្រាបឧក្រឹដ្ឋឆ្លងដែន និងប្រឆាំងអំពើភេរវកម្មនានា ហើយក្នុងនោះកងរាជអាវុធហត្ថក៏មានតួនាទីនិងចូលរួមចំណែកយ៉ាងសំខាន់ក្នុងការរក្សាសណ្ដាប់ធ្នាប់ និងរបៀបរៀបរយសង្គមផងដែរ ៕