នៅចំពោះមុខអតីតយុទ្ធជនប្រមាណជាង ៥០០នាក់ នាយឧត្តមសេនីយ៍ គន់ គីម
បានគូសបញ្ជាក់ថា «អតីតយុទ្ធជនត្រូវចូលរួមជាមួយអាជ្ញាធរមូលដ្ឋាន កម្លាំងមានសមត្ថកិច្ច ដើម្បីថែរក្សាភូមិឃុំមានសុវត្ថិភាព
ហើយប្រឆាំងដាច់ខាតរាល់ទង្វើអគតិ ញុះញង់ ការបង្កហេតុ ដែលនាំឲ្យសង្គមជាតិបែកបាក់»។
ក្នុងកិច្ចសំណេះសំណាលនេះដែរ នាយឧត្តមសេនីយ៍ គន់ គីម
បានលើកឡើងពីតម្លៃសន្តិភាព និងផលលំបាកជាច្រើនទៀតមុននឹងស្វែងរកបានសន្តិភាពដូចពេលបច្ចុប្បន្ន។
នាយឧត្តមសេនីយ៍ គូសបញ្ជាក់ថាសន្តិភាព ដែលកំពុងគ្របដណ្តប់ពាសពេញផ្ទៃប្រទេសនាពេលបច្ចុប្បន្នគឺរកមកបានដោយការបូជាអស់កម្លាំងកាយចិត្តរបស់ឥស្សរជនជាន់ខ្ពស់កម្ពុជា ក្នុងនោះសម្តេចតេជោ ហ៊ុន សែន បានលះបង់សព្វបែបយ៉ាងដើម្បីបុព្វហេតុសន្តិភាពនេះសូម្បីតែជីវិតក៏បានយកទៅធ្វើជាដើមទុនផងដែរ។
នាយឧត្តមសេនីយ៍ គន់ គីម បានបញ្ជាក់ថាដើម្បីបញ្ចប់សង្រ្គាមនាំមកនូវសុខសន្តិភាពជូនប្រជាជន សម្តេចតេជោ ហ៊ុន សែន
បានសម្រេចចិត្តប្រថុយប្រថានចូលចរចា ដោយផ្ទាល់ជាមួយមេដឹកនាំ និងទាហានខ្មែរក្រហមនាំយកពួកគេចូលមករួមរស់ជាមួយរាជរដ្ឋាភិបាល។ បន្ទាប់ពីការចរចានោះហើយដែលកម្ពុជាស្គាល់នូវពន្លឺសន្តិភាព ពេញលេញចាប់ពីឆ្នាំ១៩៩៨មក។
អគ្គលេខាធិការសមាគមអតីតយុទ្ធជនកម្ពុជា បានរំលឹកទៅដល់អតីតយុទ្ធជន ប្រជាពលរដ្ឋកម្ពុជាគ្រប់រូបត្រូវចូលរួមថែរក្សាសន្តិភាព ដើម្បីការរស់នៅមានភាពសុខសាន្ត និងផ្តល់ឱកាសឲ្យសង្គមជាតិទទួលបានការអភិវឌ្ឍន៍ជាបន្តបន្ទាប់៕
