សមាគមអតីតយុទ្ធជនប្រជុំបូកសរុបលទ្ធផលការងារប្រចាំឆ្នាំ២០១៦ - ព័ត៌មានក្នងស្រុក

ព័ត៌មាន

សមាគមអតីតយុទ្ធជនប្រជុំបូកសរុបលទ្ធផលការងារប្រចាំឆ្នាំ២០១៦

សមាគមអតីតយុទ្ធជនកម្ពុជានៅព្រឹកថ្ងៃទី៣កុម្ភៈនេះបានធ្វើការប្របូកសរុបលទ្ធផលការងារឆ្នាំ២០១៦និងដាក់ចេញទិសដៅអនុវត្តបន្តឆ្នាំ២០១៧ក្រោមអធិបតីភាព នាយឧត្តមសេនីយ៏ គន់ គីម អនុប្រធាននិងជាអគ្គលេខាធិការសមាគមអតីតយុទ្ធជនកម្ពុជាព្រមទាំងវត្តមានចូលរួមរបស់ឯកឧត្តមជាអគ្គលេខាធិការរងថ្នាក់ដឹកនាំពាក់ព័ន្ធមួយចំនួនទៀត។
តាមរបាយការណ៏បូកសរុបរបស់សមាគមបានឲ្យដឹងថារយៈពេល១ឆ្នាំ២០១៦កន្លងមកនេះថ្នាក់ដឹកនាំគ្រប់ថ្នាក់បានខិតខំបំពេញភារកិច្ចប្រកបដោយស្មារតីយកចិត្តទុកដាក់និងទទួលខុសត្រូវខ្ពស់ក្នុងការចុះបើកប្រាក់បេឡាមរណៈសង្គ្រោះការបំរើសេវាសាធារណៈជូនគ្រួសារអតីតយុទ្ធជនបានទាន់ពេលវេលាជាពិសេសការចុះជួបសំណេះសំណាលសួរសុខទុក្ខបងប្អូនអតីតយុទ្ធជននៅតាមមូលដ្ឋានបានជាទៀងទាត់។
តាមស្ថិតិរបស់សមាគមអតីតយុទ្ធជនកម្ពុជានៅទូទាំងប្រទេសមានសមាជិកសរុប៨៦.៦៦៥នាក់ដែលកំពុងទទួលរបបពីរដ្ឋក្នុងនោះអ្នកនៅក្នុងបន្ទុកមានចំនួន១៣៣.២៦៧នាក់។កន្លងមកនេះក្រោមការជួយឧបត្ថម្ភរបស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិតក៏ដូចជាការជួយឧបត្ថម្ភរបស់សប្បុរសជននានាសមាគមសម្រេច ការសាងសង់ផ្ទះបានចំនួន៣១៣ខ្នងហើយនៅពេលខាងមុខនឹងបន្តអំពាវនាវដល់សប្បុរសជននានាដើម្បីសាងសង់ផ្ទះជូនអតីតយុទ្ធជនដែលមានជីវភាពក្រីក្រនិងខ្វះទីជំរកជាបន្តទៀត។
មានប្រសាសន៏នាឱកាសនោះនាយឧត្តមសេនីយ៍ គន់ គីម បានកោតសសើរចំពោះថ្នាក់ដឹកនាំសមាគមអតីតយុទ្ធជនកម្ពុជាគ្រប់លំដាប់ថ្នាក់ដែលបានពុះពាររាល់ការលំបាករួមសាមគ្គីគ្នាអនុវត្តការងារទទួលបានលទ្ធផលគួរជាទីមោទនៈដោយនាយឧត្តមសេនីយ៏បានបញ្ជាក់ថា៖ថ្វីបើការខិតខំរបស់យើងទទួលបានក្នុងពេលនេះមានលទ្ធផលល្អតែសុំអោយថ្នាក់ដឹកនាំសមាគមគ្រប់ថ្នាក់នៅបានបន្តចុះជួបសំណេះសំណាលជាមួយបងប្អូនសមាជិកនិងក្រុមគ្រួសារជាបន្តបន្ទាប់ដើម្បីងាយស្រួលក្នុងការក្តាប់បានពីស្ថានភាពរស់នៅពិតប្រាកដនិងលើកវិធានការជាក់ស្តែងដើម្បីជួយគាត់ឲ្យរស់នៅក្នុងជីវភាពល្អប្រសើរ។
ក្នុងទិសដៅបន្តសម្រាប់ឆ្នាំខាងមុខនាយឧត្តមសេនីយ៏ គន់ គីម បានផ្តាំផ្ញើឲ្យថ្នាក់ដឹកនាំគ្រប់ថ្នាក់ត្រូវបន្តពង្រឹងរបៀបរបបធ្វើការឲ្យបានល្អប្រសើរជាងនេះ ដើម្បីធានាដល់ការដឹកនាំសមាគមនៅថ្នាក់មូលដ្ឋានទទួលបានគុណភាពប្រសិទ្ធភាពពិសេសការផ្តល់លេខទូរស័ព្ទទំនាក់ទំនងឲ្យគ្នាទៅវិញទៅមក រវាងប្រធានសាខាឃុំសង្កាត់និងសមាជិកម្នាក់ៗ៕