មន្ទីពេទ្យព្រះកេតុមាលា តភ្ជាប់បណ្តាញTelemedecine ជា មួយនិងមន្ទីពេទ្យ១៧៥ វៀតណាម - ព័ត៌មានក្នងស្រុក

ព័ត៌មាន

មន្ទីពេទ្យព្រះកេតុមាលា តភ្ជាប់បណ្តាញTelemedecine ជា មួយនិងមន្ទីពេទ្យ១៧៥ វៀតណាម

បណ្តាញTelemedecine ឬក៏ហៅថាប្រព័ន្ធអេឡិចត្រូនិចទំនាក់ទំនងគ្នាលើផ្នែកវេជ្ជសាស្ត្រសុខាភិបាល តភ្ជាប់រវាងមន្ទីរពេទ្យព្រះកេតុមាលា និងមន្ទីរពេទ្យ១៧៥ កងទ័ពប្រជាជនវៀតណាម បានធ្វើពិធីសម្ភោធ និងផ្ទេរប្រគល់ជាផ្លូវការនាព្រឹកថ្ងៃទី០៩ ខែ កុម្ភៈនេះ។
ពិធីនេះក៏មានការចុះហត្ថលេខាផងដែររវាង ឯ.ឧ ឧត្តមសេនីយ៍ឯក លី សុវណ្ណ អគ្គនាយករង អគ្គនាយកដ្ឋានភស្តុភារ ហិរញ្ញវត្ថុក្រសួងការពារជាតិ និងជានាយកមន្ទីរព្រះ កេតុមាលា ជាមួយនឹងឯ.ឧ ឧត្តមសេនីយ៍ត្រី ដូ ណាំងទីញ អនុប្រធាន អគ្គស្នងការភស្តុភារ កងទ័ពប្រជាជនវៀតណាម ស្ថិតក្រោអធិបតីភាពឯ.ឧ ថាច់ យឺ (Thach Du’) ឯកអគ្គរដ្ឋទូតវៀតណាមប្រចាំនៅកម្ពុជា និងឯ.ឧ ឧត្តមសេនីយ៍ឯក គង់ សាលី អគ្គនាយករង អគ្គនាយកដ្ឋានភស្តុភារ ហិរញ្ញវត្ថុក្រសួងការពារជាតិ និងជានាយក នាយកដ្ឋានសុខាភិបាល។
ប្រព័ន្ធTelemedecine មានតម្លៃជាទឹកប្រាក់ប្រមាណ២០ម៉ឺនដុល្លាសហរដ្ឋអាមេរិក ជាជំនួយមនុស្សធម៌របស់មន្ទីរពេទ្យ១៧៥ វៀតណាម។ ការតភ្ជាប់បណ្តាញនេះ គឺបានបង្ហាញពីចំណងទំនាក់ទំនង មិត្តភាព សាមគ្គីភាព និងកិច្ចសហប្រតិបត្តិការនៃប្រទេសទាំងពីរ ក្រសួងការពារជាតិទាំងពីរ ជាពិសេសរវាងមន្ទីពេទ្យ១៧៥ កងទ័ពប្រជាជនវៀតណាម និងមន្ទីពេទ្យព្រះកេតុមាលា នៃព្រះរាជាណាចក្រកម្ពុជា ក្នុងកិច្ចពង្រឹងសហប្រតិបត្តិការពិនិត្យរោគវិនិច្ឆ័យលើផ្នែកវេជ្ជសាស្ត្រសុខាភិបាល។ ឧបករណ៍សម្ភារៈទាំងនេះពិតមានសារៈប្រយោជន៍យ៉ាងខ្លាំងសម្រាប់មន្ទីរពេទ្យព្រះកេតុមាលា ដែលជាប្រព័ន្ធមួយសម្រាប់ធ្វើរោគវិនិច្ឆ័យពីចម្ងាយ និងការព្យាបាលជម្ងឺពីចម្ងាយ ដោយមិនយើងទៅ ហើយធ្វើឲ្យចំណេញពេលវេលា និងត្រឹមត្រូវទៀតផង។
ឯ.ឧ លី សុវណ្ណ បានបន្តថា ប្រព័ន្ធនេះបានជួយយ៉ាងច្រើនដល់វេជ្ជបណ្ឌិត និងក្រុមគ្រូពេទ្យរបស់យើង ដោយមិនបាច់ទៅរៀនសូត្រនៅប្រទេសគេ គ្រាន់តែអង្គុយនៅទីនេះគឺទទួលបានលទ្ធផលតែម្តង ដែលវាចំណេញទាំងពេលវេលា ថវិកា និងការចំណាយផ្សេងៗទៀត។ ដូចជាជម្ងឺដែលធ្ងន់ធ្ងរដែលយើងមិនដឹងមិនយល់ ឬមិនមានលទ្ធភាព គឺអាចសួរនាំ បានទៅដល់អ្នកជំនាញឯកទេស និងអ្នកវះកាត់ជម្ងឺ នៃមន្ទីរពេទ្យ១៧៥វៀតណាម, ហើយមិត្តវៀតណាមក៏អាចសួរនាំមកកាន់កម្ពុជាយើងវិញបានផងដែរ ទាក់ទងទៅលើការពិនិត្យព្យាលបាលរោគវិនិច្ឆ័យ នៃវិស័យវេជ្ជសាស្ត្រសុខាភិបាល។
ការបំពាក់ទាំងនេះមានតម្លៃធំធេងដែលនឹងជួយដល់មន្ទីរពេទ្យព្រះកេតុមាលាមានការអភិវឌ្ឍន៍នៅលើផ្នែកឯកទេសជំនាញកាន់តែរីកចម្រើន និងលូតលាស់ជឿនលឿនដូចបណ្តាប្រទេសនានាក្នុងតំបន់ និងលើពិភពលោក។
គួរបញ្ជាក់ថា កន្លងមកនេះ មន្ទីរពេទ្យ១៧៥ កងទ័ពប្រជាជនវៀតណាម បានជួយព្យាបាលជម្ងឺនាយទាហាន ខ.ភ.ម និងជួយបណ្តុះបណ្តាលវេជ្ជបណ្ឌិត និងគ្រូពេទ្យអ្នកឯកទេសជាច្រើនដល់មន្ទីរពេទ្យព្រះកេតុមាលា ហើយបច្ចុប្បន្នកំពុងជួយបណ្តុះបណ្តាលឯកទេសចំនួន០៩នាក់។ ដោយឡែកក្រសួងការពារជាតិវៀតណាម ក៏បានជួយកសាងអាគារសម្រាកនិងព្យាបាលជម្ងឺ ០១ខ្នង ៦ជាន់ ដែលបច្ចុប្បន្នកំពុងកសាងបាន៧០ទៅ៨០%ហើយនឹងបញ្ចប់ការសាងសង់នៅចុងឆ្នាំ២០១៧នេះ។