ឯកឧត្តម នាយឧត្តមសេនីយ៏ ទៀ បាញ់ ជួបក្រុមប្រឹក្សាសន្តិសុខសហព័ន្ធរុស្សី - ព័ត៌មានក្នងស្រុក

ព័ត៌មាន

ឯកឧត្តម នាយឧត្តមសេនីយ៏ ទៀ បាញ់ ជួបក្រុមប្រឹក្សាសន្តិសុខសហព័ន្ធរុស្សី

     នារសៀលថ្ងៃទី១៣ខែកុម្ភៈម្សិលមិញនេះឯ.ឧ.នាយឧត្តមសេនីយ៍ទៀ.បាញ់ឧបនាយករដ្ឋមន្ត្រីរដ្ឋមន្ត្រីក្រសួងការពារជាតិបានអនុញាតិឲ្យឯ.ឧនីកូល័យ.ប៉ាត្រូសូវ(NIKOLAI PATRUSHEV)លេខាធិការក្រុមប្រឹក្សាសន្តិសុខនៃសហព័ន្ធរុស្សីនិងសហការីចូលជួបសំដែងការគួរសមនៅក្នុងឱកាសបំពេញទស្សនកិច្ចនៅព្រះរាជាណាចក្រកម្ពុជា។
     នៅក្នុងខណៈនោះឯ.ឧ.នីកូល័យ.ប៉ាត្រូសូវ(NIKOLAI.PATRUSHEV)បានថ្លែងនូវអំណរគុណយ៉ាងជ្រាលជ្រៅចំពោះឯ.ឧ.ឧបនាយករដ្ឋមន្ត្រីរដ្ឋមន្ត្រីក្រសួងការពារជាតិកម្ពុជាដែលបានអនុញាតិឲ្យឯ.ឧ.និងគណៈប្រតិភូបានចូលជួបសំដែងការគួរសមនាពលនេះ។ឯ.ឧ.បានមានប្រសាសន៍ថាកម្ពុជាជាប្រទេសមិត្តដ៏ជិតស្និតមួយដែលមានប្រពៃណីរបស់កងទ័ពនិងប្រជាជនប្រទេសទាំងពីរបានផ្សារភ្ជាប់និងរឹតចំណងមិត្តភាពសាមគ្គីភាពនិងមានកិច្ចសហប្រតិបត្តិការជាយូរលុងណាស់មកហើយ។ហើយដែលលោកប្រធានាធិបតីផ្លាឌឺមៀ.ពូទីនបានចាត់ទុកថាជាមិត្តដ៏ជិតស្និតនិងមិនកែប្រែរបស់ប្រទេសប្រជាជនសហព័ន្ធរុស្សី។ឯ.ឧ.នីកូល័យ ប៉ាត្រូសូវ(NIKOLAI PATRUSHEV) ក៏បានថ្លែងការកោតសរសើរផងដែរចំពោះការវិវត្តន៍រីកចំរើននានារបស់ព្រះរាជាណាចក្រកម្ពុជាជាពិសេសការវិវត្តន៍រីកចំរើនរបស់ខ.ភ.មនៅលើឆាកអន្តរជាតិនាពេលបច្ចុប្បន្ននេះ។
     ឯ.ឧ.នាយឧត្តមសេនីយ៍ ទៀ បាញ់ ឧបនាយករដ្ឋមន្ត្រីរដ្ឋមន្ត្រីក្រសួងការពារជាតិបានសំដែងនូវការស្វាមន៍និងបានវាយតម្លៃខ្ពស់ចំពោះឯ.ឧ.នីកូល័យ ប៉ាត្រូសូវ(NIKOLAI PATRUSHEV)និងគណៈប្រតិភូក្រុមប្រឹក្សាសន្តិសុខនៃសហព័ន្ធរុស្សីដែលមកបំពេញទស្សនកិច្ចនៅលើទឹកដីអង្គរដ៏បវរនៃព្រះរាជាណាចក្រកម្ពុជា។ឯ.ឧ.នាយឧត្តមសេនីយ៍ បានចាត់ទុកថាវត្តមានរបស់គណៈប្រតិភូក្រុមប្រឹក្សាសន្តិសុខនៃសហព័ន្ធរុស្សីនាពេលនេះគឺពិតជាពូនជ្រុំឲ្យបានកាន់តែប្រសើរឡើងថែមទៀតនូវចំណងមិត្តភាពសាមគ្គីភាពនិងកិច្ចសហប្រតិបត្តិការរវាងកងទ័ពនៃប្រទេសទាំងពីរកម្ពុជានិងសហព័ន្ធរុស្សីតទៅអនាគត។
     តាមរយៈនៃគណៈប្រតិក្រុមប្រឹក្សាសន្តិសុខនៃសហព័ន្ធរុស្សីនេះក្នុងនាមថ្នាក់ដឹកនាំក្រសួងការពារជាតិនិងខ.ភ.ម, ឯ.ឧ.ឧបនាយករដ្ឋមន្ត្រី ទៀ បាញ់ បានថ្លែងនូវអំណរគុណយ៉ាងជ្រាវជ្រៅចំពោះរដ្ឋាភិបាល និងក្រសួងការពារជាតិសហព័ន្ធរុស្សី ដែលជានិច្ចកាល បានជួយឧបផ្ថម្ភគាំទ្រយ៉ាងពេញទំហឹងដល់កិច្ចការស្តារអភិវឌ្ឍន៍ឡើងវិញនៃប្រទេសកម្ពុជាជាពិសេសកិច្ចខិតខំចូលរួមចំណែកស្វែងរកសន្តិភាពជូនប្រជាជាតិកម្ពុជា។ទន្ទឹមនឹងនោះការជួយឧបត្ថម្ភគាំទ្រដល់វិស័យការពារជាតិ និងការបណ្តុះបណ្តាលធនធានមនុស្សដល់ជួរកងទ័ពដែលរហូតមកដល់ពេលនេះបានក្លាយជានាយទាហាននិងជាកម្លាំងស្នូលមួយផងដែរនៅក្នុងជួរខ.ភ.មលើកិច្ចការពារជាតិ និងបំរើប្រជាជនកម្ពុជា ។ឯ.ឧ ឧបនាយករដ្ឋមន្ត្រីរដ្ឋមន្ត្រីក្រសួងការពារជាតិសង្ឃឹមថាចំណងមិត្តភាពសាមគ្គី ភាពនិងកិច្ចសហប្រតិបត្តិការរវាងកងទ័ព និងប្រជាជនប្រទេសយើងទាំងពីរកម្ពុជា និងសហព័ន្ធរុស្សីនឹងស្ថិតស្ថេរជាអមតៈ៕