តាមរបាយការណ៍របស់ឯកឧត្តម ណឹម សុវត្ថិ អគ្គនាយកនយោបាយ និងកិច្ចការបរទេស និងជាប្រធានក្រុមការងារសាងសង់វិមានឈ្នះឈ្នះ បានឲ្យដឹងថា កិច្ចដំណើរការសាងសង់វិមានអនុស្សាវរីយ៍នយោបាយឈ្នះឈ្នះ និងការបញ្ចប់សង្រ្គាមស៊ីវិលនៅកម្ពុជាហៅកាត់ថា “វិមានឈ្នះឈ្នះ” បានប្រព្រឹត្តទៅយ៉ាងស្វាហាប់ប្រើអស់កម្លាំងកាយចិត្តគំនិតប្រាជ្ញាបញ្ចេញអស់បំណិនទឹកដៃរយៈពេលពេញមួយឆ្នាំ។ ក្រោយពីបានប្រជុំច្រើនលើកច្រើនសា និងមានការយល់ព្រមអនុញ្ញាតពីសម្តេចអគ្គមហាសេនាបតីតេជោ ហ៊ុន សែន យើងក៏បានបង្កើតគណៈកម្មការសាងសង់វិមានអនុស្សាវរីយ៍នយោបាយឈ្នះឈ្នះ និងបានចាប់ផ្តើមការសាងសង់ វិមានជាប្រវត្តិសាស្រ្តមួយ នៅថ្ងៃទី២៥ ខែកុម្ភៈ ឆ្នាំ២០១៧។ ដោយបានយកអស់ពីកម្លាំងកាយនិងដួងចិត្តរបស់ស្ថាបត្យករ វិស្វករ វិចិត្រករជាងចម្លាក់ កម្មករជំនាញៗទាំងអស់ ធ្វើការយ៉ាងសកម្មប្រកបដោយស្មារតីទទួលខុសត្រូវខ្ពស់។ ជាលទ្ធផលរហូតមកដល់បច្ចុប្បន្ន ការងារសាងសង់តួវិមានឈ្នះឈ្នះ បានដំណើរការដោយរលូនសម្រេចលទ្ធផល៥៥% ទៅតាមផែនការដែលបានគ្រោងទុក។
ឯកឧត្តម នាយឧត្តមសេនីយ៍ ទៀ បាញ់ បានថ្លែងថា ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន បានដាក់ចុះកម្មវិធី“នយោបាយឈ្នះឈ្នះ” សង្រ្គាមដ៏រុំារ៉ៃនៅក្នុងប្រទេសកម្ពុជាត្រូវបានបញ្ចប់។ សន្តិភាពពេញលេញបានលេចឡើងនៅលើទឹកដីកម្ពុជា។ ប្រជាជនបានរស់នៅក្នុងមហាគ្រួសារតែមួយ។ ប្រក្រតីភាពបានលេចឡើងនៅគ្រប់ភូមិស្រុក និគមជនបទ។ សន្តិភាពបាននាំមកនូវជ័យជំនះដល់ប្រជាជនកម្ពុជាគ្រប់រូបគ្មានអ្នកណាម្នាក់ដែលអាចបដិសេធថាគេមិនបានទទួលផលពីសន្ដិភាពនោះទេ។ ខណៈនេះ ក៏បានលេចឡើងនូវបញ្ហាមួយដែលយើងត្រូវគិតតើត្រូវធ្វើយ៉ាងណា ដើម្បីឱ្យសង្គមរបស់យើងទទួលបាននូវនិរន្តរភាពនៃការអភិវឌ្ឍទៅថ្ងៃមុខទៀត។
ឯកឧត្តម ឧបនាយករដ្ឋមន្ត្រី ទៀ បាញ់ បានគូសបញ្ជាក់ថា វិមានអនុស្សាវរីយ៍ “នយោបាយឈ្នះឈ្នះ” ឬហៅកាត់ថា “វិមានឈ្នះឈ្នះ” ជាវិមានដែលរំលឹកទៅដល់នយោបាយឈ្នះឈ្នះ ដែលបានដាក់ចុះក្រោមចក្ខុវិស័យដ៏វែងឆ្ងាយ និងឆ្លាតវៃរបស់សម្តេចអគ្គមហាសេនាបតីតេជោ ហ៊ុន សែន ដើម្បីបញ្ចប់សង្រ្គាមដ៏រុំារៃនៅក្នុងប្រទេសកម្ពុជា។ ការកសាងវិមានអនុស្សាវរីយ៍បានបង្កប់នូវអត្ថន័យ និងខ្លឹមសារផ្សេងៗគ្នា អនុលោមទៅតាមប្រវត្តិការណ៍ជាប្រវត្តិសាស្ត្រដែលវិមានឧទ្ទិសដល់។ វិមាននេះ មានតម្លៃយ៉ាងធំធេងសម្រាប់ប្រជាជាតិកម្ពុជាទាំងមូលមិនសំដៅលើពណ៌សម្បុរ និន្នាការនយោបាយសាសនា។ សន្តិភាពបាននាំមកនូវសមិទ្ធផលដល់ប្រជាជនកម្ពុជា គ្រប់រូបនិងផ្ដល់លទ្ធភាពអោយរស់នៅដោយសុខសន្តិភាព។ “វិមានឈ្នះឈ្នះ” ជានិមិត្តរូបនៃការបង្រួបបង្រួមជាតិ សន្តិភាព និងការអភិវឌ្ឍន៍។ក្នុងស្មារតីនេះ យើងត្រូវខិតខំធានាឱ្យបាននូវសុខសន្តិភាពនៅក្នុងប្រទេសយើង និងត្រូវខិតខំប្រឹងប្រែង សម្រេចឱ្យបាននូវការអភិវឌ្ឍប្រកបដោយនិរន្តរភាព ដូចនេះ ចាំបាច់ត្រូវមានការទំនាក់ទំនងគ្នា ឲ្យកាន់តែជិតស្និទ្ធថែមទៀត គ្រប់ក្រសួងស្ថាប័នវិស័យឯកជនដៃគូអភិវឌ្ឍ និងអង្គការសង្គមស៊ីវិលទាំងអស់ដែលពាក់ព័ន្ធដោយផ្អែកលើគោលការណ៍ផ្តល់តម្លៃទស្សនវិស័យ និងទិសដៅរួមគ្នា យល់ពីគ្នាទៅវិញទៅមកឱ្យបានច្បាស់លាស់ រួមសាមគ្គីនិងសហប្រតិបត្តិការគ្នាដោះស្រាយបញ្ហាប្រឈមទាំងឡាយដែលកើតមានឡើងប្រកបដោយស្មារតីទទួលខុសត្រូវ និងមានប្រសិទ្ធិភាពខ្ពស់ដែលនឹងធានារក្សាឱ្យបាននូវសុខដុមនីយកម្មសម្រាប់ប្រទេសជាតិយើង ។យើងទាំងអស់គ្នាត្រូវចងចាំថា ចំណងទាក់ទងរវាងសន្ដិភាព និងការអភិវឌ្ឍ គឺជាចំណងទាក់ទងវិចារវិទ្យា។ គ្មានសន្ដិភាព ពិតជាមិនអាចអភិវឌ្ឍបានទេ ហើយបើគ្មានការអភិវឌ្ឍក៏មិនអាចរក្សាទុកនូវសន្ដិភាពបានដែរ ហើយប្រសិនបើយើងចង់កាត់បន្ថយភាពក្រីក្រ ក៏យើងត្រវទប់ស្កាត់នូវសង្រ្គាម ទើបនាំមកការរក្សាសន្ដិភាពជូនប្រទេសជាតិបាន ។សម្រាប់ឆ្នាំ២០១៧ តាមការព្យាករណ៍ ទោះបីមានបញ្ហាប្រឈមមួយចំនួនទាំងកត្ដាខាងក្រៅ និងខាងក្នុងក្ដី ក៏កម្ពុជានៅតែធានាបាននូវស្ថិរភាពម៉ាក្រូសេដ្ឋកិច្ច និងសម្រេចបានកំណើនក្នុងរង្វង់៧% បន្ដទៀត។
កម្ពុជាបានក្លាយទៅជាប្រទេសទឹកដីសន្តិភាព និងជាតំបន់ទេសចរណ៍មួយប្រកបដោយប្រជាប្រិយភាពក្នុងតំបន់អាស៊ីអាគ្នេយ៍ ដែលទទួលបានភ្ញៀវទេសចររាប់លាននាក់ក្នុងមួយឆ្នាំៗ និងជាប្រទេសមួយដែលគោរពយ៉ាងខ្ជាប់ខ្ជួន នូវគោលការណ៍នៃលទ្ធិប្រជាធិបតេយ្យសេរីពហុបក្ស តាមរយៈការរៀបចំយ៉ាងទៀងទាត់នូវការបោះឆ្នោតដោយសេរី ត្រឹមត្រូវ និងយុត្តិធម៌ ដើម្បីឲ្យប្រជាពលរដ្ឋជ្រើសរើសតំណាងដឹកនាំប្រទេស។
ដោយសារប្រទេសជាតិមានសន្តិភាពពេញលេញ ទើបកម្ពុជាមានមោទនភាព និងមានលទ្ធភាពបញ្ជូនកម្លាំងទៅចូលរួមបេសកកម្មរក្សាសន្តិភាពរបស់អង្គការសហប្រជាជាតិ នៅតំបន់អាហ្រ្វិក មជ្ឈឹមបូព៌ា និងអ៊ឺរ៉ុប ក្នុងការរួមវិភាគទានដល់កិច្ចប្រឹងប្រែងរបស់សហគមន៍អន្តរជាតិ ដើម្បីបុព្វហេតុ សន្តិភាព សន្តិសុខ និងមនុស្សធម៌នៅលើលោក ទទួលបានជោគជ័យជាបន្តបន្ទាប់ និងបានការកោតសរសើរលើឆាកអន្តរជាតិ។ ក្នុងឱកាសនោះ ឯកឧត្តម ឧបនាយករដ្ឋមន្ត្រី ទៀ បាញ់ បានណែនាំដល់ក្រុមការងារសាងសង់ត្រូវបន្តដំណើរការចាប់ផ្តើមគិតគូរពីតំបន់សមិទ្ធផល និងតំបន់សុខដុមនីយកម្ម តាមគម្រោងដែលបានទទួលការអនុញ្ញាតពីសម្តេចតេជោ នាយករដ្ឋមន្ត្រីរួចហើយ រួមមានការកសាងទស្សនទានគម្រោងប្លង់ និងការរៀបចំហេដ្ឋារចនាសម្ព័ន្ធ កៀរគរសម្រាប់ការចូលរួមតាមជំនាញនីមួយៗឱ្យបានហ្មត់ចត់។ ហើយត្រូវរៀបចំផែនការដាំកូនឈើ នៅក្នុងឆ្នាំខាងមុខនេះដូចដែលគម្រោងមាននិងការផ្តល់ឱ្យដោយ ក្រសួងបរិស្ថាននូវកូនឈើចំនួន១ម៉ឺនដើម។គ្រប់អង្គភាពត្រូវបន្តការរៀបចំសរសេរប្រវត្តិសាស្ត្រនិងប្រវត្តិអង្គភាពខ្លួន ដូចដែលបានណែនាំតាំងពីឆ្នាំកន្លងមកដើម្បីត្រៀមដាក់ចូលក្នុងសារមន្ទីរវិមានឈ្នះឈ្នះ ៕
