ឯកឧត្តម ទៀ បាញ់ អនុញ្ញាតឲ្យប្រតិភូទ័ពអាកាសថៃចូលជួបសម្តែងការគួរសម - ព័ត៌មានក្នងស្រុក

ព័ត៌មាន

ឯកឧត្តម ទៀ បាញ់ អនុញ្ញាតឲ្យប្រតិភូទ័ពអាកាសថៃចូលជួបសម្តែងការគួរសម

       ក្នុងឪកាសមកបំពេញទស្សនកិច្ចជាផ្លូវការនៅកម្ពុជា គណៈប្រតិភូកងទ័ពជើងអាកាសភូមិន្ទថៃ ដឹកនាំដោយ ឯកឧត្តម នាយឧត្តមសេនីយ៍ ជុំ រុងស្វាង អគ្គបញ្ជាការកងទ័ពជើងអាកាសភូមិន្ទថៃ បានចូលជួបសម្តែងការគួរសម ឯកឧត្តម ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ កាលពីថ្ងៃទី០៦ ខែមីនា កន្លងទៅនេះ ។
       នៅក្នុងជំនួបនោះ ឯកឧត្តម ទៀ បាញ់ បានសម្តែងការស្វាគមន៍ចំពោះគណៈប្រតិភូកងទ័ពជើងអាកាសភូមិន្ទថៃ ដែលបានអញ្ជើញមកបំពេញទស្សនកិច្ចនៅកម្ពុជាដើម្បីពង្រឹងទំនាក់ទំនងកិច្ចសហប្រតិបត្តិការកងទ័ពជើងអាកាសឲ្យកាន់តែប្រសើរឡើងថែមទៀត។ ឯកឧត្តម ឧបនាយករដ្ឋមន្រ្តី ក៏បានសម្តែងនូវក្តីសោមនស្សនរីករាយចំពោះការជួបជុំកងទ័ពជើងអាកាសនៃប្រទេសទាំងពីរកម្ពុជា-ថៃ ហើយតាមរយៈជំនួបនោះ ឯកឧត្តម ទៀ បាញ់ បានជម្រុញដល់កងទ័ពជើងអាកាសទាំងពីរបន្តធ្វើការសហការគ្នាឲ្យបានកាន់តែជិតស្និតថែមទៀត ។ ឯកឧត្តម ទៀ បាញ់ បានសង្កត់ធ្ងន់ថាកិច្ចសហប្រ តិបត្តិការល្អរវាងកងទ័ពប្រទេសទាំងពីរមិនត្រឹមតែផ្តល់ផលប្រយោជន៍ដល់ប្រទេសទាំងពីរប៉ុណ្ណោះទេ ប៉ុន្តែវានាំមកកិច្ចសហប្រតិបត្តិការល្អក្នុងតំបន់ និងពិភពលោកផងដែរ។ មានមតិឆ្លើយតបវិញ ឯកឧត្តម ជុំ រុងស្វាង បានរាយការណ៍ជូន ឯកឧត្តម ឧបនាយករដ្ឋមន្រ្តី ទៀ បាញ់ អំពីលទ្ធផលនៃការជួបគ្នារវាងកងទ័ពជើងអាកាស ខ.ភ.ម និងកងទ័ពជើងអាកាសភូមិន្ទថៃ ដែលតាមរយៈជំនួបនោះបាននាំមកនូវការផ្លាស់ប្តូរបទពិសោធន៍ ពង្រឹងទំនាក់ទំនងមិត្តភាព សាមគ្គីភាព រវាងកងទ័ពជើងអាកាសទាំងពីរបានល្អប្រសើរ។
       ឯកឧត្តម អគ្គបញ្ជាការកងទ័ពជើងអាកាសភូមិន្ទថៃ ក៏បានបញ្ជាក់ពីគោលបំណងចង់ឲ្យសិក្ខាកាមកងទ័ពជើងអាកាសកម្ពុជា បានទៅហ្វឹកហ្វឺន រៀនសូត្រឲ្យបានច្រើននាក់នៅប្រទេសថៃ ៕