ឯកឧត្តម ទៀ បាញ់ ចុះត្រួតពិនិត្យការធ្វើលំហាត់មហារំអិល - ព័ត៌មានក្នងស្រុក

ព័ត៌មាន

ឯកឧត្តម ទៀ បាញ់ ចុះត្រួតពិនិត្យការធ្វើលំហាត់មហារំអិល

កាលពីថ្ងៃទី ១៥ ខែមិនា ឆ្នាំ២០១៧ គណៈកម្មាធិការជាតិសន្តិសុខលំហរសមុទ្រ បានរៀបចំធ្វើលំហាត់ ហ្វឹកហ្វឺនពីរដាច់ដោយឡែកពីគ្នា ស្តីពីការជួយសង្គ្រោះនិងការបង្ក្រាបអំពើប្លន់លើផ្ទៃសមុទ្រដែលលំហាត់ ទាំងពីរនេះបានធ្វើឡើងនៅលើភូមិសាស្រ្តផ្ទៃសមុទ្រក្នុងខេត្តព្រះសីហនុ ។
សូមបញ្ជាក់ថា៖ លំហាត់ទាំងពីរដែលគណៈកម្មាធិការជាតិសន្តិសុខលំហរសមុទ្របានធ្វើនេះឋិតក្រោម
ហស្សនាមថា៖ មហារំអិល ១៧ ដែលមានការចូលរួមពីកងកំលាំងប្រដាប់អាវុធ និង ស្ថបន័អនុវត្តច្បាប់មួយចំនួនរួមមានកងកំលាំងប្រដាប់អាវុធ ខ.ភ.ម កងនគរបាលជាតិ រដ្ឋបាលជលផល កងកំលាំងគយ និង កងឯកភាពពិសេសប្រឆាំងភេរវកម្ម។ លំហាត់មហារំអិល ១៧ នេះធ្វើឡើងស្របពេលដែលដំណើទស្សនកិច្ចស្វែងយល់ចំនួន ២ ថ្ងៃរបស់សមាជិកសមាជិការនៃគណៈកម្មាធិការជាតិសន្តិសុខលំហរសមុទ្រដែលដឹកនាំដោយឯកឧត្តម នាយឧត្តមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្រ្តីក្រសួងការពារជាតិ និងជាប្រធានគណៈកម្មាធិការជាតិសន្តិសុខលំហរសមុទ្រអមដំណើរដោយ ព្រមទាំងមានការចូលរួមពីអនុ័ព្ធយោធានៃ
បណ្តាលប្រទេសជាមិត្តមួយចំនួនប្រចាំនៅកម្ពុជាផងដែរ។
ឯកឧត្តម ឧត្តមសេនីយ៍ឯក សួន សំណាង អគ្គលេខាធិការរង នៃអគ្គលេខាធិការដ្ឋាន គណៈកម្មាធិការជាតិសន្តិសុខលំហរសមុទ្រ បានអោយដឹងថា៖ ការរៀបចំលំហាត់មហារំអិល ១៧ នេះ ត្រូវបានកំណត់ឡើងយោងតាមការសំរេច នៃកិច្ចប្រជុំពេញអង្គរបស់គណៈកម្មាធិការជាតិសន្តិសុខលំហរសមុទ្រកាលពី ខែវិច្ឆកា ឆ្នាំ ២០១៦ ហើយអគ្គលេខាធិការដ្ឋាន គណៈកម្មាធិការជាតិសន្តិសុខលំហរសមុទ្រ ក្រុមការងារបច្ចេកទេស និង ទីបញ្ជាការជួរមុខនៃគណៈកម្មាធិការជាតិសន្តិសុខលំហរសមុទ្រ បានរៀបចំ សំរបសំរួលនិង ដឹកនាំអនុវត្តន៍លំហាត់នេះនៅក្នុងអំឡុងពេលដ៏ខ្លីបំផុត ។ លំហាត់មហារំអិល ១៧ បានបង្ហាញអំពីទិដ្ឋភាពពីការជួយសង្គ្រោះជីវិតមនុស្សនៅក្នុងពេលដែលនាវាដឹកអ្នកដំណើរបានជួបនូវឧបទ្ទហេតុភ្លើងឆេះនៅចំងាយ ៣ ម៉ៃល ខាងជើងកោះតាង និង សកម្មភាពនៅក្នុងការបង្ក្រាបអំពើប្លន់ចាប់ជំរិនវាដឹកទំនិញមួយឋិតនៅចំងាយ ៧ ម៉ៃលពីកោះរុង។ឯកឧត្តម ឧត្តមសេនីយ៍ឯក សួន សំណាង បានបញ្ចាក់អោយដឹងថា៖លំហាត់មហារំអិល១៧ គឺជាព្រឹត្តិការប្រវត្តិសាស្ត្រ ព្រោះថាជាលំហាត់មួយដែលពាក់ពន្ធ័ទៅនឹងសន្តិសុខសមុទ្រលើកដំបូង ដែលគណកម្មាធិការជាតិបានធ្វើឡើងជាឯកតោភាគី ដោយពុំមានការចូលរួមពីដៃគូរបរទេសណាមួយ ។លំហាត់មហារំអិល ១៧ នេះមានគោលដៅដូចតទៅ ៖ ទី ១ ប្រើប្រាស់សមត្ថភាពនិងធនធានដែលយើងមាននៅក្នុងការឆ្លើយតបទៅនិង ឧបត្តិហេតុនិងគ្រោះមហន្តរាយយខ្នាតតូច ថ្នាក់មធ្យមនៅក្នុងសមុទ្រ ។ទី២ កសាងនិងលើកស្ទួយជាលំដាប់នូវកិច្ចសហការរវាងកងកំលាំងប្រដាប់អាវុធ និង ក្រសួង និងស្ថាបន័ដែលពាក់ពន្ធ័នឹងសន្តិសុខសមុទ្រព្រមទាំងធ្វើអោយកាន់តែមានប្រសិទ្ធភាពសំរាប់ការឆ្លើយតបទៅនិងឧបត្តិហេតុទាំងឡាយនៅក្នុរូបភាពកំលាំងចំរុះ ។ គោលបំណងទី ៣ គឺដើម្បីបង្ហាញដល់ស្ថាបន័ក្រសួងដែលមានការពាក់ពន្ធ័ព្រមទាំងភ្ញៀវអន្តរជាតិអំពីការយកចិត្តទុកដាក់ និងអំពីការមានវិធានការត្រៀមលក្ខណៈគ្រប់បែបយ៉ាងរបស់គណៈកម្មាធិការជាតិសន្តិសុខលំហរសមុទ្រនៅក្នុងការអនុវត្តិតួនាទីភារកិច្ចរបស់ខ្លួន ។ទី៤ លំហាត់នេះមានគោលបំណងដកពិសោធន៍អំពីការប្រើប្រាស់មធ្យោបាយ សំភារៈដែលបានមកពីប្រភពផ្សេងៗគ្នានៅក្នុងពេលប្រតិបត្តិការកំលាំងចំរុះ ។
ចំពោះដំណើរទស្សនកិច្ចស្វែងយល់របស់ក្រុមគណៈប្រតិភូជាន់ខ្ពស់ដែលដឹកនាំដោយ ឯកឧត្តម នាយឧត្តមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្រ្តីក្រសួងការពារជាតិ និងជាប្រធានគណៈកម្មាធិការជាតិសន្តិសុខលំហរសមុទ្របានធ្វើឡើងក្នុងគោលបំណងស្វែងរកការយល់ដឹងអោយបានច្រើនថែមទៀតអំពីសក្តារនុពល និងអត្តសញ្ញាណនៅក្នុងតំបន់មួយចំនួនក្នុងដែនសមុទ្រកម្ពុជាជាពិសេសទិដ្ឋភាពដ៏ស្រស់ត្រកាលនិង ប្រកបដោយសក្តានុពល នៅដំបន់កោះតាង និង ធ្វើទស្សនៈកិច្ចនៅលើកោះគូស្រូវី ឬកោះឆ្លាមដែលជាកោះតូចនៅដាច់ស្រយ៉ាលក្នុងសមុទ្រភាគនិរតីប្រទេសកម្ពុជាដែលមានលក្ខណៈតំណាងអោយ
អត្តសញ្ញាណ និងដួងព្រលឹងជាតិខ្មែរ។
ព្រឹត្តិការណ៍ជាប្រវត្តិសាស្រ្តទាំងពីរនេះត្រូវបានធ្វើឡើងប្រកបដោយជោគជ័យនិងទទួលបានការកោតសរសើរពីគ្រប់មជ្ឍដ្ឋានដែលបានចូលរួមទាំងអស់ ជាពិសេសពីសំណាក់ភ្ញៀវបរទេស ។លំហាត់មហារំអិល ១៧ បានបង្ហាញអំពីជំនាញ និងភាពប៉ិនប្រសព្វរបស់កំលាំងប្រដាប់អាវុធ និងស្ថប័នអនុវត្តច្បាប់ផ្សេងៗទៀត ក្នុងការសង្រ្គោះជីវិតមនុស្សពេលជួបគ្រោះមហន្តរាយ ។ លើសពីនេះទៅទៀតលំហាត់មហារំអិល ១៧បានបង្ហាញអំពីការប្រើប្រាស់សមត្ថភាពនៅលើផ្ទៃទឹក និង ពិលើអាកាសនៅក្នុងការបង្រ្កាបអំពើប្លន់ចាប់ជំរិតក្នុងដែនសមុទ្រជាពិសេសការប្រើប្រាស់មធ្យយោបាយនិងបច្ចេកទេសគ្រប់បែបយ៉ាងនៅក្នុងការធ្វើអោយជនល្មើសព្រមចុះញ៉ម។
ក្នុងនាមជាប្រធានគណៈប្រតិភូ ឯកឧត្តម ទៀ បាញ់ បានបញ្ជាក់យ៉ាងច្បាស់ថា៖ លំហាត់មហារំអិល ១៧គឺជាព្រឹត្តិការណ៍ប្រវត្តិសាស្រ្តដែលពុំធ្លាប់មានពីមុនមក យ៉ាងណាមិញគឺជាលំហាត់មួយដែលកម្ពុជាធ្វើឡើងដោយខ្លួនឯងពុំមានការចូលរួមពីដៃគូរបរទេស ព្រមទាំងមានការចំណាយធនធានតិចថែមទៀត ។ ឯកឧត្តម បានកោតសរសើរនិងវាយតំលៃខ្ពស់ចំពោះជោគជ័យនៃលំហាត់មហារំអិល ១៧ ដែលបានបង្ហាញអំពីប្រសិទ្ធភាពនៃកិច្ចសហប្រតិបត្តិការ និង កិច្ចប្រតិបត្តិការកំលាំងចំរុះនៅក្រោមឆត្រ័របស់គណៈកម្មការជាតិ។ ឯកឧត្តម ទៀ បាញ់ ក៏បានបញ្ជាក់បន្ថែមទៀតថា៖ លំហាត់មហារំអិល ១៧នេះនឹងត្រូវបានប្រើប្រាស់ជាមូលដ្ឋានសំរាប់ការកសាងសមត្ថភាពនៃកិច្ចប្រតិបត្តិការកមលាំងចំរុះតទៅថ្ងៃអនាគត នៅក្នុងការឆ្លើយតប ទៅលើការគំរាមកំហែងផ្សេងៗ ។ ឯកឧត្តម ក៏បានថ្លែងការកោតសរសើរដល់ថ្នាក់ដឹកនាំនិងសហការីនៃអគ្គលេខាធិការដ្ឋានគណៈកម្មាធិការជាតិសន្តិសុខលំហរសមុទ្រ ក្រុមការងារបច្ចេកទេស និងទីបញ្ជាការជួរមុខរបស់គណៈកម្មាធិការជាតិសន្តិសុខលំហរសមុទ្រ នៅក្នុងការរៀបចំដឹកនាំសំរបសំរួលលំហាត់មហារំអិល១៧ និងដំណើរទស្សនៈកិច្ចស្វែងយល់របស់គណៈប្រតិភូជាន់ខ្ពស់រហូតទទួលបានជោគជ័យទាំងស្រុង។
ក្នុងនាមគណៈកម្មាធិការជាតិសន្តិសុខលំហរសមុទ្រ ក្រសួងការពារជាតិ ក៏ដូចជាតាងនាមអោយរាជរដ្ឋា
ភិបាល ឯកឧត្តម ឧបនាយករដ្ឋមន្ត្រី ទៀ បាញ់ បានថ្លែងអំណរគុណយ៉ាងជ្រាលជ្រៅបំផុតចំពោះកិច្ចប្រឹងប្រែង និង កិច្ចសហការយ៉ាងពេញទំហឹងរាជរដ្ឋាភិបាលដ៏ទៃទៀតសំណាក់កងកំឡាំងប្រដាប់អាវុធ និង
ស្ថាបន័របស់រាជរដ្ឋាភិបាលដ៏ទៃទៀត នៅក្នុងដំណើរការអនុវត្តលំហាត់មហារំអិល ១៧ និងដំណើរទស្សនកិច្ចសិក្សារបស់គណប្រតិភូជាន់ខ្ពស់។ ឯកឧត្តម ក៏បានថ្លែងអំណរគុណយ៉ាងជ្រាលជ្រៅចំពោះការចំណាយពេលវេលាចូលរួមនៅក្នុងព្រឹត្តិការជាប្រវត្តិសាស្រ្តទាំងពីរនេះ ពីសំណាក់សមាជិកសមាជិការនៃគណកម្មាធិការជាតិសន្តិសុខលំហរសមុទ្រ និង អនុពទ្ធ័យោធានៃបណ្តាលប្រទេសប្រចាំនៅព្រះរាជាណាចក្រកម្ពុជា ។ ឯកឧត្តម ទៀ បាញ់ បានឆ្លៀតយកឪកាសនោះថ្លែងអំណរគុណចំពោះការជួយឧបត្ថមគាំទ្រពីសំណាក់មជ្ឍដ្ឋានទាំងឡាយសំរាប់ព្រឹត្តិការណ៍ទាំងពីរជាប្រវត្តិសាស្រ្តខាងលើ ជាពិសេសមានការគាំទ្រយ៉ាងពេញលេញពីសំណាក់ក្រុមហ៊ុន យូញៀន។
ឯកឧត្តម ឧបនាយករដ្ឋមន្ត្រី ទៀ បាញ់ បានគូសបញ្ជាក់បន្ថែមថា៖ ឯកឧត្តមនឹងពិចារណាអំពីលទ្ធភាពនៅក្នុងការរៀបចំអោយមានលំហាត់ហ្វឹកហ្វឺនក្នុងរូបភាពផ្សេងៗទៀតនៅថ្ងៃអនាគត ។