ឯកឧត្តម ឧបនាយករដ្ឋមន្ត្រី ទៀ បាញ់ ជួបជាមួយ ឯអគ្គរាជទូត រុស្សី និងឥណ្ឌា - ព័ត៌មានក្នងស្រុក

ព័ត៌មាន

ឯកឧត្តម ឧបនាយករដ្ឋមន្ត្រី ទៀ បាញ់ ជួបជាមួយ ឯអគ្គរាជទូត រុស្សី និងឥណ្ឌា

    នៅព្រឹកថ្ងៃទី២១ ខែមេសា ឯកឧត្តម នាយឧត្តមសេនីយ៍ ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ បានអនុញ្ញាតឲ្យ ឯកឧត្តម ឌីមេទ្រី ធីវេកូរ ( Demitry Tsvetkov) ឯកអគ្គរដ្ឋទូត សហព័ន្ធរុស្សីប្រចាំនៅកម្ពុជា ចូលជួបសម្តែងការគួរសម និងពិភាក្សាការងារស្តី ពីកិច្ចសហប្រតិបត្តិការរវាងប្រទេសទាំងពីរ។
   តាមរយៈជំនួបនោះ ឯកឧត្តម ឌីមេទ្រី ធីវេកូរ បានជម្រាបជូនដល់ ឯកឧត្តម ឧបនាយក រដ្ឋមន្រ្តី ទៀ បាញ់ អំពីការអញ្ជើញរបស់ សហព័ន្ធរុស្សី ដើម្បីទៅចូលរួមក្នុងសន្និសិទ សន្តិសុខ អន្តរជាតិលើកទី៦ នៅទីក្រុងម៉ូស្គូនាពេលខាងមុខ។ ឯកឧត្តម បានបញ្ជាក់ថា វត្តមានរបស់ ឯកឧត្តម ឧបនាយករដ្ឋមន្រ្តី ទៀ បាញ់ ចូលរួមកាលពីឆ្នាំទៅបាននាំមកនូវការពង្រឹងកិច្ចសហ ប្រតិបត្តិការលើវិស័យយោធារវាងប្រទេសទាំងពីរ ហើយ ឯកឧត្តម ឯកអគ្គរដ្ឋទូតបានប្រាប់ពី បំណងចង់ឲ្យមានវត្តមានរបស់ ឯកឧត្តម ឧបនាយករដ្ឋមន្រ្តី នៅក្នុងសន្និសិទ សន្តិសុខ អន្តរជាតិនេះ បន្តទៀតជាប្រពៃណី ឬចាត់តំណាងទៅចូលរួមក្នុងវេទិការនេះផងដែរ។ ឯកឧត្តម ឯកអគ្គរដ្ឋទូត សហព័ន្ធរុស្សី ក៏បានជម្រាបជូនអំពីការរៀបចំព្រឹត្តិការណ៍បង្ហាញ គ្រឿងបច្ចេកទេសយោធាឆ្នាំ២០១៧ នៅសហព័ន្ធរុស្សីនាចុងខែសីហាឆ្នាំ២០១៧ ខាងមុខនេះ ដែលក្នុងព្រឹត្តិការណ៍នេះ ឯកឧត្តម ក៏បានអញ្ជើញខាងកម្ពុជា ចូលរួមផងដែរដោយ ឯកឧត្តម បានចាត់ទុកវត្តមានរបស់ ខ.ភ.ម ដែលចូលរូមក្នុងព្រឹត្តិការណ៍នេះមានប្រយោជន៍ល្អសម្រាប់ ទំនាក់ទំនងកងទ័ពទាំងពីរ ប្រទេសទាំងពីរ។ ឯកឧត្តម ឯកអគ្គរដ្ឋទូត សហព័ន្ធរុស្សី បានចាត់ ទុកសន្និសិទ សន្តិសុខអន្តរជាតិនាទីក្រុងមូស្គូលើកទី៦ គឺមានសារៈសំខាន់ដែលបានផ្តល់ឪ កាសដល់អ្នកចូលរូមបានផ្លាស់ប្តូរមតិយោបល់គ្នាទៅវិញទៅមក ស្វែងរកច្រកណាមួយដើម្បី នាំមកនូវសន្តិភាព ។
   មានមតិឆ្លើយតបវិញ ឯកឧត្តម ឧបនាយក រដ្ឋមន្រ្តី ទៀ បាញ់ បានចាត់ទុកវេទិការទាំង អស់ទាំងនៅមូស្គូ ក៏ដូចជានៅសាងគ្រីឡា ប្រទេសសឹង្ហបុរី និងសៀនសាននៅប្រទេសចិន សុទ្ធតែមានតំលៃ ក្នុងការពង្រឹងកិច្ចសហប្រតិបត្តិការទាំងស្វែងរកសន្តិភាពជូនពិភពលោក ។
   នៅព្រឹកថ្ងៃទី២១ ខែមេសានេះដែរ ឯកឧត្តម ទៀ បាញ់ ក៏បានអនុញ្ញាតឲ្យ ឯកឧត្តម ណាវីន ស្រីវ៉ាស្តានណា ឯកឧត្តម អគ្គរដ្ឋទូតឥណ្ឌាប្រចាំនៅកម្ពុជាចូលរួមពិភាក្សាការងារបន្ត ទៀត ។ នៅក្នុងជំនួបនោះ ឯកឧត្តម ឯកអគ្គរដ្ឋទូតឥណ្ឌា ក៏បានជម្រាបជូនដល់ ឯកឧត្តម ឧបនាយករដ្ឋមន្រ្តី ទៀ បាញ់ អំពីលទ្ធផលកិច្ចសហប្រតិបត្តិការរវាងប្រទេសទាំងពីរ កម្ពុជា ឥណ្ឌក្នុងរយៈពេលកន្លងមកលើការបណ្តុះបណ្តាលធនធានមនុស្សដល់ខ.ភ.ម ដែលបាន ដំណើរការយ៉ាងល្អជាពិសេស ការបណ្តុះបណ្តាលជំនាញរក្សាសន្តិភាពដែលឥណ្ឌាបានផ្តល់ សុខនកហិតមីនដល់កម្ពុជានៅថ្ងៃនេះ។ ឯកឧត្តម ឯកអគ្គរដ្ឋទូត ឥណ្ឌាក៏បានជម្រាបជូនដល់ ឯកឧត្តម ឧបនាយករដ្ឋមន្រ្តី អំពីការដំណើរការជួយបណ្តុះបណ្តាលភាសាអង់គ្លេសដល់កម្ពុជា ក្នុងពេលបច្ចុប្បន្ន ក្នុងនោះក៏មានមន្ត្រីយោធាកម្ពុជាចូលរូមរៀនសូត្រផងដែរ ដើម្បីឲ្យពួកគេ មានឪកាសបានបន្តការសិក្សាបន្ថែមនៅប្រទេសឥណ្ឌា ។
   ឯកឧត្តម ទៀ បាញ់ បានបញ្ជាក់ថា កម្ពុជា និងឥណ្ឌា មានទំនាក់ទំនងជាមួយគ្នាតាំងពី យូរលង់ណាស់មកហើយ។ ឯកឧត្តម ក៏បានថ្លែងអំណរគុណដល់កងទ័ពឥណ្ឌាដែលបាន ជួយបណ្តុះបណ្តាលធនធានមនុស្សដល់ ខ.ភ.ម ដោយបានបញ្ជូនត្រូវជំនាញ មកបណ្តុះ បណ្តាលដល់កងទ័ពកម្ពុជាជាបន្តបន្ទាប់៕