កម្ពុជាបញ្ជូនកងកម្លាំងរក្សាសន្តិភាពទៅបំពេញបេសកកម្មអន្តរជាតិនៅប្រទេសម៉ាលីនិងស៊ូដង់ខាងត្បូង - ព័ត៌មានក្នងស្រុក

ព័ត៌មាន

កម្ពុជាបញ្ជូនកងកម្លាំងរក្សាសន្តិភាពទៅបំពេញបេសកកម្មអន្តរជាតិនៅប្រទេសម៉ាលីនិងស៊ូដង់ខាងត្បូង

    បន្ទាប់ពីកងកម្លាំងវិស្វកម្មព្រលានយន្តហោះលេខ៩៨១ និងកងកំទេចគ្រឿងផ្ទុះលេខ៣៣៣ បានបំពេញបេសកកម្មរបស់អ.ប.ស នៅប្រទេសម៉ាលីអស់រយះពេល០១ឆ្នាំ ប្រកបដោយជោគជ័យ នឹងត្រូវនិវត្តន៍មកកាន់កម្ពុជាវិញ នាថ្ងៃទី២៨ ខែមេសា ឆ្នំា២០១៧ខាងមុខនេះ។ នាព្រឹកថ្ងៃទី២៥ ខែមេសា ឆ្នាំ២០១៧នេះ គណៈកម្មាធិការជាតិបានរៀបចំពិធីជូនដំណើរកងកម្លាំងវិស្វកម្មលេខ១៨៩ និងកងកំទេចគ្រឿងផ្ទុះលេខ១២៣ ដើម្បីទៅប្តូរវេន។ ដោយឡែក កងអាវុធហត្ថលេខ៦១៨ ក៏ត្រូវទៅប្តូរវេនកងអាវុធហត្ថលេខ៨១៦ ដែលបញ្ចប់បេសកកម្មរក្សាសន្តិភាពរបស់អ.ប.ស នៅសាធារណរដ្ឋស៊ូដង់ខាងត្បូង ដែលគ្រោងនឹងនិវត្តន៍មកកាន់ប្រទេសវិញនៅអំឡុងខែមិថុនា ឆ្នាំ២០១៧ខាងមុខផងដែរ។
   តាមរបាយការណ៍របស់ឯកឧត្តម នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិ បានរាយការណ៍ជូនអង្គពិធីជា្របថា កងកម្លំាងកម្ពុជាដែលជូនដំណើរនាពេលនេះ បានធ្វើការហ្វឹកហ្វឺនយ៉ាងស្ទាត់លើជំនាញវិជ្ជាជីវៈប្រកបដោយគុណភាព រយៈពេលជាង១០ខែ ក្រោមការធ្វើតេស្តប្រលងវាស់ស្ទង់សមត្ថភាព គុណភាពយ៉ាងត្រឹមត្រូវ និងមានតម្លាភាព និងមានសមត្ថភាពដូចកងមុនៗផងដែរ។ កងកម្លាំងទាំង០៣កងនេះ មានចំនួន៤២៩នាក់ ក្នុងនោះនារី៤៣នាក់ ដែលបានជ្រើសរើសសម្រិតសម្រាំងពីគ្រប់កងឯកភាព ស្ថាប័នចំណុះក្រសួងការពារជាតិ អគ្គបញ្ជាការដ្ឋាននៃខ.ភ.ម។
   កងកម្លាំងទៅបំពេញបេសកកម្មនៅប្រទេសម៉ាលី រួមមាន០២កង គឺកងកម្ទេចគ្រាប់មិនទាន់ផ្ទុះ មានភារកិច្ចឈរជើង នៅទីតាំងចំនួន០៤ រួមមាន Gao, Anefis, Tombuktu, និង Mopti និងកម្លាំងវិស្វកម្មព្រលានយន្តហោះ មានការកិច្ចឈរជើងនៅតំបន់ Kidal និង Tessalit។ កងទាំង៣នេះ បាននាំទៅជាមួយនូវសម្ភារៈ យោធបរិក្ខា គ្រឿងបន្លាស់ និងឱសថមួយចំនួន សម្រាប់បំពេញបន្ថែមលើសម្ភារៈ មានស្រាប់នៅប្រទេសស៊ូដង់ខាងត្បូង និងម៉ាលី ដែលអាចធានាបានរយៈពេល០១ឆ្នាំ។ កាលពីខែមីនា ឆ្នាំ២០១៧ មជ្ឈមណ្ឌលជាតិក៏បានបញ្ជូនក្រុមនាំមុខនៃកងវិស្វកម្មព្រលានយន្តហោះចំនួន៨០រូប ធ្វើដំណើរទៅមុន ដើម្បីផ្ទេរប្រគល់សម្ភារៈ និងត្រៀមការងារគ្រប់ផ្នែក សម្រាប់ទទួលកម្លាំងធំ ដែលរៀបចំពិធីជូនដំណើរនាថ្ងៃនេះ។
   ឯកឧត្តម នាយឧត្តមសេនីយ៍ សែម សុវណ្ណនី បានគូសបញ្ជាក់បន្ថែមថា កម្ពុជាបន្តត្រៀមកងក្នុងប្រព័ន្ធ UNPCRS មាន០៣កង លើជំនាញបោលសំអាតមីន វិស្វកម្ម និងតម្រួតសណ្តាប់ធ្នាប់។ កងទាំង០៣នេះ បាននឹងកំពុងទទួលការហ្វឹកហ្វឺនជាមួយប្រទេសជាមិត្ត ដូចជា ចិន អាមេរិក បារាំង ជប៉ុន ឥណ្ឌា ប្រទេសនិយាយភាសាបារំាង និងមន្ត្រីUNMAS។ល។
   លោកស្រី Debora Comini តំណាងអ្នកសម្របសម្រួលអង្គការសហប្រជាជាតិប្រចាំកម្ពុជា បានសំដែងការដឹងគុណចំពោះរាជរដ្ឋាភិបាល និងប្រជាជនកម្ពុជា ដែលបានបរិច្ចាគកម្លាំងចូលរួមបំពេញបេសកកម្មរបស់កងកម្លាំងកម្ពុជា ដែលជាការលះបង់ដើម្បីសន្តិភាព សន្តិសុខ មិត្តភាព ជាលក្ខណៈអន្តរជាតិ និងជាគំរូសម្រាប់ពិភពលោក។ នេះជាការតាំងចិត្តប្រកបដោយមនុស្សធម៌ សម្រាប់ជួយដល់អ្នកដទៃ ក្នុងការចែករំលែកជំនាញដល់បណ្តាប្រទេសនានា ដែលកំពុងទទួលការរងទុក្ខដោយសារជម្លោះឲ្យមានសន្តិភាពជាក់ស្តែត និងជាប្រភពនៃការលើកទឹកចិត្តដ៏មានតម្លៃដល់ប្រទេសជាច្រើនទៀត។
   នៅក្នុងពិធីជូនដំណើរ ឯកឧត្តម នាយឧត្តមសេនីយ៍ ប៉ុល សារឿន អគ្គមេបញ្ជាការនៃខ.ភ.ម បានមានប្រសាសន៍ថា ក្រោមម្លប់សន្តិភាព កម្ពុជាបាននិងកំពុងបោះជំហានយ៉ាងស្វាហាប់ប្រកបដោយមោទនភាពជាតិ ដែលបេសកកម្មរក្សាសន្តិភាព លើវិស័យមនុស្សធម៌ ក្នុងក្រប់ខណ្ឌអង្គការសហប្រជាជាតិ ការដណ្តើមមេដាយមាស ប្រាក់ កម្រិតពិភពលោក ផ្នែកវិញ្ញាសារកីឡាប៉េតង់ ដែលមានវត្តមានវីរៈកីឡាការនីនៃខ.ភ.ម០២រូបផងដែរ។ ក្រោមម្លប់សន្តិភាព កម្ពុជាបាននិងកំពុងអភិវឌ្ឍន៍សមត្ថភាពរបស់ខ្លួនគ្រប់ផ្នែក ក្នុងការរួមចំណែកជាមួយពិភពលោក ដើម្បីសន្តិភាព និងបានលើកកម្ពស់កិត្យានុភាព កិត្តិសព្ទ និងកិត្តិយសកម្ពុជានៅលើឆាកអន្តរជាតិ។
   អនុវត្តតាមកម្មវិធីនយោបាយរបស់រាជរដ្ឋាភិបាលកម្ពុជា ដែលមាន សម្តេចតេជោ ហ៊ុន សែន ជាប្រមុខដឹកនាំ បានធ្វើឲ្យប្រទេសជាតិមានសន្តិភាព និងមានការអភិវឌ្ឍន៍លើគ្រប់វិស័យ ដូចនេះ ខ.ភ.ម ប្រឆាំងដាច់ខាតបដិវត្តពណ៌ ដើម្បីថែរក្សាការពារឲ្យបានរឹងមាំ និងស្ថិតស្ថេរជាអមតៈនូវសន្តិភាព សម្រាប់លើកកម្ពស់សមត្ថភាពកម្ពុជាក្នុងកិច្ចការអន្តរជាតិ ក្នុងបុព្វហេតុសន្តិភាពលើលោក និងបន្តជំរុញការអភិវឌ្ឍន៍ប្រទេសជាតិ ឲ្យកាន់តែរីកចម្រើនថែមទៀត។
   ឯកឧត្តម នាយឧត្តមសេនីយ៍ ប៉ុល សារឿន បានមានប្រសាសន៍សង្កត់ធ្ងន់ថា សន្តិភាព គឺជាមូលដ្ឋានគ្រឹះនៃសិទ្ធិមនុស្ស និងការលើកកម្ពស់លទ្ធិប្រជាធិបតេយ្យ។ សន្តិភាព គឺជាកត្តាចំបាច់បំផុត មិនអាចខ្វះបាន ក្នុងការអភិវឌ្ឍន៍ប្រទេសជាតិ ប្រកបដោយចីរភាព។ ប្រទេសកម្ពុជា មានសុខសន្តិភាពពេញបូរិបូរណ៍ ម្ចាស់ការគ្រប់គ្រងបាននូវស្ថិរភាពនយោនបាយ និងជំរុញបាននូវល្បឿននៃការអភិវឌ្ឍន៍ប្រកបដោយក្តីសង្ឃឹម គឺអាស្រ័យដោយការអនុវត្តន៍គោលនយោបាយ ឈ្នះ=ឈ្នះ ដែលកើតចេញពីបញ្ញាញាណដ៏ឈ្លាសវៃរបស់ សម្តេចតេជោ នាយករដ្ឋមន្ត្រី បានធ្វើឲ្យអង្គការចាត់តាំងនយោបាយ និងយោធារបស់ ប៉ុល ពត ត្រូវបានផ្តួលរលំដល់ឬសគល់។
   កត្តាសុខសន្តិភាពនេះ សម្តេចតេជោ បានយកអាយុជីវិតធ្វើជាដើមទុន ក្នុងការស្វះស្វែងរកសន្តិភាពពិតប្រាកដជូនប្រទេសជាតិ និងប្រជាជន ដែលជាឈ្នាន់ដ៏រឹងមាំ និងមានប្រសិទ្ធភាពខ្ពស់ ក្នុងការអភិវឌ្ឍន៍ប្រទេសជាតិ ឲ្យមានការរីកចម្រើនប្រកបដោយចីរភាព។ ជាងនេះទៀត សម្តេចតេជោ បានបញ្ចប់សង្គ្រាមជាមួយនឹងយុត្តិធម៌ ដោយបានសហការជាមួយអង្គការសហប្រជាជាតិ ដើម្បីនាំយកអតីតមេដឹកនាំកំពូលៗខ្មែរក្រហម មកកាត់ទោស ដើម្បីបញ្ចប់និទណ្ឌភាព ស្វែករកការពិតនិងយុត្តិធម៌ជូនជនរងគ្រោះ ដែលត្រូវបានសម្លាប់អស់ជាង៣លាននាក់។ ការបញ្ចប់សង្គ្រាមជាមួយយុត្តិធម៌នេះ ត្រូវបានកោតសរសើរ និងចាត់ទុកជាគំរូក្នុងតំបន់ និងពិភពលោក។ ក្រៅពីសង្គ្រាមនេះ សម្តេចតេជោ ប្រយុទ្ធប្រឆាំងនឹងសង្គ្រាមមួយទៀត គឺការកាត់បន្ថយភាពក្រីក្រ ដោយបានដាក់ចេញនូវវិធានការគន្លឹះ ក្នុងការធ្វើកំណែទម្រង់ស៊ីជម្រៅលើគ្រប់វិស័យ។ តាមរយៈកំណែទម្រង់នេះ បានធ្វើឲ្យកម្ពុជាមានកំណើនសេដ្ឋកិច្ចជាតិ ក្នុងរង្វង់៧% ជាមធ្យមក្នុងមួយឆ្នាំ។
   ទឡ្ហីករណ៍ទាំងអស់នេះ គឺជាផ្លែផ្កានៃការដឹកនាំរបស់ សម្តេចតេជោ នាយករដ្ឋមន្ត្រី ដែលប្រជាជនកម្ពុជាគ្រប់រូប បាននិងកំពុងទទួលផល គឺការរស់នៅប្រកបដោយភាពសុខដុម ស្ថិរភាព និងការអភិវឌ្ឍន៍លើគ្រប់វិស័យ ដែលជាតម្លៃកើតចេញពីមនុញ្ញផលនៃសន្តិភាព។ សន្តិភាពបានផ្តល់ឲ្យយើងនូវការគោរពសិទ្ធិមនុស្ស ការលើកម្ពស់លទ្ធិប្រជាធិបតេយ្យ និងជំរុញការអភិវឌ្ឍន៍។ គ្មានសន្តិភាព គ្មានការគោរពសិទ្ធិមនុស្ស និងគ្មានការអភិវឌ្ឍន៍។ ម្យ៉ាងទៀត វាជាកត្តាសត្យានុម័ត គ្មានប្រទេសណាមួយដែលមានការអភិវឌ្ឍន៍ ផ្តើមចេញពីសង្គ្រាមនោះឡើយ ពីព្រោះថា សង្គ្រាមគឺបំផ្លាញ រីឯសន្តិភាពគឺនាំឲ្យមានការអភិវឌ្ឍន៍។ ដោយយល់ពីតម្លៃដ៏មហិមានៃសន្តិភាព ស្រឡាញ់សន្តិភាព និងដើម្បីសន្តិភាព រាជរដ្ឋាភិបាលកម្ពុជា ក៏បាននិងកំពុង បន្តសហការរួមចំណែកជាមួយអង្គការសហប្រជាជាតិ ក្នុងការបញ្ជូនកងកម្លាំងរបស់ខ្លួន ឲ្យចូលរួមថែរក្សាសន្តិភាពលើវិស័យមនុស្សធម៌ ក្នុងក្របខណ្ឌរបស់អង្គការសហប្រជាជាតិ នៅប្រទេសមួយចំនួនលើពិភពលោក ដូចដែលយើងទាំងអស់គ្នា បានឃើញ និងសហការរៀបចំពិធីជូនដំណើរនាពេលនេះ។
   ឯកឧត្តម នាយឧត្តមសេនីយ៍ ប៉ុល សារឿន ក៏បានរំលឹកកិច្ចការមួយចំនួន ជូននាយទាហាន នាយទាហានរង និងពលទាហានទាំងអស់ ត្រូវអនុវត្តន៍ឲ្យបានដាច់ខាតនូវអនុសាសន៍ ដែលជាបទបញ្ជា៤ចំណុច របស់សម្តេចតេជោ នាយករដ្ឋមន្ត្រី ក្នុងពិធីសំណេះសំណាលជូនដំណើរកងអនុសេនាធំលេខ១៣៥ ចេញទៅបំពេញបេសកកម្មនៅប្រទេសស៊ូដង់ កាលពីថ្ងៃទី១២ ខែមេសា ឆ្នាំ២០០៦ ព្រមទាំងត្រូវធានាសុវត្ថិភាពក្នុងការបំពេញបេសកកម្ម គោរពវិន័យឲ្យបានម៉ឺងម៉ាត់ មានសាមគ្គីភាព ឯកភាពផ្ទៃក្នុង និងចៀសវាងអំពើទាំងឡាយណា ដែលល្មើសទៅនឹងវិន័យរបស់អង្គការសហប្រជាជាតិ និងប្រាសចាកពីច្បាប់លក្ខន្តិកៈរបស់កងយោធពលខេមរភូមិន្ទ៕