ឯកឧត្តម នាយឧត្តមសេនីយ៏ ទៀ បាញ់ ទទួលកងវិស្វកម្ម លេខ៩៨១ និងកងកម្ទេចគ្រាប់ លេខ៣៣៣ មកពីសាធារណរដ្ឋម៉ាលី - ព័ត៌មានក្នងស្រុក

ព័ត៌មាន

ឯកឧត្តម នាយឧត្តមសេនីយ៏ ទៀ បាញ់ ទទួលកងវិស្វកម្ម លេខ៩៨១ និងកងកម្ទេចគ្រាប់ លេខ៣៣៣ មកពីសាធារណរដ្ឋម៉ាលី

បន្ទាប់ពីបានបំពេញបេសកកម្មរបស់អង្គការសហប្រជាជាតិ នៅប្រទេសសាធារណរដ្ឋម៉ាលី រយៈពេល០១ឆ្នាំ ប្រកបដោយជោគជ័យ កងកម្លាំងវិស្វកម្មព្រលានយន្តហោះ លេខ៩៨១ និងកងកម្ទេចគ្រាប់មិនទាន់ផ្ទុះលេខ៣៣៣ សរុបចំនួន៣០៩នាក់ បាននិវត្តន៍មកកាន់កម្ពុជាវិញប្រកបដោយសុវត្ថិភាព នារសៀលថ្ងៃទី២៨ ខែមេសា ឆ្នាំ២០១៧ នេះ។
នៅក្នុងពិធីទទួលដំណើរនិវត្តន៍ កងកម្លាំងរក្សាសន្តិភាពកម្ពុជាទាំងពីរកងនេះ បានប្រព្រឹត្តទៅក្រោមអធិបតីភាព ឯ.ឧ នាយឧត្តមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជា និងលោកស្រី ដេបូរ៉ា ដូមីនី (Demora Domini) តំណាងអ្នកសម្របសម្រួលអង្គការសហប្រជាជតិប្រចាំកម្ពុជា។
ឯ.ឧ នាយឧត្តមសេនីយ៍ សែម សុវណ្ណនី អគ្គនាយក មជ្ឈមណ្ឌលជាតិ បានរាយការណ៍ជូនអង្គពិធីជ្រាបថា នេះជាឆ្នាំទី១១ ដែលកម្ពុជាបានបញ្ជូនកងកម្លាំងចូលរួមបេសកកម្មរក្សាសន្តិភាពរបស់អង្គការសហប្រជាជតិ ចំនួន ៤ ៦៨៨នាក់ ក្នុងនោះនារី ១៩៦នាក់ ទៅបំពេញបេសកកម្មនៅសាធារណរដ្ឋស៊ូដង់ ឆាដ អាហ្វ្រិកកណ្តាល ស៊ូដង់ខាងត្បូង លីបង់ ម៉ាលី ស៊ីរី និងសាយប្រឹស លើជំនាញបោសសំអាតមីន ត្រួតពិនិត្យការធ្វើដំណើរ វិស្វកម្មសំណង់ផ្តេក សំណង់បញ្ឈរ តម្រួតសណ្តាប់ធា្នប់ មន្ទីរពេទ្យកំរិត២ វិស្វកម្មព្រលានយន្តហោះ និងកំទេចគ្រាប់មិនទាន់ផ្ទុះ។ បច្ចុប្បន្នកម្លាំងកម្ពុជាកំពុងបំពេញបេសកកម្មនៅសាធារណរដ្ឋស៊ូដង់ ស៊ូដង់ខាងត្បូង លីបង់ អាហ្វ្រិកកណ្តាល និងម៉ាលី។
លោកស្រី ដេបូរ៉ា ដូមីនី (Demora Domini) តំណាងអ្នកសម្របសម្រួលអង្គការសហប្រជាជាតិប្រចាំកម្ពុជា បានសម្តែងការកោតសរសើរចំពោះកងកម្ទេចគ្រាប់មិនទាន់ផ្ទុះ និងកងវិស្វកម្មព្រលានយន្តហោះ ដូចកងដែលបានបញ្ចប់បេសកកម្មមុនៗផងដែរ ដែលមានភាពក្លាហាន គោរពវិន័យ និបំពេញភារកិច្ចទទួលលទ្ធផលល្អប្រសើរគួរឲ្យកត់សម្គាល់។ លោកស្រី បានថ្លែងនូវការដឹងគុណដល់ការតាំងចិត្តរបស់រាជរដ្ឋាភិបាលកម្ពុជា ក្នុងការបរិច្ចាកកម្លាំងទៅចូលរួមបំពេញបេសកកម្មរក្សាសន្តិភាពរបស់អង្គការសហប្រជាតិ ដើម្បីសន្តិភាព និងសន្តិសុខនៅពាសពេញពិភពលោក។
ឯ.ឧ ឧបនាយករដ្ឋមន្ត្រី ទៀ បាញ់ បានមានប្រសាសន៍ថា ជាការឆ្លើយតបទៅនឹងតម្រូវការរបស់អង្គការសហប្រជាជាតិ រាជរដ្ឋាភិបាលកម្ពុជា នៅតែបន្តប្តេជ្ញាចិត្តយ៉ាងមុតមាំ ក្នុងការបញ្ជូនកងកម្លាំងចូលរួមអង្គការសហប្រជាជាតិ ដើម្បីបង្ហាញពីការគោរពស្រលាញ់ សន្តិភាព ប្រកបដោយមនុស្សធម៌ ដែលជាសកម្មភាពអាទិភាពក្នុងការថែរក្សាសន្តិភាព និងពង្រឹងសន្តិភាព ស្ថេរភាពក្នុងប្រទេស ក៏ដូចជាបន្តសកម្មភាពមនុស្សធម៌ តាមរយៈការចូលរួមបេសកកម្មថែរក្សាសន្តិភាពរបស់ អ.ស.ប ក្នុងលោកជាបន្តទៅទៀត។
ឯ.ឧ បានសង្កត់ធ្ងន់ថា រាជរដ្ឋាភិបាល បានដាក់ចេញនូវចក្ខុវិស័យរបស់ខ្លួន ក្នុងគោលដៅជម្រុញបង្កើនការបញ្ច្រាបប្រើប្រាស់កម្លាំងជាស្ត្រី(យេឌ័រ) នៅគ្រប់ផ្នែកក្នុងតំបន់បេសកកម្ម ដែលដើរតួនាទីជានគរបាល យោធា អ្នកស៊ើបសង្កេត អ្នកសង្កេតការណ៍យោធា នាយសេនាធិការ និងជាមេបញ្ជាការបេសកកម្ម។ល។ និងខិតខំធ្វើឲ្យកាន់តែប្រសើរឡើងថែមទៀត នូវផែនការហ្វឹកហ្វឺន ការអនុវត្តផ្ទាល់ក្នុងតំបន់បេសកកម្ម យន្តការបទពិសោធន៍ និងសមត្ថភាពក្នុងការឆ្លើយតបឲ្យបានឆាប់រហ័ស ព្រមទាំងរឹះរកគ្រប់វិធី ដើម្បីទប់ស្កាត់ចំពោះការរំលោភបំពាន ការជួនដូរ និងធនធានចាំបាច់មួយចំនួន សម្រាប់បំពាក់ជូនដល់កងកម្លាំងចូលរួមបេសកកម្មរក្សាសន្តិភាពរបស់ អ.ស.ប ដើម្បីអនុវត្តភារកិច្ចឲ្យកាន់តែមានប្រសិទ្ធភាបខ្ពស់ តាមរយៈការងារដឹកនាំ និងលើកកម្ពស់សមត្ថភាពហ្វឹកហ្វឺន ជំនាញលើគ្រប់វិស័យដល់កងកម្លាំង ដែលជាការបង្ហាញពីចក្ខុវិស័យនៃកិច្ចប្រតិបត្តិការរក្សាសន្តិភាព និងទស្សនទានសម្រាប់របៀបវារៈការអភិវឌ្ឍន៍ប្រកបដោយចីរភាព។
ឯ.ឧ ឧបនាយករដ្ឋមន្ត្រី បានសម្តែងការគោរពដឹងគុណយ៉ាងជ្រាលជ្រៅ ចំពោះបងប្អូនជនរួមជាតិទាំងអស់ ដែលបានលះបង់កូនចៅ ប្តីសី និងសាច់ញ្ញាតិជាទីស្រលាញ់របស់ខ្លួន ដើម្បីចូលរួមចំណែកដោយស្ម័គ្រចិត្តក្នុងបេសកកម្មរក្សាសន្តិភាព របស់ អ.ស.ប ក្នុងនាមមនុស្សធម៌ និងបានផ្តាំផ្ញើរនូវការសាកសួរសុខទុក្ខ ដោយក្តីនឹករលឹកដ៏ខ្លាំងក្លាបំផុត ចំពោះយុទ្ធជន យុទ្ធនារី កងរក្សាសន្តិភាពរបស់កម្ពុជា ដែលកំពុងបំពេញបេសកកម្មរក្សាសន្តិភាពរបស់ អ.ស.ប នៅក្រៅប្រទេសទាំងអស់ សូមឲ្យមានសុខភាពល្អ សម្រេចបានគ្រប់ភារកិច្ច។
ឯ.ឧ ទៀ បាញ់ ក៏បានអំពាវនាវចំពោះបណ្តាប្រទេសជាមិត្តទាំងអស់ បន្តជួយគាំទ្រឧបត្ថម្ភដល់កងកម្លាំងរក្សាសន្តិភាពកម្ពុជា ទាំងស្មារតី ឧបករណ៍ សម្ភារៈ មធ្យោបាយជាក់ស្តែង និងជួយជញ្ជូនគ្រូយោធាចារ្យប្រកបដោយសមត្ថភាព និងបទពិសោធន៍ល្អៗ មកបង្ហាត់បង្រៀនជំនាញបច្ចេកទេស ដល់កងកម្លាំងកម្ពុជា ឲ្យមានសមត្ថភាពជំនាញតាមនិយាមរបស់ អ.ស.ប សម្រាប់បំពេញបេសកកម្មមនុស្សធម៌ ឲ្យទទួលបានជោគជ័យថ្មីៗថែមទៀត។
ក្នុងនាមសម្តេចតេជោ ហ៊ុនសែន, ឯ.ឧ ឧបនាយករដ្ឋមន្ត្រី ទៀ បាញ់ បានផ្តល់ការលើកទឹកចិត្តដោយបានបំពាក់គ្រឿងឥស្សរិយយសជូនដល់កងកម្លាំងវិស្វកម្មព្រលានយន្តហោះលេខ៩៨១ និងកងកម្ទេចគ្រាប់មីនទាន់ផ្ទុះលេខ៣៣៣ ទាំង៣០៩នាក់ ដែលបាននិវត្តន៍ពីសាធារណរដ្ឋម៉ាលី មកដល់កម្ពុជាវិញប្រកបដោយសុវត្ថិភាព។
គួរបញ្ជាក់ដែរថា៖ កងកម្លាំងដែលនិវត្តន៍មកកាន់កម្ពុជានាពេលនេះ បានបំពេញការងារទទួលជោគជ័យជាផ្លែផ្កាជាច្រើន ក្នុងនោះកងកម្ទេចគ្រាប់មិនទាន់ផ្ទុះ លេខ៣៣៣ បានចេញប្រតិបត្តិការ ១៥៣លើក ដូចជា ការគាំទ្រយុទ្ធដំណើរបេសកកម្មប្រចាំថ្ងៃ កម្ទេចគ្រាប់មិនទាន់ផ្ទុះ ប្រតិកម្មរហ័ស និងប្រតិបត្តិការផ្សេងៗ។ ដោយឡែក កងវិស្វកម្មព្រលានយន្តហោះ លេខ៩៨១ អនុវត្តការងារ ៥៨៣លើក លើការងារជួសជុល ឈួសឆាយ សាងសង់ និងថែទាំព្រលានយន្តហោះ។ ទន្ទឹមភារកិច្ចស្នូល កងកម្លាំងកម្ពុជាក៏បានធ្វើសកម្មភាពមនុស្សធម៌នានា ដូចជា ផលិតទឹកស្អាត ទឹកប្រើប្រាស់ ពិនិត្យព្យាបាលជម្ងឺដោយឥតគិតថ្លៃ ជូនកងកម្លាំងអង្គការសហប្រជាជាតិម៉ាឡេស៊ី, ម៉ាលី, នេប៉ាល់, បង់ក្លាដែស, ឆាដ, មន្ត្រីស៊ីវិល អ.ស.ប និងប្រជាពលរដ្ឋម៉ាលីផងដែរ។