ឯកឧត្តម ទៀ បាញ់ ជួបប្រតិភូកងទ័ពជើងទឹកចិន - ព័ត៌មានក្នងស្រុក

ព័ត៌មាន

ឯកឧត្តម ទៀ បាញ់ ជួបប្រតិភូកងទ័ពជើងទឹកចិន

នៅក្នុងជំនួបជាមួយគណៈប្រតិភូកងទ័ពជើងទឹកនៃកងទ័ពរំដោះប្រជាជនចិន នាព្រឹកថ្ងៃទី០៣ ខែឧសភាឆ្នាំ២០១៧ ឯកឧត្តម ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានវាយតម្លៃខ្ពស់ចំពោះការរីកចំរើនយ៉ាងខ្លាំងរបស់កងទ័ពជើងទឹកចិនដែលបានអភិវឌ្ឍន៍សមត្ថភាពរបស់ខ្លួន ក្នុងការរួមចំណែកការពារអធិបតេយ្យរបស់ខ្លួនក៏ដូចជាការការពារសន្តិភាពនៅក្នុងតំបន់ផងដែរ។ ឯកឧត្តមបានបញ្ជាក់ប្រាប់ប្រតិភូថា៖ បច្ចុប្បន្ននេះចំណងមិត្តភាព និងកិច្ចសហប្រតិបត្តិការរវាងប្រទេសទាំង២កម្ពុជា-ចិនមានការរីកចំរើនគ្រប់វិស័យទាំងអស់ក្នុងនោះកងទ័ពក៏មានការរីកចំរើនផងដែរ។ ឯកឧត្តម ទៀ បាញ់ បានសង្កត់ធ្ងន់ថា៖ ដំណើរទស្សនៈកិច្ចរបស់គណៈប្រតិភូកងទ័ពជើងទឹកកងទ័ពរំដោះប្រជាជនចិននៅកម្ពុជានាពេលនេះ បាននាំមកនូវការពង្រឹងកិច្ចសហប្រតិបត្តិការរវាងកងទ័ពនៃប្រទេសទាំង២ ជាពិសេសនិងរួមចំនែកលើកកំពស់សមត្ថភាពកងទ័ពជើងទឹកកម្ពុជា អោយបានកាន់តែប្រសើរឡើងថែមទៀត។
មានមតិឆ្លើយតបវិញ ឯកឧត្តម នាយឧត្តមនាវី ម៉ៅ ហួរ(Miao Hua) ស្នងការនយោបាយកងទ័ពជើងទឹក នៃកងទ័ពរំដោះប្រជាជនចិនបានសំដែងនូវក្តីសោមនស្សរីករាយ ដែលបានដឹកនាំប្រតិភូកងទ័ពជើងទឹកចិនមកបំពេញទស្សនៈកិច្ចនៅកម្ពុជាហើយបានទទួលការស្វាគមន៍យ៉ាងកក់ក្តៅពីកងទ័ពជើងទឹកកម្ពុជា។ឯកឧត្តមបានបញ្ជាក់ថា៖ នេះជាលើកទី១ដែលថ្នាក់ដឹកនាំកងទ័ពជើងទឹកនៃកងទ័ពរំដោះប្រជាជនចិន បានមកទស្សនៈកិច្ចនៅកម្ពុជាក្រោយពីបានបង្កើតឡើងក្នុងរយៈពេលជាង៦៣ឆ្នាំកន្លងមក។ ឯកឧត្តម នាយឧត្តមនាវី ម៉ៅ ហួរ បានបញ្ជាក់ទៀតថា៖ ចិននិងកម្ពុជា ជាប្រទេសជិតខាង មិត្តភាពចិន និងកម្ពុជាមានតាំងពីយូលុងណាស់មកហើយ ដែលបានបង្កើតឡើងដោយថ្នាក់ដឹកនាំជំនាន់មុន។ ឯកឧត្តម បានបញ្ជាក់ថា៖ តំណើរទស្សនៈកិច្ចរបស់ប្រតិភូកងទ័ពជើងទឹកចិន មកកាន់កម្ពុជានាពេលនេះ នឹងបាននាំមកនូវការផ្លាស់ប្តូរបទពិសោធន៍ពីគ្នាទៅវិញទៅមករវាងកងទ័ពជើងទឹកនៃប្រទេសទាំង២។
តាមរយៈជំនួបនេះឯកឧត្តម នាយឧត្តមនាវី ម៉ៅ ហួរ បានសំណូមពរដល់ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជាអោយបន្តការផ្លាស់ប្តូរ គណៈប្រតិភូទស្សនៈកិច្ច ទៅវិញទៅមករវាងកងទ័ពទាំង២បន្តទៀតក្នុងនោះឯកឧត្តមក៏បានជម្រាបជូន ឯកឧត្តម ឧបនាយករដ្ឋមន្ត្រីផងដែរ អំពីការមកចូលចតនាវាកងទ័ពជើងទឹកចិននៅក្នុងខែតុលាឆ្នាំ២០១៧ខាងមុខដែលការចូលចតលើកនេះជាការចូលចតនាវាលើកទី៥នៅកម្ពុជា៕